102
Naŋgaŋ ta itaŋroro Merere mi iswe urlaŋana kini
Iŋgi suŋŋana ki tomtom ta pataŋana indeeŋi mi mburaana imap, tana itaŋroro Yooba be iuuli
1 O Yooba, iŋgi tiŋiizi tio ima ku.
Leŋ suŋŋana tio ti mi uulu yo.
2 Pa nio aŋbotmbot lela pataŋana biibi leleene.
Tana piŋgis motom pio pepe.
Sombe aŋtaŋroro u na,
ŋgun talŋom pio, mi loŋa mar mi uulu yo.
3 Nio iŋgi be aŋmeete ma aŋla leŋ i.
Nio kembei you ka koi ta ikam buk ma ise, mi imbiriizi ma imap.
Kuliŋ ibayou kat, mi tiroŋ ta boozomen iyoyou.
4 Nio kembei mbutmbuutu ta zoŋ ikan ma imetmeete.
Mi leleŋ pa kini kanŋana mini som.
5 Tana aŋyakyak men,
mi kuliŋ isu ma aŋkoŋkoŋ.
6 Iŋgi aŋyamaana kembei ta ituŋ tamen kat. Nio kembei man ta itababaaba sorok pa lele bilimŋana.
Beso ila ma ire kar muŋguŋana sa ta tomtom tizem ma imborene sorok, to ila ma imbotmbot pa.
7 Tana nio kembei man ta itutamenŋana imbotmbot sala ruumu uteene.
Mbeŋ na, aŋkenne kat som.
8 Zoŋ ise ma ila zoŋ isula na, koŋ koi bizin tirepilpiili yo mi tizeŋzeeŋge pio.
Mi sombe tisuŋ sosor pa tomtom sa, na tiwatwaata nio zoŋ mi tiso pu be pasaana tomtom tana kembei ta kam pio i.
9-10 Nu lelem bayou pio, mi ketem malmalŋana ku ikam kat yo.
Mi kam yo, mi piri yo lae kembei musmuuzu.
Tana you ka kokou, ta iwe koŋ kini be aŋkan,
mi aŋwinin yok raama motoŋ luluunu.
11 Iŋgi swoŋ igarau be imap, kembei ta zoŋ isula i.
Mi mburoŋ izzu kembei mbutmbuutu ta zoŋ ikan ma imelle.
12 Tamen Yooba, nu ko mbutultul se murim peeze kana ma alok.
Mi zin wal popoŋan tabe tipet pa kaimer i, nako matan iŋgalŋgal zom, mi tizuŋzuŋ pu, mi iseeŋge iseeŋge ma ila.
13 Nu ko lelem isaana pa kar Sion mi kam mbulu sa be uuli.
Pa nol tabe muŋai i mi urpe i mini, ta imar igarau kek.
14 Ŋonoono, tireege kar Sion ma borok su lene lup. Mi tipiri ruumu tirontiron mi kan koroŋŋanŋan ta boozomen ma timbot leŋaleŋa.
Tamen zin mbesooŋo ku lelen pa kar tana ilip. Tabe tire ma lelen isaana kat.
15-16 Mi Yooba kola ipamender kar Sion mini,
mi iswe itunu raama mburaana mi zaana biibi.
Tona zin karkari ta boozomen ziŋan king kizin ko tikilaala mburaana mi zaana biibi,
mi timoto i mi tilek kumbun pini.
17 Pa zin wal kini ta timbot ŋoobo na, ni irao itit zin na som. Kola ileŋ suŋŋana kizin mi iuulu zin.
18 Yooba isombe ipiyooto uraata kini popoŋana, mi iuulu zin wal kini ma timbot ambai mini, nako tibeede uraata tana ise ro.
Naso zin wal popoŋan tabe tipet pa kaimer i, tiute mi tipakuri pa.
19 Yooba imbotmbot lele kini potomŋana ta kor a, mi mataana isu. Ni imbotmbot saamba, mi irre su pizin tomtom.
20 Mi zin wal ta timbot ŋoobo la kan koi bizin naman mi tikaraŋesŋeeze na,
ni ko ileŋ tiŋiizi kizin mi itatke zin pa meeteŋana.
21-22 Tana kaimer zin karkari ziŋan zin king kizin ko timar
ma tilup zin su Yerusalem be tizuŋzuŋ pa Yooba.
Mi ko tizzoyaryaara zaana biibi,
mi tipakurkuri sala abal Sion.
23 Nio ti aŋwe kolman zen. Mi iŋgi Yooba ikoto yo mi ipun yo ma mburoŋ imap.
Ni ipemet mbotŋana tio ma swoŋ igarau kek.
24 Tana aŋso pini ma aŋso:
“O Anutu tio, tatke yo pa toono ti pepe. Pa aŋwe kolman zen!
Mi nu na, mbotŋana ku iseeŋge iseeŋge ma ila.
25 Yooba, muŋgu kat nu ur toono ma uunu imbol kat.
Mi saamba tomini, ina nomom muriini.
26-27 Tamen kaimer saamba mi toono ko tisaana kembei kawaala pasaana.
Tana nu ko lek zin ma timap ma tila len,
mi pekel zin pa saamba mi toono popoŋan.
Tamen nu na, mbotmbot men ta kembei.
Tortooru som, mi rao map na som.
28 Mi niam mbesooŋo ku na, nu ko mboro lutuyam bizin ma timbot ambai.
Mi popoŋana kizin tomini, nu ko motom pizin ma timbot ambai su kerem uunu, mi iseeŋge iseeŋge ma ila.”