16
Koaunnok pwehng Ih en Wiahda oau Kilel Manman
Pharisee‑pwi apel Sadducee‑pwi indoa ipen Jesus pwa irai en lidipihdi Ih, ioar kahrehda irai pwehng Ih en wiahng irai oau manman jang nehnloannge. A Jesus japoang, “Nen en joauwo kin duhla, kamwai kin pwa, ‘Lakapw nen mwehu pwa mijen loannge Wahssa.’ A Inminjoang kamwai kin pwa, ‘Rehnnoauwe pirin wud, pwa mijen loannge wahssa apel soal.’ Kamwai kak kajawihda iren anjoau jang nen amwai kin kapang mijen loannge, a kamwai joh kak kajawihda kilellok doahr anjoau pwiai! Ia woahr nauna apel rosros in armaj in anjoau kije!” Ih pel pwa, “Kamwai poaki manman oau jang Ipoai a manman wahr Ngoahi nen kioang kamwai ioar manman in Jonah.”
Doar Jesus ken injang irai inla ekij wija.
Ihs in Pharisee apel Sadducee‑ok
Nehn en sohnpadahkkok jeila lel oaloap jeddo, irai moalkoahla wahda pilahwa. Jesus pwehng irai, “Kamwai mwajahn apel kalikdihjang ihs in Pharisee apel Sadducee‑ok.”
Irai sapda siksikoahpene nehn pwungarai, “Ih pwa me, pwa kisai johpwa wijik pilahwa.”
Jesus kidal da irai pwahpwahpwa, ioar Ih idoakki iparai, “Dahkij kamwai siksikoa pene nen pwungamwai pwa joh pilahwa ipamwai? Amwai pwojon inenin siksik! Kamwai kahjikkoar woahwoahkihla? Kamwai johpwa lemleme lopwon in pilahwa limoauwo ma Ngoahi kamwingehkihla armaj limekiddo? Kiam doapoa kamwai audohda? 10  A lopwon in pilahwa ijuhwo oang armaj pahkiddo? Kiam doapoa kamwai audohda? 11  Amwda kamwai ke johpwa woahwoahki pwa audi pilahwa ma Ngoahi pwahpwahpwa? Kamwai kalkehjang kamwai ihs in Pharisee apel Sadducee‑ok.”
12 Doari, sohnpadahkkok ken woahwoahkihda pwa audi ihs in nehn pilahwa ma irai en kalkehjang irai, a padahk in Pharisee apel Sadducee‑ok.
En Peter Kadehde doahr Jesus
13 Jesus inlahng wijahkij ipen kahnihmw Caesarea Philippi, wijahu Ih idoak oang nah sohnpadahkkok, “Inje ma armaj kan kin pwahki doahr Nihn‑Armaj?”
14 Irai japoang, “Epwi kin pwa John jounpoapdaij, a epwi pwa Elijah, apel epwi pwa Jeremiah ke emen in joukohppok.”
15 A Jesus pel idoak iparai, “Inje kamwai kin pwahki Ngoahi?”
16 Simon Peter japoang, “Koawoa ioar Messiah, Nihn Koahs mourro.”
17 Jesus japoang, “Meid pai koawoa, Simon nihn John, pwa jaudi armaj ma kajalehng koawoa mehlel oauwe. Pwa Joamoai ma minmine nehnloannge. 18  Doari, apkas Ngoahi pwehng koawoa, pwa koawoa Peter, paip koalik oau, pohn paip koalikkoauwe Ngoahi pirin kouda oai mwomwohdjo. Doar mehdi johpwa pirin kak kalwehdi. 19  Ngoahi pirin kioang koawoa kihkan in Wein nehnloannge. Me ohroj ma koawoa kainoapwihdi nehn jampah pirin pel kainoapwdi nehnloannge, apel me ohroj ma koawoa mweidda nehn jampah pirin pel mweimweida nehnloannge.”
20 Doar Jesus pwehng nah sohnpadahkkok, irai en johpwa pwehng emen, pwa Ih ioar ma Messiah.
Jesus sikoa Ah Pirin Koaloklok apel Mehdi
21 Jang anjoauwo inla Jesus sapda sikoa in janjal oang nah sohnpadahkkok, “Ngoahi uhdahn pirin inla Jerusalem, oaloa loklok koalik jang ipen joumajjok, jamwrou laplappok, apel jounpadahk in Kojonneddok. Ngoahi pirin kojkojdi, a mwerin rehn jiluh, Ngoahi pirin iejda.”
22 Peter kalahpwukihla Jesus sapda koapwung oang ih, “Maing oai Koaun, Koahs kainoapwi joanngoauwe,” ih pwa. “Me uhdahn johpwa pirin wiawihoang koawoa!”
23 Jesus pwurlahng Peter pwehng ih, “Alwe jang Ngoahi, Jehsen! Koawoa lidip keper oau oang Ngoahi, pwa oamw lamlam jaudi jang ipen Koahs, a jang ipen armaj.”
24 Doari Jesus pwehng nah sohnpadahkkok, “Ma emen in kamwai nimen indoa pwili Ngoahi, en uhdahn moalkoahla pein ih, wahda ah lohpwu, pwilihla Ngoahi. 25  Pwa emen ma nimen doaroahla ah mour ih pirin luhj jang; a emen ma sohnmeseikihla ah mour ki Ngoahi, ih pirin mourla. 26  Pirin mine kaspoan oamw en wihnkihda jampah pwon, a luhj jang oamw mour? Joh douluhl, joh mehkij koawoa kak kihda pwa en japahl oang oamw mour. 27  Pwa Nihn‑Armaj, pirin indoa nehn ling in Jamahu pwili nah sohnloanngok, pwa en dupukkoang emenemen armaj jang in ah wihwiahk. 28  Ngoahi pwehng kamwai in mehlel, pwa epwi kamwai ma mine me nen joah mehdi oaroh irai nen kapang Nihn‑Armaj pirin indoa doahr Nahmwarki men.”