21
Te Gibeon dabego te Solgo dwai sę yali wei ponani
1 Te Devit king bidali sogo, te nasi ebo sogo me deli pedelama, tama te Israel dabe me, Juda me, te nai sǫą pelama, te nai sili bididubadi, te kibu be sela bidai. Tama tibaso, Devitgo Genuai Bidiba te tebo sę ebo page hanalu wali, tama Genuai Bidigo agaba te po wai, “Te sę ebo page te tama telalubao. King Solgo te Gibeon dabe ela muani, tama te dwai sę yali page te aga hanide elalubao,” wai.
2 Tialima, Devitgo te Gibeon dabe i olama, asali. Te Gibeon dabe augwali te Israel we bidi menio. Augwali te Amor hani bage da. Te gasa Amor dabe te hagawai, tama te dwasianu hani naga bidai. Polobadu mu te Israel dabego te bomai po mu dąų weyu, te Gibeon dabe augwaligo me dologobeo po wai. Tiali goli, king Solgo bomo eyu, te Israel de Juda si naga te Israel tǫde bidimainu yai. Tama tiyu, Solgo te Gibeon dabe silimainu tiai dao.
3 Megi da, te Gibeon dabego Devit suagasobaso, tama agai augwaliba te tama po wai, “Eno homugo dago dageba te dwai sę yali dodolainu ebao, tama dagego te Genuai Bidiba hanaluama, te aga we bidi hani dabolo wiegi yai sę emainu yao. Dagego homugo eno magi sęgo te dwai sę yali dodolumainu homu ebawe?” Devitgo te Gibeon bage te po hanalu wali.
4 Tama te Gibeon dabego Devitba po wei ponoyu, te tama po wai, “Te sęgę te da dali, te Solgo hani sibi dali tomode elalubo sęgę, te sia somainu ebaso, te usu me egobeo, te nago dabolo te gol me silva mawainu ebaso, te tagalao. Tama me, dago nageba hanalu, te gasa Israel bidi dabe ela muao po me obaso, me te usu egobeo.”
Tama Devitgo te po wai, “Tama dagego homugo te eno magi sę dageba emainu homu ebawe?”
5 Tama augwaligo kingba po wei ponoyu, te po wai, “Solgo te da dolama, tama da tigidali silimainu homu yali, te da hani me deli te Israelgo tǫde me bididali homu yai dao.
6 Tama tibaso, dago homugo te nago dabolo te Solgo hani sibigo bidi te a naga olama, me si, te tama bidi dabolo momainu homu ebao. Tama dago augwali te bulu Gibeaba sela paibao, magi baso meni, Gibea te Solgo page bulu dao, te king te Genuai Bidigo nigilali. Tama te God Genuai Bidigo gedude te dago augwali te niba walama, tama augwali isimainu yaibao,” te Gibeon bagego te po wai.
Tama Devitgo augwaliba te tama po wai, “Tialima, te eno augwali dageba mawaibao,” wai.
7 Te Genuai Bidigo nogide, Devitgo te Solgo ogwa Jonatan dali te bomai po dąų wali, tama megi da, agai te dąų wali bomai po te homu kone ma palali. Tama tiyu, agai te Mefiboset sabeo, te Jonatango ogwa, tama te Solgo wąį, tama te Gibeon dabeba mabeo. Menio.
8 Agai te Armoni, me gasa Mefiboset, te si sali. Augwali si te Sol de Rispa sigo ogwa, te Aiago wegi dao. Rispa aga te Solgo si wali we hanide te we me deli da. Tama Devitgo te Merapgo ogwa a naga me sali, te Solgo wegigo wai. Merap te bidi Adrielgo sai, te Barsilaigo ogwa te Mehola bulu bidigo selama, tama augwali sigo te a naga ogomani ame nai.
9 Devitgo te bidi dabe te Gibeon dabeba menama, tama te Gibeon dabego augwali sela holiyu, te bulu duba holama, tama te Genuai Bidigo gedude augwaligo te a naga olama, me si, te tama bidi dali te niba walama, tama tigidali isalio. Te sę pedelali, te bali gi nedu du sabo sogo sisi elalubadi, tiali tama te bidi dabe augwa te rais bali wai sabo gagalalio.
10 Tialima, Rispa, te isali bidi sigo ida, aga te poloba badi ugwa meba selama, tama te bulu duba ugwa holali. Tama aga te sela holali badi ugwa dabego te dwasianu ugwa be tiwai gana te masigi tǫ bulude kekelama sę yani. Tama aga te bidi dabego tigi tonaludubadi, te polua meba bidali, te tulubage te tǫba ma tulubo sogo, te nogo a naga, me badu si, te tama bidigo tigi dili te tulubagego telamainu ebo sogoba usu numainu tonalualio. Rispago te bidi dabego tigi te giligade me hulide te bugagia tonaluai, tiyu te ba dabego me te bulu hasa dabego augwali tigi tuagasidali weyu, tama tiai dao.
