7
Kadeiki Epwi
1 “Joah kadeik armaj kan, pwa doar Koahs kadeikda kamwai.
2 Pwa Koahs nen kadeikda kamwai doahr kamwai kadeikda epwi, apel Ih nen jongki kamwai mihn jonngohr ma kamwai jongki epwi.
3 Amwda koawoa ke soahk dipoar siksik kij nehn mijen rioammwo a koawoa joah injinohki pwilein suhkoahn nehn mijoammwen?
4 Ia mwomwen oamw en kak pwehng rioammwen, ‘Menlau, mweidoahng ngoahi en kihjang dipoar siksik kij nehn pwoaroan mijoammwen,’ ma anjoauwohr pwilein suhkoahioau mine nehn pwoaroan mijoammwen?
5 Mwalaun men koawoa, keiou kihjang pwilein suhkoa nehn pwoaroan mijoammwen pwa koawoa en kak kapang mwehu, koawoa en kak kihjang dipoar siksik nehn mijen rioammwo.
6 “Joah kioang doahk mehkij ma Joarwi; pwadoar ih pwurdo koahdi kamwai; kamwai joah kerpwihla nihmwai sakai kajampwal kan oang pij kan, pwa ioarroar irai nen wia siakpijoang.”
Poaki, Rapahki, Lesles
7 “Poaki a kamwai pirin oaloa; Rapahki a kamwai pirin diar; lesles a wanihmmwo pirin risdahng kamwai.
8 Pwa inje ma poaki pirin oaloa; apel inje ma kin rapahki pirin diar; apel wanihmmwo pirin risdahng inje ma lesles.
9 Inje in kamwai ma nah jeri poaki pilahwa a ih kioang sakai?
10 Ke ma ih poaki mwumw a ih kioang sinek?
11 Ma nehn amwai nauna, kamwai kidal kioang nihmwai jerihkan kijakij mwehu, ia woahr mwehuwin kijakijjo Jamamwai nehnloannge pirin kioang irai ma poaki Ih!
12 “Wiahng epwi da ma kamwai nimen irai en wiahng kamwai, pwa me oaroahpene Kojonned apel padahk in Joukohp kan.”
Wanihmw Soahsiksik pel Wanihmw Sahlaplap
13 “Dilda nehn wanihmw Soahsiksik. Pwa wanihmmwo inlahng ehl pwen sahlaplap pel allo pwen koalik apel moangoai a armaj dir alu loaloa.
14 A wanihmmwo inlahng mour pwen soahsiksik, allo pwen apwal doar armaj jipid diarda.”
Suhkoa pas pel wehn suhkoahu
15 “Kamwai mwajahni mwehu joukohp likamw kan. Irai indoa ipamwai in mwomwen jihpw, a loaloarai doahr wolf ingkelpwi.
16 Kamwai nen kidalki arai wahrai kan. Kak armaj en doli grape jang suhkoa dokdok, ke fig jang suhkoa karak?
17 Suhkoa mwehu kihda wah mwehu, a suhkoa nauna kihda wah nauna.
18 A suhkoa mwehu pas johkak kihda wah nauna, a suhkoa nauna johkak kihda wah mwehu.
19 Suhkoa ohroj ma joah kihda wah mwehu pirin poalpoaldi kerpwihekla nehn oaiho.
20 Ioar, jang in wah kan kamwai nen kidalki joukohp likamw kan.”
Sohnpadahk Mehlel
21 “Jaudi ohroj ma panginki Ngoahi, ‘Koaun, Koaun’ pirin dilda nehn Wein nehnloannge, a araihokkoar ma kin kapwaihahda kupwuren Joamoaiho ma mine nehnloannge.
22 Rehnin kadeikko armaj dir pirin pwehng Ngoahi, ‘Koaun, Koaun, jaudi kamai ma kin wia kokohp in oadoammwen, pel in oadoammwen kamai kin kaujjang ngen jaus pel wia joangoan manman dir?’
23 A Ngoahi pirin pwehng irai, ‘Ngoahi jehjoa kamwai. Alwehjang ipoai, kamwai armaj nauna!’ ”
Sohn Kou Umw Roahmen
24 “Doari emen ma kin rong Oai Mahjan pwiai apel peikkoang, ih doahroar woal loalkoanngo ma kouda umwahu pohn sakai.
25 Wuddo mwoardi, lapakehda, enngo koaldo pohk ummwo, a ih johpwa mwoardi, pwa ih poahjoanda pohn sakai.
26 “A emen ma rong Oai Mahjan pwiai a johpwa peikkoang ih doahroar woal pweipweiho ma kouda umwahu pohn pik.
27 Wuddo mwoardi, lapakehda, enngo pohk ummwo, ummwo kipla mwoarpijoang.”
Manman en Jesus
28 Nehn en Jesus ne doari Ah Mahjan, pokonno inenin pwuriamweikihla mehlel joangoan padahk oauwo,
29 pwa manman in Ah padahk johpwa doahroar en jounpadahk in Kojonneddok arai padahk.