Ja Mark
Animirrawung ta Nungmalal
ta Ngaralk
1
1 Tukapa ta nungmalal ta ngaralk alaj Jesus Christ ja God inimalkpany. Tukapa ta ngungpanunma nuwurru.
John ja aningurtpulukpuning pu
(Matthew 3:1-12; Luke 3:1-18; John 1:19-28)
2 Wularrut mira marrik Jesus ilurrangkena, God iminy nuyu ja arrarrkpi ingurlaj Isaiah ja inininy monmon God nuyu ta wulatpiyi animirrawung tuka jurra nuyu,
“God iwanilangakaga ja arrarrkpi ja angpaningulakan nuyu.
Nukapa ja arrarrkpi iwanini monmon nuyu la angpaningulakan nuyu la pata arrarrkpi awanalyu nuyu.
3 Wakapa iwalaja wu pata arrarrkpi pata kawani tuka karrape iwanamin pu,
‘Nuwurripa kurrkulinngulina!
Warrwakapa ja God iwanaga kani tuka kunak la kutpawani orka.
Kurrungpangula angkat nuyu ta alan.’ ”
4-6 Malany ja Isaiah inininy monmon John ja aningurtpulukpuning pu. Kayirrk la God inilangakanka angpaningulakan nuyu Jesus. La John annyunmangung wu ta God nuyu ta ngaralk wu pata arrarrkpi. Yanatapa yarrangung tuka karrapey la iyarning manpurrwa iwunguliny ja camel iwiya la muj iyarning ingiri ja karrungmarluta. Yanat inilangung itpiyitpi la kakurl.
Kayirrk la John inininy monmon pu pata arrarrkpi pata awaning karrapey. La iminy pu, “Nuwurri ta arrarrkpi kutpangulingulin angkat, kurrungarutpanyi ta aliwi ta kurrungatpi la kurrungpanatpi ta God nuyu.” Kayirrk la yanat iminy pu, “Malany ta nuwurri kutpamilkpungen kutpanarra rtil God la ngapi kurrunpawinypun ta wungurlyak ta ngungpangurtpulukpun nuwurru.”
Malany muj pata ararrkpi pata awulinganka Jerusalem wakapa ta karrpin ta kunak ngaw Judea la muj pata tuwuran waka wiyu Judea awuranka amalkpany tuka karrapey wakapa awanalyu nuyu John. Pata arrarrkpi aminy nuyu ja John, “Ngarri ngarrungatpi ta aliwi.” Wakapa yanatapa aningurtpulukpuning wu tuka wumawurr ta wungurlaj Jordan.
7 Kayirrk la John iminy pu, “Nuka ja arrarrkpi kerraga ja nulawarrkurlyak mira. La ngapi marrik ngamalal la marrik ngawatping nuyu yurnu la ngertpirranyjing ja katiyarni yurnu nuyu. Ngapi ta marrik ngangurlyak mira.
8 La ngapi ngungurtpulukpun nuwurru wupaj la yanat angpaningurtpulukpun nuwurru ja Nyunyuk ja Iyarlmu.”
John aningurtpulukpung nuyu Jesus
(Matthew 3:13-17; Luke 3:21-22)
9 Malany wakapa iwaning Jesus tuka wulijap ta kunak wungurlaj Nazareth kapa Galilee. Kayirrk ja Jesus annyarutpan ta kunak nuyu la yarrangung parak walem tuka wumawurr ngaw Jordan. La tuka John aningurtpulukpuning wu pata arrarrkpi wakapa.
10 Kayirrk la ja Jesus imalkpanyka wu ilatpan parak tuka wumawurr kayirrk la John aningurtpulukpung nuyu ja Jesus. Kayirrk la yurtinyka wawurri Jesus yukeny yurrng annyayawng antajing tuka yurrng la ilatpanka ja Nyunyuk ja Iyarlmu kapin rlumpuk ilatpanka tuka yanat ilangaling.
11 Kayirrk la yalyungan God inilakajpungka kapa yurrng iminy,
“Nuyi ta ngapi kunmalkpany.
Ngapi kunmiyarma mira la ngapi ngamin marrmarr nuwu.”
Ja Satan yurtpiny ngilikilik nuyu Jesus
(Matthew 4:1-11; Luke 4:1-13)
12 Kayirrk la ja Nyunyuk ja Iyarlmu inimany parak ja Jesus tuka karrapey.
13 Malany wakapa iwaningan tuka karrapey warntatarr la ninguwu aniyarruning arntulyak 40 ta ngurrij. Malany ja yukenang pu pata weliwiyut ja ingurlaj Satan imalkpany nuyu Jesus yurtpiny ngilikilik nuyu. La ja Satan marrik inimiyarmanyi Jesus yalyunyi nuyu God. La yanat animiyarmangung iwanuken nuyu Jesus. La ja Jesus marrik animanyi nuyu ngaralk. Malany pata anpulirri pata kawarra mirlak awulangaling wakapa tuka karrapey kayirrk la God nuyu pata wingurlyakut pata kangkumaga wurluj awuranka iwayatayantung Jesus.
