22
Sikesikin Kamdipwin Koapwoapwoaud.
1 Jesus pel pwuroahng doadoahkki karajraj nehn a sikesik oang armajjok, Ih pwa,
2 “Wein nehnloannge doahroar nahmwarki men ma koaunopda kamdipwin koapwoapwoaud oau oang nah jermweinno.
3 Ih kadarla nah liduhwok pwa en pakairkihoang irai ma oaloa lukko en indoa; a irai johpwa nimen pwili sowoahda.
4 Doari, ih pel kadarla epwi lidu en pwehng irai, ‘Kamdippwe ne onopda, uduken kahu pwulopwul kan ne kojkojdi. Me ohroj ne onopda. Irai en ken indoa!’
5 A Iraihok ma luk wiawihoang johpwa soahk, a pwen wihwiahr pein irai doadoahk, emen inla nehn ah mwoaswel, emen nehn ah stohwa.
6 Epwi koldi nah jounpakairrok koalkoa, apel kojukdi irai.
7 Doari, nahmwarkiho inenin lioasla. Ih kadarla nah jounpeihok en kojukdi iraihok ma kojukdi nah jounpakairrok apel okojda arai kahnihmmwok.
8 Ih pel pwehng nah liduhwok, ‘Kamdipwin koapwoapwoaudde ne onopda, a irai ma luk wiawihoang joah warroang pwili.
9 Apkas inla nehn al kan lukehdo ohroj ma kamwai kapangda.’
10 Doar liduhwok ukdo ohroj ma irai suhwoang, armaj mwehu apel armaj nauna doahr oauwoar, kamdippwo ken dirkihla armaj.
11 “A anjoauwo ma nahmwarkiho indoahng suhwoang armajjok, ih kapangda woal men ma joah mine nehn likkoauwin koapwoapwoaud.
12 ‘Oai pirien, imdoahr oamw dildo nehn ummwe johpwa likkoauki likkoauwin koapwoapwoaud?’ A woallo johpwa japoang.
13 Doari, nahmwarkiho pwehng irai ma jeujeuweje ih, ‘Piroahdi poah apel ehn kamwai kerpwihla ih likin wija rosso, wijahu ma joang apel keikeikeisakai.’ ”
14 A Jesus koarjoahla karajrajjo pwa, “Dir armaj oaloa lukko, a epwihoar pilpilda.”
Daksis oang Caesar
15 Pharisee‑ok suhpene pwa irai en koajoanehdi doahr irai en lidipihdi Jesus ki mehk ma Ih pwa, pwa irai en kak kadpoahki Ih.
16 Irai kadarlahng Ih epwi nihrai sohnpadahkkok pwilihki epwi nihn Herod sohn doadoahkkok, en idoak oang Ih peidek oauwe: “Jounpadahk, kamai kidal pwa Koawoa armaj mehlel men. Koawoa padahkki kupwur en Koahs oang armaj johpwa kaspoahki da wiawihoang Koawoa. Koawoa johkin lipilpilki armaj.
17 Apkas pwehng kamai da Oamw lamlam oang me: Pwen pwung en dupuk daksis oang Caesar in Rome ke joah?”
18 A Jesus pwen kidal arai lamlam nauna, Ih pwa, “Mwalaun kamwai! Amwda kamwai ke jongjong in lidipihdi Ngoahi?
19 Kajalehng Ngoahi oau mwani silperren ma kamwai kin dupukki daksis!”
Irai wahdohng Ih mwani silper oau,
20 a Ih idoakkoang irai, “Mijen apel oadoan inje me pohn sende?”
21 “Caesar,” irai japoang.
“Doar ioar,” Jesus pwa, “Dupukkoang Caesar dahkij ma ah. A dupukkoang Koahs dahkij ma Ah.”
22 Nehn irai rongda me, irai pwuriamweikihla, irai ken japahlpijoang.
Peidek Doahroar Iejda Jang Mehdi
23 Rehnnohr Sadducee‑pwi indoa ipen Jesus (Ioar irai joangoan armajkoa ma kin sikoa pwa armaj mehdi kan jehpirin iejda). Irai pwa armaj jehpirin iejda jang mehdi.
24 Irai pwehng Jesus, “Maing Jounpadahk, Moses pwa, ma woal men mehdi a joh nah jeri, riah woal pirin wud painkihla liho pwa en wiahda kadaudokoan woal mehdiho.
25 Doari, riari oau kin minmine ipasai, woal ijimen. Minnohr koalik pwoapwoaudla oaroh mehdi jang pahioahu a joh nihra jeri. A in doahroar siahk oauwe riah woal pel painkihla liohdiho.
26 Joanngohr pel wiawihoang karoahmenno, apel kajilmenno. Allaluhdi oaroh lel min kaijimenno.
27 A oh mwuhr lihwa mehdi.
28 Doari nehn rehnno ma armaj mehdi kan pirin iejda, inje in min ijimenno ma ioar pirin pahien liho, nehn irai ohroj ne painkihda ih.”
29 Jesus ken japoang irai, “Kamwai inenin japwung, kijehn amwai johkin woahwoahki Puk Joarwi apel manman in Koahs.
30 Anjoauwo ma mehdihok iejda, irai pirin doahrla sohnloang in nehnloannge, jehpirin pwoapwoaud.
31 A oang in irair oauwe, kamwai johkin wadek dahkij Koahs pwehng kamwai? Ih pwa,
32 ‘Ngoahi ioar Koahs in Abraham, Koahs in Isaac, apel Koahs in Jacob.’ Ih ioar Koahs in armaj mour, jaudi armaj mehdi.”
33 Nehn en pokonno rong Ih, irai ken pwuriamweikihla Ah padahk.
Kojonned ma Keiou Kajampwal
34 Nehn en Pharisee‑ok rongda pwa Jesus ne kasukihdi en Sadducee‑ok ahr peidekkok, irai ken pokonpene.
35 Emen in irai, jounpadahk in Kojonneddo nimen lidipihki Jesus peidek oau,
36 “Jounpadahk,” ih idoak, “ia kojonned wa ma keiou kajampwal nehn Kojonneddok?”
37 A Jesus japoangki, “ ‘Koawoa en ipwilki Koaunno oamw Koahs ki oamw mohngiong ohroj, ngenimwen ohroj, apel oamw lamlam ohroj.’
38 Me ioar kojonned wa ma keiou koalik apel kajampwal.
39 A kariau in kajampwal ma pel doahroar me: ‘Ipwilki mihn ipoamw doahroar oamw ipwilki pein koawoa.’
40 Kojonned in Moses kan ohroj apel padahk in joukohp kan ohroj poahjoanda pohn kojonned riau pwiai.”
Peidekki doahr Messiah?
41 Nehn en Pharisee‑ok pokonpene; Jesus idoak oang irai,
42 “Ia amwai lamlam oang Messiah? Kijehn kadaudokin inje Ih?”
Irai japoang, “Ih kijehn kadaudokin David.”
43 Jesus pel idoak, “Amwda Ngenin Koahs ke audohkihda David pwa Ih en panginki ‘Oai Koaun.’
44 ‘Koaunno pwehng Oai Koaun:
Koawoa en mwindi oang in loap moaun in Ngoahi,
Oaroh Ngoahi kihdihoang oamw imwinsihsi kan pehn pwoalkoamwen kan.’
45 Ma David panginki ih ‘Koaun,’ imdoahr ih en kak wia kadaudokin David?”
46 Johpwa emen kak japoangki Jesus mehkij; Jang rehnno inla, johla emen nimen idoakkoang Ih mehkij.