6
Kioang ih ma Anahne
“Kanaihoahng kamwai en joah wia pwa amwai wihwia mwehu kan en janjal mwohn armaj pwa irai en kapang kamwai. Ma kamwai wia me, nen joh amwai pwaij jang Jamamwaiho nehnloannge.
“Doari, nehn amwai pirin kijkijoa emen ma anahne, joah kalohkihjili doahr mwalaun kan kin wia nehn jinakoke kan pel nehn al kan pwa armaj en kapnga. Ngoahi pwehng kamwai in mehlel, irai ne oaloa dupkoan irai doadoahk ohroj. A nehn amwai en kijkijoa emen ma anahne, joah mweidoahng loap jehjoa in poahmmwen en kidal da loap kidal wihwia, pwa oamw kijakij en wiawi in rir. Doar oamw Pahpa, ma kin kapang mehkan ma kin wiawi in rir, pirin dupuk koawoa.
Kapkap
“Nehn amwai kin kapkap, joah wia doahr mwalaun, pwa irai kin perenki kapkap, uhda nehn jinakoke kan apel nehn koaimw in al kan pwa armaj en kapang. Ngoahi pwehng kamwai in mehlel, irai ne oaloa dupkoaraiwa pwon. A nehn oamw en kapkap, inla nehn oamw perehu, risingdi wanihmmwo, koawoa kapkap oang oamw Pahpa, ma koawoa joh kak kapang. Doar oamw Pahpa, ma kin kapang da ma wiawi in rir, pirin dupuk koawoa.
“A nehn amwai kapkap, joah pwurur doahr armaj rosros kan, pwa irai kin lemleme pwa arai kohs kan nen rong irai pwa dir irai lallok. Joah doahroar irai pwa Joamoammwo kidal da koawoa anahne mwohn oamw poaki Ih. Doar me, ioar doahr oamw pirin kapkap:
“ ‘Jamamai nehnloannge,
oadoamwen en joarwi,
10  oamw wei en pwoaida,
injenoamw en wiawi pohn jampah doahroar nehnloannge.
11  Kihdoa rehnnoauwe kanmai mwingehn oauwoau rehn.
12  Mahkoahng kamai amai japwung kan,
doahroar amai kin mahkoahng irai kan ma wia japwung oang kamai;
13  joah kahlwahng kamai nehn jongjong,
kapisla kamai jang ipen ih ma naunahu.
[Oamw mwei ioarroar Mweiwa, ma sihkei apel ling allaluhla.
Amen.]’ *
14  “Pwa ma kamwai mahkoahng irai kan ma wia naunahng kamwai, Jamamwai nehnloannge pirin pel mahkoahng kamwai. 15  A ma kamwai johpwa mahkoahng arai japwung kan, Jamamwai nehnloannge pel jehpirin mahkoahng kamwai.
Kaijihjol
16  “Nehn amwai kin kaijihjol, kamwai joah wia mwomw doahroar mwalaunnok kin wia, pwa irai kawikla mwomwoarai en kajalehda pwa irai kaijihjol. Ngoahi pwehng kamwai in mehlel, irai ne oaloa dupkoarai. 17  A nehn oamw kaijihjol, salipla pel duhpla mijoammwen, 18  pwa en joah janjal oang armaj pwa koawoa kaijihjol, a oang oar Joamoamw, ma kisai johkak kapang, a joamoamw, ma kin kapang mehkan ma wiawi in rir, pirin dupuk koawoa.
Pai nehnloannge
19  “Joah nekidpene oang pein koawoa oamw pai kan nehn jampah, wija woahd a mer johkak koauwehla, pel jounpirap kan kak dilda pirapoahla. 20  A nekidpene oamw pai kan nehnloannge, wija woahd apel mer johkak koauwehla, apel jounpirap kan johkak dilda pirapoahla. 21  Pwa wija oamw pai kan mine, ioar mohngiongimwen pel mine.
Mihn Joaroa Palwahr
22  “Maj ioar lahm in palwahr. Ma pwoaroan mijoammwen kan mwehu, palwoaroamwen nen dirin maram. 23  A ma pwoaroan mijoammwen kan nauna, palwoaroamwen nen pel ros. Doar ma marammo nehn koawoa ros, ia woahr koalikin rossoauwe!
Koahs a Koapwoahn Jampah
24  “Joh emen kak papah koaun roahmen. Ih kakkoar lioassoang emen a ipwilki emen, ke ih nen poadidi oang emen a mwamwahlki emen. Koawoa johkak papah Koahs apel mwani.
25  “Ioar Ngoahi pwehngki kamwai, joah pwunodki amwai mour, da kamwai pirin kang ke nim; ke oang palwoaroamwaikan, da kamwai pirin likkoauki. Mour joah kajampwal jang mwinge? Ke palwahr joah kajampwal jang likkoau? 26  Kapang mahnsang in nehn woahwoa kan: irai johkin poadok ke doli ke nekid nehn wehraus kan, a Jamamwaiho nehnloannge kin kamwinge irai. Kamwai joah kajampwaljang irai? 27  Inje in kamwai jang in pwunod kak karoairoaihla ah mour awahioau?
28  “Mihnda kamwai pwunodki likkoau? Kamwai kapang kiepw in nehn japw kan, nehn irai kin koapkoapda; irai johkin doadoahk ke wiahda arai likkoau. 29  A Ngoahi pwehng kamwai pwa pel Solomon, nehn ah koapwoahpwoa johpwa kapwasda linginnoar mehpwiai. 30  Ma ioar doahr en Koahs kapwasihda mo in nehn mohj kan, ma mine rehnnoauwe a lakapw nehn oaiho, ih joah nen kapwasihda kamwai mwehu jang? Ia woahr siksikin amwai pwojon! 31  Doari, joah pwunod, pwa, ‘Da kamain kang? Ke da kamain nim? Ke da kamain kol?’ 32  Armaj rosros kan kin raprapahki mehpwiai, a jamamwaiho nehnloannge kidal pwa kamwai anahne mehpwiai. 33  Doar rapahki mijkoalkoal wein Koahs pel Ah pwung, a mehpwiak ohroj nen liklikkoang koawoa. 34  Doari, joah pwunodki lakapw, pwa lakapw kapwa pwen pwunodki pein ih. Johpwa anahne kapsahng apwal kan ma oauwoau rehn kan kin wahdo.
* 6:13 Epwi Puk Joarwi, johpwa insingdi me loaloa.