103
Tapakur Merere pa kampeŋana mi muŋaiŋana kini
Mboe ki Dabit
1 Leleŋ ko imap ipakur Yooba pa kampeŋana kini.
Ŋonoono kat, leleŋ, mburoŋ, mi koroŋŋoŋ ta boozomen ko imap ipakur Anutu tio zaana.
Pa ni potomŋana! Mbulu kini ipa ndel kat.
2 Leleŋ ko imap ipakur Yooba pa kampeŋana kini.
Mi mbulu boozomen ta ni ikamam be iuulu yo na, irao motoŋ mbeleele na som.
3 Ni irekreege sanaana tio ta boozomen,
mi iurpewe mete tio ta munŋaana men.
4 Mi itatkewe yo pa meeteŋana.
Mi ikampewe yo biibi kat, mi iurur leleene pio mi imuŋaiŋai yo.
5 Ni ipomosmoozo yo pa koroŋ ambaimbaiŋan matakiŋa, tana ikam yo ma aŋbot ambai kat.
Mi ipombolmbol yo ma mburoŋ imilmiili mini kembei ta naŋgaŋ kaibiim. Tana aŋbol ma aŋbotmbot kembei ta manmboŋ.
6 Mbulu ta Yooba ikamam, ina indeŋdeeŋe men.
Zin wal ta so tomtom tikamam pataŋana pizin mi tikototo zin na, ni imendernder pizin mi iuluulu zin pa pataŋana kizin.
7 Muŋgu, ni iswe zaala kini pa Mose,
mi ikam uraata bibip ila zin Israel matan ma tire kat.
8 Yooba, ni leleene izanzaana pizin mbesooŋo kini, mi imuŋaiŋai zin mi ikampewe zin.
Ni keteene malmal karau som.
Mi itoto sua kini mbukŋana mi iurur kat leleene pa wal kini.
9 Ŋonoono, ni keteene malmal pa sanaana kiti mi iyamyaamba iti pa.
Tamen kete malmalŋana kini ko imbotmbot ma alok na som.
10 Mbulu ta takamam ŋoobo na, ni irao iŋgal kat matanda pa.
Tamen ikamam ta kembei som. Imuŋaiŋai iti, mi ipokotkot kat sanaana kiti som.
11 Muŋaiŋana ta Yooba izzwe pizin wal ta timototo i mi tileŋleŋ la kalŋaana na,
isala ta kor a, kembei saamba imbot kor kat pa toono.
12 Kere. Lele pakaana ta zoŋ izze pa i, mi pakaana ta zoŋ izulla pa i, tipargarau zin? Som. Timbot molo kat.
Mi Yooba ikamam pa sanaana kiti ta kembena. Izirziiri ma ila imbot molo kat piti.
13 Zin wal ta timototo Yooba mi tiurur lelen pini na,
ni leleene izanzaana pizin kembei ta pikin taman bizin lelen izanzaana pizin.
14 Pa ni itunu ta imbuuzu iti.
Tana mataana iŋgalŋgal ta kembei: Iti tomtom toono kanda na, ululu men.
15 Mbotŋana ta takam su toono ti na, molo som. Tombot rimen mi tamap.
Iti kembei ta manman pwoono. Sombe zoŋ ise, na ipeele. Mi so ila rorou, na imelle.
16 Mi sombe miiri iwilaala,
na itop su toono ma muriini bilim.
17-18 Tamen zin wal tau timototo Yooba mi tileŋleŋ la kalŋaana na,
ni ko iurur leleene pizin mi imuŋaiŋai zin, mi iseeŋge iseeŋge ma ila.
Mi ni ko imendernder pa popoŋana kizin mi iuluulu zin pa pataŋana kizin.
Tana zin wal tau titoto sua ta ziŋan Anutu timbuk na, mi tiurpe tutu kini mi titoto ka mbulu na,
ni ko iurur leleene pizin ma alok.
19 Yooba iur muriini peeze kana isu saamba.
Ni king biibi ta ikamam peeze pa koroŋ ta boozomen.
20 Tana niom aŋela mbolkeŋkeŋŋoyom ki Yooba, kamap ma kapakuri.
Niom aŋela ta keleŋleŋ la kalŋaana mi kototo sua kini na, kiwit uruunu!
21 Mi niom malmal koyom ki kar saamba ta kembesmbeeze pini mi kototo kat leleene na, ta kembena.
Kiwit uruunu ma isala kor!
22 Niom koroŋ ta Yooba iur yom ma karao pa toono na, kamap ma kapakuri.
Pa ni biibi tiom mi ikamam peeze piom.
Mi nio ta kembena. Leleŋ ko imap ipakur Yooba pa kampeŋana kini.