Jesus imurnanganiny parak kapa Galilee
(Matthew 4:12-22; Luke 4:14-15; 5:1-11)
14 Kapapa ta kunak Jerusalem iwaning ja yukenang pu ja ingurlaj Herod. Malany yanat marrik inimiyarmanyi ja John la iwumany anpulirri iwumany parak iwarlguntiny iwaning iwutikinang. Kayirrk la Jesus imurnanganiny parak kapa Galilee annyunmangung pu ta nungmalal ta wurluj ta God nuyu.
15 Kayirrk la iminy,
“Kayirrkapa la yanat God iwanamin ngarrurru ja yarakapju parang ja numalal Iwanuken ngarrurru amparrkamparrk.
Nuwurripa kurralyunyi kutpamilkpungen la kurrungpayarrun God nuyu alan.
Nuwurripa kutpamartukpun nuyu ta wurluj!”
Jesus awuniwirlung pata arrarrkpi nuyu ja awanarra rtil yanat
16 Kayirrk la Jesus yarrangung tuka nungpanpal ta wurl kapa Galilee. Malany yukeny parak awunnyayawng ngarrkarrk pata arrarrkpi mampakangung mata panampi iwumangung kiyap. Tukapa ta wenat pu ta awuyamangung. Yarakap ja iwuwarnangajpuning Simon la ja jara ja awulingan akutju ingurlaj Andrew.
17 Wakapa Jesus iminy pu, “Arta, nuwulyanat, ngawu! Ngapi kurrunmiyarma kutpanaga arrkpanarra rtil. Ngapi kurrunmiyarma kurriwanawun larr yunyi muj kurrima ja kiyap la kurriwanama rtalk kutpunpanama arrarrkpi ngartu.”
18 Wakapa awarran parak Simon la Andrew mamparutpan mata panampi la awarrangung rtil warak Jesus.
19 Kayirrk la Jesus yarrangung ajputajput warak la yanat awunnyayawng ja nuwarlkparrakan ja arrarrkpi ingurlaj Zebedee la ngarrkarrk pata yanat awunimalkpangung akutju James la John. Wenat mampumany angkat mata panampi wu nuyu iwanama kiyap
20 Kapin wularrut iminy pu pata wera, Jesus ilajantiny pu pata James la John angparutpan kirrk ta awuyamangung iwuyarrung yanat. Wakapa awuran iwarutpan ja mayakpu la pata wera pata arrarrkpi pata awuyamangung rtil tuka kapala la iwuyarrung Jesus.
Jesus innyakan nuyu ja yaliwi la innyarutpan ja arrarrkpi
(Luke 4:31-37)
21 Jesus la pata ngarrkarrk la ngarrkarrk pata wurrwurr pata awarrangung rtil wiyu nuyu awuran tuka kunak wungurlaj Capernaum. La ta Saturday warntatarr ta Jew wu ta wungurlyak ngurrij, Jesus yuran tuka Jew awaning ngarlakarlak ta akurlyak kurrumpalk wakapa inimany rtalk ininnyang monmon pu God nuyu ta ngaralk wu pata arrarrkpi.
22 Malany pata arrarrkpi awalyungan nuyu awurlkpalangkeny murnin Jesus ininnyang monmon pu manjat la aralpa ta ngaralk. La wenat angkuwurruning ta ininnyang monmon ta God nuyu ngaralk ta manjat parak. La pata Jew pata awunpukikang ta wulatpiyi marrik awunginkanyi iwulakurlanyi mira kapin tuka.
23 Kayirrk wakapa awaning ngarlakarlak, ja arrarrkpi innyatpang ja yaliwi
24 ilajantiny parak, “Ngarrunarutpanyi, Jesus nuyi ta nukpuran Nazareth. Kunuka nuyu ngarruntuntu ngarri? Kurlingka nuyi ngarrunpanawun kirrk ta ngarri ta ngarraliwi pa ngatpamaju? Ngarri kurrunpurrun! Nuyi ta God nuyu ta nukurlyak arrarrkpi!”
25 Kayirrk la Jesus inilakajpung martapapa mira ja yaliwi “Ankakujpina! Anmalkpanyiga tuka yanat.”
26 Malany ja yaliwi annyeny kirrkirrk nuyu ja arrarrkpi innyakan warntayurr. Malany iyirrurlkeny manilarraniny wakapa imalkpanyka tuka arrarrkpi la innyarutpan yuran.
27 Malany pata arrarrkpi awulangaling iwayantung wakapa awurlkpalangkeny kirrk. Kayirrk la awunpulakajpuning la wemin, “Kiki kangmin parak? Nuka ja arrarrkpi kanyunma ta wurrwurr ta yanat kannyatpi ta nuntawarrkurlyak mira! Yanat kimin pu pata Satan kawuyama nuyu pata weliwiyut ‘Kutpamalkpa tuka arrarrkpi ingijalk la kutpana’ kayirrk la kamalkpa kawarra warak.”
28 Wigarra yirrk pata arrarrkpi awuran angpunmangung pu pata wera tuka kiki iminang ja Jesus. Malany pata awaning Galilee awalyungan ta kiki iminang.