11 Nosali Devitgo te Rispa, te Aiago wegigo yali sę po odama,
12 tama Devit te Jabes bidi dabego hanu te Gileat tǫ pedaiba pelama, te Sol de Jonatan sigo tigi dili dabe sigi pali, te Solgo ogwa dao. Polobadu te Filistia dabego te Sol me Jonatan si te Gilboa bulu dude elama, tama augwali sigo tigi selama, te deliba sisinibo hanu te Betsanba waligi pali. Tama nosali te Jabes dabe te Betsan hanuba pelama, tama augwali sigo tigi wi selama, tolasa soai dao.
13 Tialima, megi da, Devitgo te po aga sę bidi dabeba olama, tama augwaligo te Sol de Jonatan sigo dili dabe sela palio. Tama augwaligo te a naga olama, me si, te Gibeon dabego elali bidi dabego dili dabe me sisinama, salio.
14 Tama augwali te Benjamin hanigo tǫ te hanu Selaba pelama, tama augwaligo te Solgo dili me, Jonatango dili dali, te Solgo aya Kis muani gų pagede pubulali. Augwaligo te kingo wali po gilama, te tigidali sę ela silai. Tama te elama nosali badu, te Godiba gedu haluasa po wabo bidi dabego te augwa bulu tǫ pedai bugagia ilabo gedu haluasa po wali, tama Godigo augwaligo te gedu haluasa po wabo odai.
Te Israel dabego te Filistia moni moni bidi dabe dali hwįani
(1 Sto 20:4-8)
15 Te Filistia dabe de Israel dabe si tomode te hwįbo ma hodolali, tama Devit te aga ami bidi dabe dali aiyaba dulama, tama te Filistia dabe dali hwįani. Augwali te boi hwį hwį pelama, tama Devit te bomo kimi meni baso, tama ma hwįabo ąǫ ebeo.
16 Tama te Filistia bidi me deli, aga nogi te Isbibenop, agai te Devit ela muainu yali. Isbibenop te moni moni bidi dabede te bidi me deli aga da. Te agai ene tobolu bobage, augwaligo te brasgo nigai, tama te brasgo sęgę te sela olama, me badu pedai, te tri hap kilogram usu tama. Tama Isbibenopgo te gesi bainat me te kukulude gedelai elaluai.
17 Tiali goli, Abisai, te Devitgo abe Seruiago ogwago, te Filistia bidi sulama, tama aga aselama, te Devit tau sagasali. Tama Abisaigo te Filistia bidi dali hwįnama, tama aga ela muai. Tama te Devitgo ami bidi dabe aselama, tama Devitba bomai po weyu, te tama po wai, “Te dago boi hwįgi pabo sogo, nage da dali munu me aselamuo,” wali. “Nage te da Israelba te ula mabo lam sole tiwai elalubao, tama nago te lam sole ula sula sawainu me elamuo,” te po wai.
18 Nosali te Israel dabego te Filistia dabe dali ma hwįani. Te sogo augwali te bulu Gopde hwįani. Tama Israel bidi me deli, aga nogi Sibekai, te Husa bulu bidi, agai te moni moni bidi dabede te bidi me deli ela muani, aga nogi te Saf dao.
19 Tama gasa sogo ma, te Israel dabego te Filistia dabe dali te bulu Gopde hwįani. Tama Elhanan, te Jareoregim te Betlehem bulu bidigo ogwago te Get hanu bidi Goliat ela muani. Te Goliatgo enego bobobage te ugwa hobolo masin ba te genuai tiwai dao.
20 Tama nosali ma, te Get hanude gasa boi hwįbo ma hodolali. Tama te moni moni genuai bidi dabego te bidi me deli bidali, tama aga te dili bobage bidi mu tama. Te aga nogo dani deli delide te nogo a naga, me badu nogo kibisa deli tama elaluai, tama aga sągą dabe me te tiwai naga elaluali. Aga nogo sągą dani te bidi sese deli olama, me si me si elaluai.
21 Te bidigo te dwai posobo po Israel dabeba wali, tama te Jonatan, te Samago ogwa, te Devitgo amago, te aga ela muai.
22 Te me si me si te Filistia dabe augwa te Get hanu moni moni genuai hani bidi dabe tedu asali. Tiali goli, Devit dali, te aga ami dabego dali, te augwali ela muanio.