26
Koajoandihn Kojkojdihn Jesus
1 Anjoauwo ma Jesus ne kadoarihla Ah padahk doahr mehpwiai ohroj, Ih ken pwehng Nah sohnpadahkkok,
2 “Mwerin rehn riau, doahroar amwai kin kidal, Joarwihn Passover pirin wiawi, a arai pirin pangla Nihn‑Armaj pwa en kalohpwuhla.”
3 Jamwrou laplappok apel koaunnok pokon pene in umwen Jamwrou laplap Caiaphas;
4 irai koajoanehdi pwa irai en joalihdi Jesus in joah janjal irai kojukdi Ih.
5 Irai pwahpene nehn pwungarai, “Kisai joah wia nehn anjoau in joarwi laplap oauwe, pwa armaj kan en joah mwoarongkihda.”
Jesus Keidi nehn Bethany
6 Nehn en Jesus minmine Bethany nehn umwen woal lepa men ma adanki Simon,
7 lihmen indoa Ipoa wahdo lehn wai wai kajampwal oau ma inenin koalik dupkoa. Liho widekihdi oang pohn moangoan Jesus.
8 Nehn en sohnpadahkkok kapang me irai lioasla pwahpwahpwa, “Mihnda lehn wai oauwe wiamwahlla?” irai idoak.
9 “Lehn wai wai oauwe kak noasla koalihkkoalik dupkoa, kak kihekkoang min paijuwed kan!”
10 Jesus kidal da irai pwahpwahpwa, Ih ken pwehng irai, “Da kamwai diroapwkihdahki lihmene? Siahk mwehu oau ih wiahng Ngoahi.
11 Min joamwoahmwoahk pirin pwen mine ipamwai anjoau ohroj, a Ngoahi joah.
12 Pwa nehn ah widekihoang lehi pohioa, ih koaunopda palwoaroaioa oang Oai pirin joajjoardi.
13 Ngoahi pwehng kamwai in mehlel, wija kij ma padahk in Rongmwehu wiawi nehn jampah, dahkij ih wia pel pirin lohkjili pwa en kasmanda lihmene.”
Judas Pwungki en Pangla Jesus
14 Doar emen irai eijek roahmenno — ma adanki Judas Iscariot — inla ipen koaun in jamwrou laplappok,
15 idoak iparai, “Da kamwai pirin kioang ngoahi ma ngoahi panngoang Jesus kamwai?” Doar irai wadekla mwani silper jilihjek kioang ih.
16 Jang anjoauwo inla Judas kapkapang anjoau mwehu ih en panngoang irai Jesus.
Jesus Pwili nah Sohnpadahkkok Kamdipwin Passover
17 Rehn keiou in Joarwihn Pilahwa Joah Doal Ihs, sohnpadahkkok indoa idoak oang Jesus, “Ia wija koawoa nimen kamain koaunopdahng koawoa kamdipw in Passover?”
18 Ih japoang, “Alwe nehn kahnihmmwen ipen woal men pwehng ih, ‘Jounpadahkko pwa: Oai anjoau ne lel. Ngoahi pwilihki noai sohnpadahkkok pirin kasman Passover nehn umwoammwe.’ ”
19 Sohnpadahkkok wiahda da Jesus pwehng ara, ara ken koaunopda kamdipwin Passover.
20 Injoausik pene Jesus mwindihoang in sehpillo pwilihki nah sohnpadahk eijek roahmenno mwinge.
21 Nehn irai mwingmwinge, Ih pwa, “Ngoahi pwehng kamwai in mehlel, emen in kamwai pirin pangla Ngoahi.”
22 Irai inenin pahsoaula sapda wad emen iddidoak oang ih, “Maing, inje me? Ngoahi me?”
23 Jesus japoang, “Inje ma pwili Ngoahi kaduhdi kanah pilahwahu nehn pileisse pirin pangla Ngoahi.
24 Nihn‑Armaj pirin mehdi doahr ah ne insingdi nehn Puk Joarwi. A inenin naunahng ih ma pangla Nihn‑Armaj! Mwehu oang oar ma armaj meno joah noaisikdi.”
25 A Judas, ma pirin pangla Ih, pwehng Ih, “Mehlel jaudi ngoahi, Jounpadahk?”
Jesus japoang, “Eh, ioar koawoa ma ne pwahda.”
En Koaunno Kamdipwin Koamwurmwur
26 Nehn irai pwen mwingmwinge, Jesus pwoakda pilahwahu, kapkapki, sipwangpijoang, kioang Nah sohnpadahkkok, pwehng irai, “Oaloa, kang, me ioar udukoaihoa.”
