18
Inje ma Keiou Laplap nehn Wein Koahs
1 Nehn anjoauwo sohnpadahkkok indoa ipen Jesus idoak, “Inje ma keiou laplap nehn Wein nehnloannge?”
2 Doar Jesus pangindo jeri siksik men kihdi nehn pwung irai.
3 Ih pwa, “Ngoahi pwehng kamwai in mehlel, pwa ma kamwai johpwa wikla doahroarla jeri, kamwai nen johkak dilda nehn Wein nehnloannge.
4 Pwa emen ma kin aksiksikla doahrla jeri siksik mene ih pirin keiou laplap nehn Wein nehnloannge.
5 Apel emen ma kin kajamwo jeri siksik men doahre in oadoaioa ih kin kajamwo ngoahi.
Kahrehioang Nehn Dihp
6 “Ma emen ma kahrehng en emen jeri siksik pwiai ma kamehlele Ngoahi en johla ahr pwojon, mwehu oang en pirapirroang oau sakai koalikko in sipinwoaroa, pwa en sikmehula.
7 Ia woahr nauna in oang jampah mihn koauwehla pwiai ma pirin kahrehioang emen en kerpwihla ah pwojon! A joah, joang pwiai pirin pwen mine anjoau ohroj, a ia woahr nauna in oang armaj meno ma mehpwiai sapdahjang ipoa!
8 “Ma oaloap poahmmwen ke oaloap ehmmwen kahrehioang koawoa nehn dihp, poaloahjang, kerpwihla! Pwa nen mwehuwoang koawoa en dilloang nehn mour joahsukko, ki oaloappoar poahmmwen ke oaloappoar ehmmwen jang poah riau ke eh riau kerpwiheklahng nehn oaiho ma johkin kunla.
9 A ma oaloap pwoaroan mijoammwen kin kahrehioang koawoa nehn dihp, roahkjang, kerpwihwehjang koawoa! Mwehu ma koawoa loapin pwoaroan maj dilda nehn mour joahsuk jang pwoaroan maj riau a kerpwiheklahng nehn oai in nehn ehl.
Karajraj in Jihpw ma Joaloangla
10 “Kamwai kanaihoahng pwa kamwai en johpwa mwamwahlki emen siksik pwiai. Kamwai en kidal pwa arai sohnloang kin mine ipen Joamoaiho nehnloannge anjoau ohroj.
11 [Pwa Nihn‑Armaj indoahng koamoaurla irai kan ma ne joaloangla.]
12 “Da kamwai lemleme? Ma armaj men nainki jihpw epwiki, emen arai joaloangla, ih joh nen kihdi jihpw duweijek dohmenno arai en mwingmwingehjili pohn nahna, a ih inla rapahki jihpw joaloanglahu?
13 A ma ih kapangda, Ngoahi pwehng kamwai in mehlel, pwa ih nen uhdahn perenki jihpw meno jang jihpw duweijek dohmenno ma johpwa joaloangla.
14 Ioar nehn doahr Jamamwaiho nehnloannge, ih johpwa mwehuki emen siksik pwiai en joaloangla.
Rioamw Men Ma Wia Dihp
15 “Ma rioamw men wiahda dihp oang koawoa, inla ipoa, kajalehioang dipoahu. A me en wiawi in rir. Ma ih rong koawoa, a koawoa ne kajpahlihdo rioammwo.
16 A ma ih joah rong koawoa, a emen ke roahmen armaj en pwilihda koawoa, pwa “kadip ohroj pirin wiawihki kadehdehn armaj roahmen ke jilmen” — doahroar Puk Joarwiho pwa.
17 A ma ih pel johpwa nimen rong ira, a koawoa lelki mwomwohdjo. A ma ih pel johpwa nimen rong mwomwohdjo, a wiahkihla ih mihn likin men ke jounrik daksis men.
Manman in Joalihdi apel Lapwadda
18 “Ngoahi pwehng kamwai in mehlel, pwa me ohroj ma kamwai joalihdi nehn jampah, a nen pel joaldi nehnloannge; a me ohroj ma kamwai lapwadda nehn jampah, a nen pel lapwda nehnloannge.
19 “Apel Ngoahi pwehng kamwai in mehlel, ma roahmen ipamwai nehn jampah minminkihpene ara kapkap, poaki mehkij, nen uhdahn pirin pwoaidahng ara jang ipen Joamoaiho nehnloannge.
20 Pwa wijahkij ma roahmen ke jilmen pokon pene in oadoaioa, Ngoahi kin pwili irai mine wijahu.
Karajraj in Papah Joampoak
21 Peter sohdo ipen Jesus pwehng Ih, “Maing oai Koaun, pehn doapoa ngoahi en mahkoahng rioaiho ma kin wia dihp oang ngoahi? Isar ma ngoahi mahkoahng ih pehn ijuh?”
22 A Jesus japoang, Ih pwa, “Johpwa isar pehn ijuh, a pehn ijuh wad ijihjek.
23 Pwa Wein nehnloannge doahroar nahmwarki men ma lemehda en wia koapwung in pwaipwanid oang nah papahk.
24 Nehn ah sapda wia koapwunngo, a emen irai wijikdohng ipoa, ma pwaipwanidki pehk in kohl lopw.
25 Papahu johpwa nainki mwani isar in dupukla ah pwaipwaniddo, doar nahmwarkiho pwa ih en noasla, doahroar lidu men, pwilihkihoar pahioa, nah jerihok, apel ah koapwoa ohroj pwa en kak dupukla ah pwaipwaniddo.
26 Papahu ken poadpwomwla mwohn nahmwarkiho, ‘Maing, koawoa en menlau mahkoahng ngoahi, koawoa en kanangmahioang ngoahi, pwa ngoahi pirin dupukkoang koawoa me ohroj.’
27 Nahmwarkiho ken ipwilkihda ih apel mahkoahng ih ki ah pwaipwaniddo doar ken mweidoahng ih en inla.
28 “Mwerin a injang wijahu, ih suhwoang emen pwilihoa papah ma pwaipwanidki oang ih mwani silper jipidpwi, ih jipoardi, padikpene sipinwoaroa, pwehng ih, ‘Pispis dupukdo oamw pwaipwanid oang ngoahi!’
29 Papahu rukdi mwohn ih poakmahk, ‘Menlau kanangmahioang ngoahi, pwa ngoahi nen dupukkoang koawoa!’
30 A ih kia rong, doar ih peiddoang pwilihoahu nehn kalpwuhj oaroh pwilihoahu en dupukla ah pwaipwaniddo.
31 Nehn en pwilihoa papahk kapangda dahkij wiawi, irai injinjuwedkihla koalik, inla pwehng nahmwarkiho me ohroj ma wiawi.
32 Nahmwarkiho pangindo nah papahu pwehng: ‘Koawoa papah naunahmen! Ngoahi mahkoahng koawoa oamw pwaipwanid ohroj oang ngoahi, pwa koawoa poakmahk ipoai;
33 A da koawoa ke johpwa mahkoahngki pwilihoammwo, doahroar oai ne mahkoahng koawoa.’
34 Doari nahmwarkiho inenin lioas, doari ih peiddoang papahu nehn kalpwuhj pwa ih en loklok oaroh ngehd ih en dupukla ah pwaipwanid ohroj.”
35 Doar Jesus pwa, “Ioar joangwa ma Joamoaiho nehnloannge pirin wiahng kamwai, ma emen emen kamwai johpwa mahkoahng riah jang nehn ah mohngiong.”