20
Sebago te king aiyaba elaluainu yai
1 Te sogo te bidi dwai me deli te Israel dabe tomode bidali, aga nogi Seba. Aga te Bikrigo ogwa, tama aga te Benjamingo hani bidi. Sebago te biugel bu weyu, te i olama, te tama po wali, “Te Devit tagalao, da te agai hani menio. Da te Jesigo ogwago hani bidi menio. Dago aga wali me pelamuo. Ae, te da Israel bidi tigidali, dena buluba ma pelainao,” po wai.
2 Tialima, te Israel dabego te tama po odolama, tama tigidaligo te Devit tagalama, tama Seba dali palio. Tiali goli, te Juda bidi dabe da, te Devit dologode bidiyu, tama augwa aga wali pabo bage bidibo dąį te Jordan wę sunumi tedu pelama, te Jerusalemba usu nama elaluai.
3 Augwali te Jerusalemba sabolama, tama Devit aga te king bidibo beba pelama, tama te si wali nogo si we hani, te aga kingo be tonalumainu taga pali we dabe sali. Tama agai augwali te gasa beba munama, tama augwali tonaluabo bidi meba nigilali. Tama agai te bidi hani mebago augwali tonalu, te augwali nai mayu yabo bidi dabe meba nigilali, tiali goli agai te polobadu yali tiwai gilama te aga augwali dali ma pagelama pigi pabeo. Tama sesemane sogo augwa te bede naga bidaludubadi, te augwa isibo sogoba usu nani. Te we dabe augwali wilawe we dabe bidalubo tiwai yai.
4 Nosali kingo Amasabolo te tama po wai, “Nage pelama, te Juda bidi dabe i olama, tama augwali sisinama, tama do ma duba dage tigidali aselama, enaba sabolao,” wai.
5 Tialima, Amasa pelama, augwali i wagi pali, tiali goli agai te kingo bodolu mani sogo edelama, me asobeo.
6 Amasa te polo ma asisąbaso, tama kingo Abisaiba te tama po wai, “Apsalomgo te daba genuai sęgę mawai, tiali goli megi Seba, te Bikrigo ogwago, te genuai sęgę dabolo ma manio. Tama tibaso, nago eno ami bidi dabe selama, tama aga pobegi pelama, tama aga pageabi igi pao. Tiyu, Seba te aga hani dabe dali pelama, te bomai obo bagulai tomoba pelama, bidigi pai madi, tama dago aga sainu ebo usu egobeo,” wali.
7 Tama tialima, Abisaigo te Joapgo ami bidi dabe selama, tama te king tonalubo ami bidi me sali, te augwali Keret me Pelet dabe, tama te tigidali hwįbo bomai bidi me, tama augwa te Jerusalem tagalama, tama pelama, te Seba pobegi pai.
8 Augwali te Gibeon moni masigi elalubo teba sabolali, tama Amasa te augwali dali deliba gesabidi ununani. Joapgo te hwįbo nai munasa pai, tama agai te aga kukulude te bainat hwą ge gedelai. Te bainat te aga bulalubo be tomode bulaluai, tiali goli Joap te Amasa pąba pabo sogode, te bainat te tǫba dialuali.
9 Tama Joapgo te tama po Amasa dali wali, “Siade da, ama, nage bugagia bidibawe?” Tama aga Amasago penane nisi te dolo nogogo tola selama, tama agai te aga dali nono nainogo ebo tiwai gilama yalio.
10 Tama Joapgo te bainat hwą me deli te pobase nogode tolaluali, tiali goli Amasago te bainat hwą subeo. Tama Joapgo Amasago haligade te hwągo enama, tama agai haliga tigidali dįąsa soyu, te tǫba tulaluama, tama polo tama aga isai. Tama tibaso, Joapgo te hwągo aga ma enebeo. Joapgo te Amasa ela munama da, teda aga dali, te aga ama Abisai, augwali sigo te Seba pobeasa palio.
11 Tama te Joapgo ami bidi me deli te Amasago tigi pąde dolalu, te i weyu, te tama po wali, “Te Joap me Devit godolo homu ebo bidi dabego, te augwali Joap wali piąo,” walio.
12 Tiali goli, te kanemego Amasa tigidali mu halua sali, tama te tigi te sunumi tomode munaluali. Tama te tigidali ami asela wali, augwaligo te tigi sulama, tama augwali ma pabeo. Te Joapgo ami bidigo te augwali me soasiąbaso, teda agai te tigi te sunumi sesegeba kekasa pelama, tama te tigi te ugwago mesegelalio.