27 Doar ih pel oaloa mwoakko, kapkapki, pel kioang irai, pwehng irai, “Nim jang loaloa, kamwai ohroj.
28 Pwa insahihoa me, insahn inoauwo ma pirin widekdi pwa en lapwadda dipen armaj.
29 Kamwai en kidal pwa jang me inla Ngoahi johla pirin nim wain oaroh ngehd Ngoahi en pwili kamwai nim wain kapw nehn en Joamoaiho Ah Wei.”
30 Doari, arai ken koaulkihla koaul pas irai ken inla pohn Dolin Olip.
Jesus Kohpda en Peter pirin Kahmahmkihla Ih
31 Doari Jesus pwehng irai, “Pwongoauwehr kamwai ohroj pirin kerpwihla Ngoahi apel kaujjang Ngoahi; pwa Puk Joarwi pwa ‘Ngoahi pirin kojukdi Jiloapoahu, a pwihnin jihppwok pirin kaupijoang.’
32 A mwerin Ngoahi en iejda, Ngoahi pirin inla Galilee mwohn kamwai.”
33 Peter japoang, “Mihndahr ma ohroj kerpwihla koawoa, ngoahi johpwa pirin.”
34 Jesus pwehng Peter, “Ngoahi pwehng koawoa in mehlel, mwohn joang jummwa, koawoa pirin kahmahmki Ngoahi pehn jiluh pwa koawoa jehjoa Ngoahi.”
35 A Peter japoang “Maing, ngoahi johpwa pirin kahmahmki koawoa, mihnda ma ngoahi pwili Koawoa mehdi.”
Ohroj sohnpadahkkok pel pwa me.
Jesus Kapkap nehn Mwoaswel Gethsemane
36 Doar Jesus pwili Nah sohnpadahkkok inla wijahkij adanki Gethsemane, a Ih pwehng irai, “Mwindi me a Ngoahi en inla o Ngoahi kapkap.”
37 Ih ukda Peter apel nihn Zebedee woal roahmenno pwili Ih, a Ih sapda pahsoau pel injinjuwed.
38 Doar Ih pwehng irai, “Nehn kapehdihoa inenin soausoau apel dirkihla injinjuwed, doahrma pwen pirin kojukdi Ngoahi. Kamwai jowi Ngoahi me apel pwili Ngoahi poahd.”
39 Ih ken aluhla pel ekij dohla Ih kipdi mijoa lel pwirej Ih kapkap, “Joamoai, ma kak, kihjang Ngoahi mwoakin loklok oauwe. A jaudi Injenoai, a Oamw koajoandi en pwoaida.”
40 Doar Ih pwurla ipen Nah sohnpadahkkok kapangda pwa irai moair. Ih pwehng, “Peter, imdoahr? Kamwai johkak pwili Ngoahi poahd awa oau oar?
41 Mwajahn pel kapkap pwa koawoa en joah lohdi oang kajongjong. Ngen nimen a palwar jasihkei.”
42 Ih pel inla kariau pel kapkap, “Joamoai, ma johkak mwoak oauwe en liklikjang Ngoahi ioarroar Ngoahi en pwen nimla, Kupwuroamwen en wiawi.”
43 Nehn Ah japahldo, Ih pel pwuroahng kapang irai moair, irai johkak poahdpijoang ki arai nimen moair.
44 Ih pel injang irai pwurla kapkap kajilpak, pwuroahng pwahpwahpwa mehwahr.
45 Doar Ih pel pwurlahng sohnpadahkkok pwehng irai, “Kamwai pwen moairroar koamkoammoal? Kapang, awahwa ne leldo, Nihn‑Armaj ne pirin pangpangla ipen armaj dipan kan.
46 Pwohrda, kisai inla! Woalwa ma pirin pangla Ngoahi ne indoa.”
Jesus Joaldi
47 Nehn Ah pwahpwahpwa me, Judas, emen in eijek roahmenno, leldo pwilihki pwihn oau wijik kodlaij apel suhkoa mihn pokpok. Jamwrou Laplappok apel epwi koaun in armajjok ioar kadardo irai.
48 Judas ne kioang irai kilel oau: “Kamwai nen kidal inje kamwain koldi jang in oai en inla rahnmwahuwi ih kioang ih kis.”
49 Doar Judas inenlahng oar Jesus. “Kajilel, Jounpadahk!” ih pwehng pel kioang Ih kis.
50 Jesus pwa, “Oai pirien, ken wia dahkij koawoa indoahng wia.”
Doar epwi irai jipoardi Jesus joalihdi Ih.
51 Emen in woallok ma pwili Jesus wijla kodlaij pas poaloahjang oaloap sien liduhwo nihn jamwrou laplappo.
52 “Kihdi nihmw kodlaijjen,” Jesus pwehng ih, “pwa ohroj ma pei ki kodlaij pirin mehkihdi kodlaij.
