17
Jesus Wikla Palwoaroa
Mwerin rehn wonou Jesus ukda Peter apel riariho, James apel John, ukdahla pohn dol illoahioau pwa irai en kalahpwukla. Nehn irai kapkapang, palwoaroan Jesus wikla, mijoa dakda doahr joauwo, apel Ah likkoauwo inenin korohrohla. Sohnpadahk jilmenno pel kapangda Moses apel Elijah siksikesik oang Jesus. Peter pwehng Jesus, “Oai Koaun, inenin mwehu asai minmine me! Ma koawoa mwehuki, ngoahi en kouda umpwal jiluh wija kije, oau umwoamw, oau umwen Moses, apel oau umwen Elijah.”
Nehn anjoauwo ih pwahpwahpwa me, koasoau maram oau pwaindi irai, a ngilloau indihdo jang nehn koasoauwo ma pwa, “Me ioar Noai jermwein kajampwalwa ma Ngoahi kin ipwilki, kamwai rong Ih!”
Nehn en sohnpadahkkok rongda ngillo, irai inenin majpwehkda, ioar kahrehda arai rukdi lel pohn pwirej. Jesus indoa pukkoang irai, Ih pwa, “Kamwai uhda, kamwai joah mijik!” Nehn irai jarda, joh armaj irai kapang, Jesus kalahpwuk.
Nehn irai indihdohjang pohn dollo, Jesus inoapwihdi irai en,“Johpwa pwehng emen doahr mwoakiddoauwe ma kamwai kapang oaroh Nihn‑Armaj en iejda jang mehdi.” 10 Sohnpadahkkok idoak oang Jesus, “Amwda jounpadahk in Kojonneddok pwa Elijah uhdahn pirin sapin indoa?”
11 Jesus japoang,“Mehlel, Elijah uhdahn pirin sapin indoa pwa en koaunopda me ohroj. 12  A Ngoahi pwehng kamwai, Elijah ne indoa, a armaj kan johpwa kidal ih, doar irai wia mwahlki apel wiahng ih injenarai. Nen doahr irai pirin wiahng Nihn‑Armaj, ma pirin pel oaloa koaloklok jang iparai.”
13 Sohnpadahkkok woahwoahkihda pwa Ih pwehpwehpwehng irai doahr John jounpoapdaij.
Jesus Kemwehuwihla Jermwein Men Ngen Nauna Mine Ipoa
14 Anjoauwo irai lellahng ipen pokonno, woalmen indoa ipen Jesus, poadpwomwla mwohn Ih, 15 Ih pwa, “Maing, jeuweje noai jermweinno, pwa ih kin johmwehu roarroar koalik ma kin lelloang ih, kapkihdihoang nehn oai ke nehn pil pehn dir. 16 Ngoahi wahdohng ih ipen nihmw sohnpadahkkok, a irai johkak kemwehuwihla ih.”
17 Jesus japoang, “Kamwai inenin joah pwojon apel japwung! Ia woaroai in oai pirin minmine ipamwai? Ia woaroai in oai pirin kanangmahng kamwai? Wahdo jermweinnen Ipoai!” 18 Doar Jesus ruwoj ngen jausso en diljang nehn jermweinno, ngen jausso ken diljang. Anjoauwohr jermweinno mwehula.
19 Sohnpadahkkok kalahpwukla ipen Jesus idoak oang Ih, “Amwda kamai ke johkak kaujjang ngen jausso ipen jermweinno?”
20 Jesus japoang irai, “Pwa amwai pwojon johpwa isar. Ngoahi lal mehlel oang kamwai, ma amwai pwojon inenin sihksik woahroar liporrohn kadiring oau, kamwai kak pwehng dollo, ‘mwoakid jang men mwoakidla o!’ ih nen mwoakid. Kamwai nen kak wia me ohroj. 21  [A joangoan ngen jaus oauwe joh mehkij koawoa kak kaujkihjang ioarroar kapkap apel kaijihjol.]”
Jesus Pwuroahng Sikoa doahr Ah Pirin Mehdi
22 Sohnpadahkkok ohroj pokonpene Galilee, Jesus pwehng irai, “Nihn‑Armaj pirin ken likliklahng ipen armaj kan; 23  ma pirin kojukdi Ih, a rehn jiluh mwerin Ih pirin iejda.”
Sohnpadahkkok inenin injinjuwedla.
Jesus Kihda Ah Daksis oang Umw Joarwiho
24 Nehn en Jesus apel nah sohnpadahkkok lel Capernaum, jounrik daksis in Umw Joarwiho indoa idoak oang Peter, “Imdoahr, amwai jounpadahk en kin pwili dupuk daksis in Umw Joarwi?”
25 “Eh, ih kin pwili dupuk.” Peter japoang.
Nehn en Peter inla nehn ummwo, Jesus ken pispis oar pwehnglahng, “Simon, Da oamw lamlam oang irairroauwe? Inje kin nohpwei ke dupuk daksis oang Nahmwarkihn jampahioauwe? Jang ipen nah armaj kan ke jang ipen mihn likin kan?
26 “Jang ipen mihn likin kan,” Peter japoang.
“Doari,” Jesus pwa, “Sowoa mehlel in weiho kin jehpwili dupuk daksis. 27  A, kisai joah nimen kalioasihda sohn rik daksis pwiai, Doar indihwe nehn jeddo, peiddihwe nihmw ohn. Keioun mwumw ma koawoa oapihda, Kihpijoang oawoan mwummwo, koawoa nen kapangda mwani isar oang dupukla asa daksis.”