13 Te Amasago tigi te sunumide ma munalusiąbaso, tama te tigidali ami bidi te Joap wali pelama, tama te Seba pobeasa palio.
14 Seba pelama, te tigidali Israel dabego tǫ pelama, te siminigi pali te tǫ sesegeba mu sabolama, tama aga te hanu Abel Betmaka teba sabolali. Tama te Beri hani tigidali te aga dali muna selama, tama aga wali peyu, te hanu tomoba palio.
15 Te Joapgo ami bidi dabego odali, te Seba te hanu tomode bidibo po odai, tama tialima augwali aselama, te hanu bobegelali obo pąde te tǫ pesage holama, te augwa te hanude hwįainogo yalio. Tama augwaligo te obo pąde te dedage dogali, te masigi obo degasa dulumainu yai.
16 Tiali goli, te wiegi yai homu yai we me deli te hanude bidai, tama agai te Joapgo haniba te i weyu te tama po wali, “Ae! Dagego odiąo! Te Joap asa po walao. Eno agade po elalubao.”
17 Tialima, Joap te pąba pelama, tama te wego agaba hanalu wali, “Nage te Joap dawe?”
Tama Joapgo te po wai, “Awe, te ena tama dao.”
Tama wego agabolo te po walali, “Genuai bidio, eno po me deli elalubao. Tama eno homugo nago eno te poba bugagia olo mumainu homu ebao.”
Tialima, Joapgo te po wai, “Te usu dao. Eno nago po odaibao.”
18 Tama wego Joapba te tama po wai, “Polobadu augwaligo te tama po wai, ‘Te nago homude po me elalubaso da, nage te hanu Abelba pao,’ wai. Augwa te dena bulu Abelba aselama, tama te Abel dabego augwa te homu sęgę elalubo dodoliyu yai dao.
19 Odao. Te dago hanu te Israel bulu tǫ pedaide te polalubo hanu me deli dao. Dago te hwįbo sę dabe me isiąwai. Dago te dena king naga mu wali peyu ebao. Tiali goli, megi nago te hanu dolainu ebao. Magi baso nago te Genuai Bidigo nai te dolainu ebawe?” wali.
20 Tama Joapgo te po wai, “Eno te hanu doliyu, te silabo homu me elalubeo.
21 Mu menio. Dago te bidi me deli naga sagasu asali, aga nogi te Seba, te Bikrigo ogwa. Aga te Efraimgo pesage te bulu dude bidi dao. Te bidigo te bidi dabego homu hodolobaso, te king Devit aiyaba elaluainu yai. Dago homugo dagego te bidi Seba naga daba mobaso tama, teda dago te dagego hanu tagalama, paibao,” Joapgo te po wai.
Tama te wego Joapbolo te tama po wai, “Mu tama obao, dago te bidi ela munama, tama agai tobolu naga te obo buluba sąbo, te nago sueibao,” wali.
22 Tama tialima, te we te hanude bidibo bidi dabeba pelama, tama agai homude sela pali po te augwaliba pusali. Augwaligo te agai po wali pelama, tama augwaligo te Sebago tobolu mage togogi pelama, tama aga tobolu selama, tama Joapba te tobolu buluba dinani. Tialima, Joapgo te biugel bu obaso, tama aga ami dabe te hanu taga soyu, tama augwa buluba ma palio. Tama Joap te king Devit bidibo madi, te Jerusalemba ma pai.
Te Devitgo ofisa dabe
23 Joap te ami dabego polalubo ofisa bidi, tama te Israel bulu tǫde tigidali ami tonalubo bidi dao. Tama Benaia, te Jehoiadago ogwago, te king tonalubo ami bidi dabe tonalubo bidi bidai, te augwali Kelet me Pelet dabe dao.
24 Tama te kingo te bidi mebabolo te agai sę yao po wabo sogo da, teda Adoniramgo te hani bidi dabe tonalu yai. Tama Jehosafat, te Ahilutgo ogwa, aga te king Devitgo ebo sę tigidali po te asębo bidi bidali.
25 Tama Seva aga te kingo kuskus sę ebo bidi bidai. Tama Sadok me Abiatar te pris sę ebo bidi si bidai,
26 tama Jair hani bidi Ira, aga me te Devitgo pris bidi bidai dao.