Jesus awuningulakantung wigarra yirrk pata arrarrkpi
(Matthew 8:14-17; Luke 4:38-41)
29 Kayirrk la awaningan ngarlakarlak warrwak la Jesus awuran rtil warak Simon la Andrew tuka wenat wu ta kurrampalk. La James la John awuran rtil.
30 Malany jita Simon ingawng waramumpik inymajung kuyak inyung tuka palapala. Malany pata arrarrkpi wakapa awaning rtil aminy nuyu Jesus alaj ta inyanatapa inymajung.
31 Malany Jesus innyiyarrung parak tuka inyanat innyung atimany ngaw yurnu innyimajpungkuny. Malany wakapa akutju ja kuyak innyarutpan wakapa inyngulikingan. Inymajpungkiny pa akawunyangung walij awunngawng la wemin apuwany.
32 Malany ta inyuriliny parak wurlmupurlmut wigarra yirrk pata arrarrkpi awuntumangung parak pata amajunmajung nuyu Jesus la muj pata weliwiyut awunnyatpang awuntumangung parak tuka Simon nuyu kurrampalk.
33 Wakapa wigarra akutju awaning yalayala tuka kurrampalk.
34 Malany wakapa Jesus awuningulakantung wigarra yirrk pata arrarrkpi pata iwatpang jara jara ja kuyak. La inimalkpangung igarra yirrk ja yaliwi ja iwatpang pata arrarrkpi. La pata weliwiyut iwuwurruning ja Jesus ja God inimalkpany, la yanat iminy pu, “Kutakujpina marrik kurrkinkay!”
Jesus iling iwarruj
(Luke 4:42-44)
35 Kayirrk la ta nungmatpa ngurrij Jesus imajpungkiny ta warak iyirtpirrakenangka, jita muwarn marrik inymajpungkinaga la yuran anyarutpan ta kunak yuran palat iling iwarruj.
36 Warrwak la Simon la pata wera amajpungkiny wenatapa iwuyalmangung ja Jesus.
37 Kayirrk la iwayawng la aminy nuyu, “Wigarra pata arrarrkpi kunpuyalma nuyi.”
38 Kayirrk la Jesus iminy pu, “Ngawupa, arrkpana! Ngapi ngana tuka nungmatpa kunak awk wakapa ngungpanunma wu ta nungmalal wurluj. Malany nungpakapa nguranka pa nganayama warak.”
39 Jesus yuran yarrangung juju tuka karrpin ta kunak ngaw Galilee. La wakapa yanat inininy monmon pu God nuyu ngaralk tuka awaning ngarlakarlak ta akurlyak kurrampalk. La yanat innyakangung wu ja yaliwi wigarra yirrk pata arrarrkpi.
Ja arrarrkpi innyatpang ja namurarri tuka ingiri la Jesus iningulikiny kayirrk nungmalal
(Matthew 8:1-4; Luke 5:12-16)
40 Malany ja arrarrkpi animarrajpung warak tuka Jesus. La yanat innyatpang ja namurarri tuka ingiri. Yanat innyeny kartawarrkartawarr tuka Jesus ilangaling la angkat inilakajpukpuning, “Nganngulakanti!” Kayirrk la nukapa ja arrarrkpi iminy, “Ngapi ngungpurrun ta nuyi kungmiyarmang, nuyi nganngulajanyjing ngapipa.”
41 Malany Jesus apa iniwurlkpungkuny ja arrarrkpi la iminy nuyu, “Ngapi ngungmiyarma kunpangulakan.” Kayirrk la Jesus imarreny iniwelkpung la iminy, “Nuyipa anngulikiny!”
42 La wakapa ja namurarri innyarutpan.
43-44 Kayirrk la Jesus inyarnangkatikiny iminy nuyu, “Ngapi marrik ngungmiyarmang nuyi kungunmay wu ta tukapa! La ngapi kunmiyarma nuyi anpana anpunpanuki ta nukiri pata kawuken wu pata Jewish arrarrkpi pata kawulangali mulil. Malany wenatapa kuntayan ta nuyi anngulikiny. La nuyi anpana tuka God nuyu ta nyunyuk kurrampalk la anpalangali mulil kuwawunya ja karlurri tuka Moses arrunyung murnin anngulikingan, la anpanamin nuyu God ta nungmalal mira. Malany yanatapa yarakapju ja karruningulakan. Tukapa ta ankingan mulil, pata amparrkamparr kuntayan la angkawurrun ja God iminy nuwu ta nungmalal.”
45 La ja arrarrkpi marrik imina tuka Jesus iminy nuyu. La yanatapa yuran la iminy pu amparrkamparr ja Jesus iningulikiny nungmalal. Warrwak apa pata arrarrkpi awalyungan ja arrarrkpi kayirrk la wenatapa awuranka wugarra yirrk kunak. Malany wimurra pata arrarrkpi awuranka nuyu Jesus marrik kiki imina la animarrajpuni warak palat tuka kunak makiny la yuran tuka karrapey. La pata arrarrkpi angkat awarrangungka wugarra yirrk kunak la amalkpany nuyu.