17
Dihp
Jesus pwehng Nah sohnpadahkkok, “Joang kan ma kin kahrehioang armaj nehn dihp uhdahn kin pwen wiawi; a meid naunahng armajjo ma kin kahrehda joang pwiai! Ma emen ma kahrehng jeri siksik pwiai nehn dihp, mwehu oang oau sakai koalikko en pirapirroang in sipinwoaroa peidekla nehn madauwo. Kamwai en kalke pein kamwai!
“Ma rioamw men dipda, woarwoarihda; ma ih koaluhla, mahkoahng. A ma ih wiahda japwung oang koawoa pehn ijuh nehn rehnnoau, a pehn ijuhwo ih indoa ipoamw pwa, ‘Ngoahi koaluhkihla oai japwung,’ a koawoa uhdahn pirin mahk oang.”
Pwojon
Woaroakkok pwehng Koaunno, “Maing, kakoalikihla amai pwojon.”
Koaunno japoang irai, “Ma amwai pwojon woahr liporrohn mustard oau, kamwai kak pwehng suhkoa pase, ‘Pein wijjekda jang men inla poaddi nehn madauwo,’ a ih nen peik oang kamwai.
En Lidu men ah Pwukoa
“Ma emen in kamwai mine nah lidu ma mwoasmwoaswel ke appwapwali jihpw nehn japw; a nehn ah pirin pwurdo jang nehn japw, kamwai kin pwehng en karwaro inla mwingehla? Joh douluhl! Koawoa en pwehng ih, ‘Koaunopda koanoai mwingehn joausik, koawoa sahpis oang ngoahi nehn oai mwingmwinge apel nim pil; mwerin, koawoa kapwa mwinge.’ Lidu men joah koanoahng oaloa kajpahl kalahngan, ma ih peik oang ah koaunno. Ke da? 10  Ioar pel doahroar kamwai; kamwai pirin pel kapwaihahda meohroj ma kileldi oang kamwai en wia, kamwai en kin pwa, ‘Kamai lidu pwi; ioar oar pwoaijoamai, kamai en kapwaihahda amai pwukoa.’ ”
Jesus Kemwehuwihla Woal Lepa Eijek
11 Nehn en Jesus allaluhlahng Jerusalem, Ih wud nehn pwungen Samaria apel Galilee. 12 A nehn Ah dilda nehn koujapw oau Ih suhwoang woal lepa eijek. Irai uhda ekij dohla, 13 rahrahulahng, pwa, “Maing, Jesus amai Koaun! Jeuweje kamai.”
14 Jesus kapangda irai, Ih pwa, “Kamwai alwe ipen jamwrouwok oaloa kajau iparai.”
A nehn anjoau ma irai allaluhla, irai ne mwakelkelda. 15 Emen in irai, nehn ah kapangda doahroar ah ne mwakelkelda, ih pwurdo ipen Jesus, ngil koalikda kapkapnga Koahs. 16 Ih poadpwomwla mwohn ehn Jesus pel kapkapnga Ih. A woallo mihn Samaria men. 17 Jesus pwa, “Jaudi irai woal eijek ma ne mwakelkelda? A ia irai dohmenwa? 18  Da wia mihn likin menehr ma pwurdo pwa en kajpahl kalahngan oang Koahs?” 19 Jesus pwehnglahng woallo, “Doari, uhda, alwe pwa oamw pwojonnen ne kemwehuwihla koawoa.”
Indoahn Wein Koahs
20 Pharisee pwi kalelpoak ipen Jesus, “Ngehd Wein Koahs pirin indoa?” Ih japoang irai, pwa, “Wein Koahs joh kin indoa in mwomw janjal. 21  Joh emen pirin pwa, kapang ioar ih me, ke ioar ih o; pwa Wein Koahs ne mine nehn kamwai.”
22 A ih pwehnglahng Nah sohnpadahkkok, “Anjoau oau pirin indoa ma kamwai nen nimen kapang rehn in Nihn‑Armaj, a kamwai nen johkak. 23  Mine irai pwi pirin pwehng kamwai, ‘Kamwai rapahki o! Ke, rapahki me!’ A kamwai joah alwe rapahki. 24  Pwa doahroar en joarom kin kamaramihda jampah jang oaloap lel oaloap, me ioar doahroar pirin wiawi rehn in Nihn‑Armaj. 25  A keiou, Ih pirin oaloa loklok koalik, a armaj in nehn mwei oauwe joah nimen oaloahda Ih. 26  Dahkij ma wiawi nehn mwein Noah, ioar nen pel wiawi nehn mwein Nihn‑Armaj. 27  Armaj ohroj kamkamdipw, jakjakau, pwoapwoaud mwahl, oaroh lel rehnno ma Noah dilloang nehn warihmmwo, nohlik koalikko leldo, kojukdi ihr ohroj. 28  Pel doahroar da ma ne wiawi in mwein Lot, armaj ohroj kamkamdipw, jakjakau, noasnoas, japwjapw, kokou umw; 29  A rehnno ma Lot injang nehn Sodom, oai apel sulfur mwoardi jang nehnloannge, kojukdi ihr ohroj. 30  Ioar doahroar ma pirin wiawi nehn rehn in Nihn‑Armaj Ah pirin janjalda.
31  “Nehn rehnno armaj men ma mine pohn umwahu, ih en joah doaudi oaloa ah koapwoa. Pel doahroar armaj men ma minmine nehn japw, ih en johpwa pwurdo in umwahu. 32  Samsaman pahien Lot‑o! 33  Inje ma nimen doaroahla ah mour, ih pirin luhj jang; a emen ma nimen mindahkihla ah mour, ih pirin mourla. 34  Ngoahi pwehng kamwai pwa pwonngo armaj roahmen pirin moair pohn pehd oauwoar, emen pirin wijikjang, a emen pirin luhwoahdi. 35  Li roahmen pirin daulahk pilahwa; emen pirin wijikjang, a emen pirin luhwoahdi. 36  [Armaj roahmen pirin minmine nehn japw, emen pirin wijik jang, a emen pirin luhwoahdi.]”
37 Sohnpadahkkok idoak ipen Jesus, “Maing, ia wija mehpwiai pirin wiawi?”
Jesus japoangki irai, “Wija ma palwar mehdi oau mine, ioar wijahwa vulture kin pokonlahng.”