53 Koawoa johpwa woahwoahki pwa Ngoahi kak poaki Joamoaiho en kadardo sohnloang kidpwi en jeuweje kisai, Ih pirin kadardo anjoauwohr?
54 A ma Ngoahi wia, imdoahr Puk Joarwiho ma sikoa dahkij wiawi apkas en kak pwoaida?”
55 Jesus wud pwehng pwihnno, “Da Ngoahi armaj keper nauna men pwa kamwain indoa wijik mihn pei doahr kodlaij pel pwilein pok kamwain joalihdi Ngoahi? Amwda kamwai joah joalihdi Ngoahi nehn Umw Joarwiho? Ngoahi mine o padpadahk rehn ohroj.
56 A me wiawi pwa en pwoaida dahkij joukohppo pwa ma insingdi nehn Puk Joarwi.”
Anjoau kijo sohnpadahkkok ohroj kerpwihla Ih kaujjang.
Jesus Mwohn Mwoalen Koapwunngo
57 Armajjok ma joalihdi Jesus ukla Ih nehn umwen Caiaphas, jamwrou laplappo, wijahu ma jounpadahk in Kojonneddok apel koaunnok ne pokonpene.
58 A Peter pel pwilpwilihwe ekij dohlahjang, oaroh lel nehn kelin umwen Jamwrou laplappo. Ih dilla loaloa mwindi ipen jiloapoahpwi pwa ih nimen kapang imwin mehpwiai ohroj.
59 Jamwrou laplappok apel Sohn Mwoalen Koapwung ohroj engdehn oang kadiarekda kadehde likampwi oang Jesus pwa irai en kak kojukdi Ih.
60 Doari, johpwa mehkij irai diarda, apel jounkadehde dir kinehng Jesus likampwi. A jounkadehde roahmen pwokda,
61 ma pwa, “Woal mene pwa, ‘Ngoahi kak koauwehla Umw Joarwihn Koahsso pel pwuroahng kouda mwerin rehn jiluh.’ ”
62 Doar jamwrou laplappo uhda pwehng Jesus, “Da, joh oamw pajpoang oang kadip pwiai ma uhwoang koawoa?”
63 A Jesus pwen nennenlahr. Doar Jamwrou laplappo pwehng ih, “In oadoan Koahs mourro koawoa en kahukihoang kamai pwa koawoa Messiah wa ma nihn Koahs.”
64 Jesus japoang, “Koawoa ma pwa. A Ngoahi pwehng kamwai ohroj pwa jang me inla kamwai pirin kapang Nihn‑Armaj pirin mwindi loap moaunin Wija Laplap ma allaluhdo pohn koasoau kan in pehnloannge!”
65 Ki pajpoang oauwe Jamwrou laplappo ken soahrdi ah likkoauwo lioas, pwehng Ih, “Lahlahwe! Kisai johpwa anahne pel epwi jounkadehde? Kamwai ohroj ne rong Ah lahlahwe.
66 Ia amwai koajoandi?”
Irai rahuki, “Ih ne dipda. Koanoahng Ih en mehdi.”
67 Doari irai sapda andipoa mijoa apel pakiri Ih. A epwi poki Ih,
68 Kapiski Ih, “Messiah, kajawi oang kamai pwa inje ma poki koawoa.”
Peter Kahmahmki Jesus
69 Peter onnonohn nehn kelin ummwo, a emen nihn jamwrou laplappo nah lidu jerpeinnok indoa ipoa pwehng ih, “Koawoa, emen ma pwili Jesus mihn Galilee‑o.”
70 A Peter kahmahmkihla mwohrai ohroj. “Ngoahi jehjoa pwa da koawoa pwahpwahpwa,”
71 Mwerin ah diljang nehn kello, emen lidu jerpein kapangda ih pwehng iraihok ma mine wijahu, “Woalmene kin pwili Jesus mihn Nazareth.”
72 Peter pel pwuroahng kahmahmkihla, pwa, “Ngoahi kahukihla pwa ngoahi pwanah jehjoa woal menen!”
73 Mwerinno, iraihok ma uhda wijahu sohlahng ipen Peter pwehng, “Uhdahn koawoa emen irai: pwa ngoaroammwen ne kajalehda.”
74 Peter kahula, “Ngoahi pirin riahla ma ngoahi likamw — ngoahi jehjoa inje woalmenen!”
Anjoauwohr joang jummwa.
75 Anjoauwo Peter samanda en Jesus pwehng ih: “Mwohn joang jummwa, koawoa pirin kahmahmkihla Ngoahi pehn jiluh pwa koawoa jehjoa Ngoahi.” Ih ken inla jang wijahu kasoahng joangin.