TIMOTHY-DA
I-ba Paul-gi Ahanba Chithi
Wahoudok
1 Timothy hairiba lairik asi Pakhonchatpa Paul-na mahakki tung-inba Timothy-da i-ba chithini. 1 Timothy asi chaorakna Christtana poklaba matung chahi 62-64 aduwaida iramba yai. Masi Paul-gi punsi loiramdai aduwaida oigani. Paul-ga Timothy-ga naknaba mari leirammi, mahakna Timothy-bu ichanupa haina kayarak palli (Philippians 2:22; 1 Timothy 1:2, 1:18).
Chithi asi Paul-na singlupta nattaduna misak amada i-ba chithi marigi manungda amani. Atoppa chithi ahumdudi 2 Timothy, Titus amasung Philemon-ni. 1 Timothy asi singlupta Tengban Mapu khurumbagi (2:1-15), singlupki ahal ama oibagi magunsing (3:1-13) amasung aranba tambibasinggi maramda piba cheksin wasing (1:3-11, 4:1-5, 6:2-5) hairibasing asigi maramda piba paotak kaya yaori. Timothy-bu singlupsinggi manungda luchingba ama oinaba Paul-na tambiba adu utli. Eikhoigi matam asigi lam lamda leiba singlupsingda karamna yengsin-gadage haibagi singlupki luchingbasingda kanagadaba achumba kaya ama yaori.
Yaopham Takpa
1. Paul-na Timothy-bu khurumjaduna houba (1:1-2)
2. Mahakna Timothy-da aranba tambibasinggi maramda cheksin wa haiba (1:3-11)
3. Jisu Christtagi maramda Paul-na kaya haraojaba haibadu makha tana sandokna takpa (1:12-19)
4. Mathangda mahakna singlupta Tengban Mapu khurumbagi amadi singlupki luchingba ama oibagi maramda Timothy-da paotak piba (2–3)
Timothy-da aroiba paotak piraga Paul-na mahakki chithi asi loisilli (4–6)
1
1 Eikhoigi Kanbiba Mapu Tengban Mapu Ibungo amasung eikhoigi asa oiriba Christta Jisugi yangthang matung inna Christta Jisugi pakhonchatpa oiriba Paul eihakna--
2 Thajabagi marida tasengba ichanupa oiriba Timothy-da chithi asi i-jari:
Ipa Ibungo Tengban Mapu amasung eikhoigi Mapu Ibungo Christta Jisuna thoujal, chanbiba amasung ingthaba nangonda pibiba oirasanu.
Aranba tambibasinggi maiyokta piba cheksin wa
3 Eina Macedonia chatlamdaida eina nangonda kanna haikhibagumna, nahakna Ephesus-ta makha tana leithaba adu eihakna pammi maramdi mapham aduda mi kharana aranba tambiba kaya ama tambiri makhoising adu nahakna lepnanaba yathang pigadabani.
4 Marei yetnaba khakta thok-hanba thainagi semjin sajinba warising amadi pari purigi sangkhraba mathang mathang chattharakliba parengsing aduda pukning luptanaba makhoida haiyu; madusing aduna thajabagi mapanna khangba Tengban Mapu mahakki thourang aduda kari amata mateng oide.
5 Yathang asigi pandamdi asengba thammoi, aphaba achum aran khangba pukning amasung tousinnaba yaodaba thajabadagi thorakpa nungsiba aduni.
6 Mi kharadi masising asidagi leithokkhraga, karisu kanadaba waremda onsin-khre.
7 Makhoina Tengban Mapugi wayel yathang tambiba oja amadi oining-i, adubu makhoi masana ngangliba wa adu karino haiba makhoina khangjade aduga makhoina yamna thajana ngangliba hiramsing adugi maramda khangjade.
8 Wayel Yathang haibasi magi sijinnapham adu chumna sijinnarabadi madu aphabani haiba eikhoina khang-i.
9 Wayel yathang asi achumba chatpa misinggidamakta semba natte adubu wayel yathang indaba, irang houba mi, Tengban Mapu ningdaba, pap chenba, sengdaba amadi lainingchettaba, makhoigi mama mapabu hatpasing, mihatpasing
10 nupa nupigi oiba marida lamchat naidaba, nupa masel nupi masel haktinnaba, mi phaduna mibu minai oina lallonbasing, minamba ngangba amadi lanna sakhi pibasing, amasung tambiriba achumbasing adugi onna-teinaba touba makhoi pumnamaksing adugidamak sembani haiba eikhoina khang-i.
11 Tambiriba achumbasing adu eibu sandoknaba sinnabiriba aphaba pao aduda yao-i, Aphaba Pao adudi yaipharaba matik mangalgi Tengban Mapudagi lakpani.
Tengban Mapugi thoujal-gidamak thagatchaba
12 Eibu panggal pibiriba eikhoigi Mapu Ibungo Christta Jisubu eina thagatchei, madudi Ibungo mahakki thougalgidamak mahakna eibu khandokpiduna eibu thajaba yaba oina singthabire.
13 Houkhiba matam amada eihak Ibungobu thina ngangba, ot-neiba amasung Ibungobu ikaiba piba oiramlabasu madu eina toukhiba adu khangdabadagi amadi thajaba leitribagi oiba maramna eibu Tengban Mapuna chanbiba utpire.
14 Eikhoigi Mapu Ibungogi thoujal adu eingonda marang kaina heithabire aduga Christta Jisuda leiba thajaba amasung nungsiba aduga loinana eingonda pibire.
15 Christta Jisuna pap chenbasingbu kanbinaba taibangpan asida lengbirakpani haiba wapham asi thajaba yaba amadi mapung phana lousinbada matik chabani. Pap chenbasinggi marakta eihakna khwaidagi henna pap chenbani.
16 Adum oinamak maram asigidamak haibadi pap chenbasinggi marakta khwaidagi pap chenba eingonda Tengban Mapuna chanbiba adu utpire, madu Ibungo mahakpu tungda thajagababa amadi lomba naidaba punsi phanggadaba mi pumnamakta Christta Jisuna mahakki kuina khaangheiba adu pandam oina utpinanabani.
17 Lomba naidaba Ningthou, siba naidraba, uba ngamdaba, amatta ngairaba Tengban Mapu Ibungo mangonda matam pumnamakta ikai khumnaba amasung matik mangal leiba oirasanu! Amen.
18 Eigi ichanupa Timothy, nahakki maramda Tengban Mapugi wa phongdokkhiba adugi matung inna yathang asi eina nangonda piri, madusing adu ningsingduna ningthijana lan soknou,
19 thajaba amasung amakpa leitaba achum aran khangba pukning adu chetna paiyu. Mi kharanadi makhoigi achum aran khangba pukning adu thawoidabadagi, makhoigi thajaba adu pummang manghalle.
20 Makhoidugi marakta Hymenaeus amasung Alexander-su yao-i, makhoina Tengban Mapubu thina ngangba adu toknaba eina makhoibu Satan-gi makhutta sinnare.