3
Duw nak diki baw taab kiyalik, Jisas sipwutiydid Sapat nyaam.
(Mat. 12:9-14; Luk 6:6-11)
Jisas Juw daya gaba maja wiyaar wuladik, duw nak diki baw taab bwu kiyaal, alim rad. Duw Jisasak van kavin kwadiy, aal di adi duw diki taab sipwutiydikik Sapat nyaam. Day sukwupirkuw, dikik wakir a javik. Di baw taab bwu kiyadi duwak, “Min rapikuw, may!” wakuw wadid. Di dayak bas sididiy, “Agwa jaav nyana lo wala? Sapat nyaam viyakita yawiy kwuryikwadiyan? Ay kupwarapa yawiy kwuryikwadiyan? Sugwiyaan kwurik, ay viyasipak?” Day maaj maa bwul. Jisas aw van aw van vikuw, dayak yaal giraad. Dayadiy maka apaam kabaak ridiy. Alik dayak diki mawul waril. Di adi duwak ata waad, “Mina taab akaynawur.” Kaynawurdik, diki taab viyakit tal. Parasiy wakwukuw, yabiyib Juw dayadi yitaypika duw, Yirat, dikidi bapawa maaj bwuladadiy Jisasaam viyasipak.
Jisas maaj wasapwiydil mala araam ridiy duw takwak.
7-8 Jisas dikidiy kalivadidiy duwawa a tamiy wapakuw, Galiliy araar yidiy. Duw taakw samasamadiy diki kwukib yidiy. Galiliya kidiy, Juwtiya tipa kidiywa, Yituwmiya tipa kidiywa, Jawtan apika gikim kidiywa, Taya, Saytan tipa kidiywa ata yidiy. Samasam diki yawiyik wukikuw, ata yidiy dikik. Jisas dikidiy kalivadidiy duwak wadidiy, “Gwur kwasa jabir kariyagwur tikwa kilim wunak, kidiy samasama duw taakw wunaam walibab kuwguwpa kuwguwpak-nadiy wunaam.” 10 Jisas samasama duw taakw sipwutiydidiy. Alik samasama giviyib kwurdiy duw taakw dikim walibab kuwguwpadaad diki sipaam taab takak. 11 Duw dayadiy mawulaam yidiy wudib Jisasaam vikuw, day ata vakirdiy diki manwa ata gaam sidiy, “Min God dikidi Nyan-adimin.” 12 Wakuw, Jisas dayak watipididiy, “Kaygan ada! Watikwa, ‘Min God dikidi Nyan-adimin,’ wakuw.”
Jisas duw tabatiy maan vitiy tasakwu-didiy dikidiy kalivadidiy duw tidakikik.
(Mat. 10:1-4; Luk 6:12-16)
13-14 Jisas kwasa nibwuk rilil tamiyaar wulakuw, mawulab tidiy duwak gaam sididiy yadakikik dikik. Day dikik yadaak, tabatiy maan vitiy tasakwudidiy. Di dayak ata waad, “Wun tasakwu-tuwadiygwur wunawa kwagwurkikik. Wayaki-kituwadiygwur wuna maaj kwiygwurkik. 15 “Wun gwurak ap kwiykituwa mawulaar yinadiy wudib kwurin yakigwurkik.” 16-18 Adiy tasakwudidiy duw dayadiy si kidiyka: Sayman Jisas sikiydid Pita, Sipatiy dikibir nyidiy Jamisawa Jon Jisas sikiydibir Bawanakis, maaw maaj ‘Yakalaw kitik kwakwanabir’, Adiruw, Pilip, Batalimuw, Matiyuw, Tomas, Alpiyas dikidi nyanad Jamis, Tatiyas, Sayman ap samasam tidi wariya duw. 19 Dayawa Juwtas Yiskariyat tad. Ginyir di Jisas kwiydid Jisas dikidiy mamik.
Nuwukadiy duw wadiy Jisas yawiy kwurdil Satan diki apaar wakuw.
(Mat. 12:22-32; Luk 11:14-23; 12:10)
20 Jisas wiyaar yidik, duw taakw samasam alib vagaluwdiy. Alik di dikidiy kalivadidiy duwawa kikipaat kiki maa rav. 21 Duw taakw, “Di kwam yinaad,” wadalik tikuw, alik Jisas dikidiy gwalugwa duw a jaav wukikuw, day yadiy Jisas kwurin karayik.
22 Nuwukadiy Jiruwsalimaam kwadiy God diki lo kalivadadiy duw yakuw, ata wadiy, “Biyilsipap diki mawulaam rinaad. Kidi yitaypika wudib dikik ap kwiydik, di nuwukadiy mawulaam rinadiy wudib kwurin yakidadiy.” 23 Jisas duw takwak gaam sididiy yadakikik dikik. Di ata waya maaj kitik wadidiy, “Satan di di kwurin yakinaad? Suwana. 24 Li gavman nak kapakap kajakuw, tabik tabik viyatukwiyaan tikuw, adi gavman vakirkinaad. 25 “Li gwalugw nak kapakap kajakuw, tabik tabik mawulaar viyatukwiyakuw, adi gwalugw vakirkinaad. 26 “Atawa, li Satan di di wariyakuw, di ap ti maa. Vakirkinaad. 27 “Duw nak ap tinadi duw diki wiyaar wulakuw, dikidiy niki jaav niki jaav kwurkwurik, di maa rav. Taay, adi ap tinadi duwaam yaav jikuw, dikidiy wiyaam rinadiy jaav ata kwurkidadiy. 28 “Mwiya maaj watuwadiygwurik. Li duw taakw vaal samasam yidaak, wajibayin sapis jikin samasam kwurdaak, God adiy javik yibwiy-kidadiy. 29 “Li duw nak God dikidi Mawulak wajibayin sapis jikin kwurda, God diki vaal yibwiy maa. Nabiy nabiy kip tikina.” 30 Nuwukadiy duw wadiy, “Wudib diki mawulaar yinaad,” wakuw, alik Jisas ki maaj wadil.
Jisas diki amaywa dikidiy nyamwusugw yadiy dikik.
(Mat. 12:46-50; Luk 8:19-21)
31 Jisas diki amaay dikidiy nyamwusugwawa ata yakuw, kawaam tidiy. Day maaj watakadaal dikik yadikikik dayak. 32 Duw taakw samasam kaypwusin kwurin ridaad. Day dikik ata wadiy, “Mina amaay minadiy nyamwusugwawa kawaam tinadiy. Day minaam vikir wanadiy.” 33 Jisas dayak wadidiy, “Sikalalaal wuna amaay? Sikadadiy-adiy wunadiy nyamwusugw?” 34 Di kaypwusin kwurin ridiy duw takwak aw van aw van wadidiy, “Av! Wunaki amaywa wunadiy nyamwusugw. 35 “Sikadadiy God diki yawiyik wukikuw kwurkinadiy, day wuna amaay, wunadiy jikwaraagw tikinadiy.”