7
रोम सर्करता लळयमुडा साय्बाना विस्वस
(मत्याल 8:5-13)
1 येसु लोकुरिन वेहतना मतव पूरा पोल्लोन वेहतापया कापेर्नाग़ मल्स अतोग़.
2 अद नाटेनगा ओर्वोग़ दुस्रा जाततोग़ लळयमुडा साय्बाल मतोग़. ओना साकुर केवाल ओर्वोग़ ओर्युलतोग़ मतोग़. वेग़ साय्बाल ओन पका जीवा कींदोग़. उंद दिया बाताल आता इतेके, ओग़ ओर्युलतोग़ दुक अरसि डोलनाह आस मतोग़.
3 अस्के ओग़ साय्बाल येसुना लोप्पा केंजतोग़, केंजतस्के उय्तुर यहुदिपेदल्कना संगे, “येसु नावा लोन वासि नावा साकुर केवान सव्रे कीयेग़,” इनजोर ओनगा कबुर लोहतोग़.
4 ओर येसुनगा वासि, गोंडगोंड आसि इद्रम अर्जि कीतोर इतेके, “ओग़ लळयमुडा साय्बान साय्ता कीम, ओग़ बेसतोग़ मन्कल आंदोग़.
5 मावा यहुदिरिन जीवा कीस्तोग़. ओग़े मावा जाततोरेनाह्क पार्तनाता लोन वने पंडटोग़. अदिनेनाह्क ओना ओर्युलतोन सव्रे कीसीम गूरु,” इनजोर इतोर.
6 इतस्के येसु ओरा संगे दायलाह पेसतोग़. अनेक-अनेक ओना लोन एरे-एरे एवनेके, ओग़ साय्बाल तना गोततोरिन येसुनगा इद्रम कबुर लोहतोग़: “ए गूरु, निमा तिपल आयमा! निमा नावा लोनलोप्पा वायना इनजि नना लायक इलेन.
7-8 ओसो नना नियगा वायना इचोन वने लायक इलेन. ननावने ओर्विना कय इळ्न मनजि कबळ केवानन आंदन, नावा कय इळ्न वने उय्तुर सीपय्क मन्ह्तोर. नना बोनाय ‘अन!’ इनजोर वेहतेके ओग़ दास्तोग़, दुस्रोन ‘वाय!’ इनजोर केयतेके ओग़ वास्तोग़. अहे नावा साकुर केवानु ‘इद कीम, रा!’ इनजोर वेहतेके अद कबळतुन ओग़ कीस्तोग़े. इद्रमे इद रोगमता पोग़ोन वने नीवा अदिकर मन्ह्ता, अदिनेनाह्क निमा मात्रम अग्डाहे उंद पोल्लो वळ्ह्कतिन इतेके नावा ओर्युलतोग़ सव्रेम आयनोग़,” इनजोर कबुर लोहतोग़.
9 इद पोल्लोतुन केंजिसि येसु पकाय बामतोग़. अस्के पेग़्के मिळ्न्दिस तना पयाह वावालोर मुडुन इतोग़, “इके केंजाट, नना वेहतह्नन, इचोटा बेरा विस्वस नाकु मावा इस्रयेलतोर यहुदि जाततोरगा बोनगान बह दिसो!” इनजोर इतोग़.
10 पया साय्बाना गोततोर लोन मल्स अतोर, अस्के ओग़ ओर्युलतोग़ पूराय सव्रेम आतदिन ऊळतोर.
रांडे आंचाना डोलतोग़ पेकान येसु तेग़्किह कीस्तोग़
11 पया येसु नायिन इनदनद नाग़ अतोग़. ओना संगे ओनाङ कग़यवालोर ओसो वेल्लाटोरे लोकुर वने अतोर.
12 येसु अद नाटेनगा ओळियनद अग़दगा एरे एव्स मतोग़. अचोटेने नाटेनोर ओर्वोग़ हातोना सेत्तातुन गति कीयलाह कांजिस ओसोर मतोर. वेग़ हातोग़ लेयोग़ मन्कल तना तलोग़ रांडे आंचाना वग़ोग़े मग़ि मतोग़. नाटेनोर वेल्लाटोर ताना संगे अनजोर मतोर.
13 अद आंचान ऊळिसि येसुसामिह्क पका मान वसता. वसताह्कु तानु, “निमा अळमा बायि!” इनजोर इतोग़.
14 इतापया अनजि सेत्ताता डोह्लातुन बोयतोग़, बोयतस्के कांजिस ओयवालोर अगान रोमतोर. अस्के येसु हातोन इतोग़, “पेका! तेदा!”
15 इतस्के ओग़ हातोग़ मन्कल जीवा अरसि, वळ्ह्क बोटटोग़. पया येसु ओग़ मन्कन तलिनगा ओस ईतोग़.
16 अस्के अगा ऊळतोर सबेटोर पका रेयतोर. रेयिस इद्रम इतोर, “देवुळि तना मन्कलोरिन तोळ ईयलाहि वाता रा! तना कबुरतोग़ पका बेरोग़ मन्कन मयगा लोहता,” इनजोर देवुळतुन जोहर कीतोर.
17 पया येसुना इद पोल्लो पूरा यहुदिरा बूमते ओसो ताना सर्ने मनदनव नाह्कने आबुर आता.
एग़ मीहवाल योहन तनाङ कग़यवालोरिन येसुनगा लोहतह्तोग़
(मत्याल 11:2-6)
18-19 आबुर आतस्के एग़ मीहवाल योहननाङ कग़यवालोर इव पूरा केंजतव पोल्लोन जेलतगा अनजि योहनिह्क वेहतोर. वेहतस्के ओग़ इर्वुर कग़यवालोरिन केयिसि, ओरिन येसुसामिनगा इद्रम ताल्ह्कलाह लोहतोग़ इतेके, “बोग़ देवुळ लोहवाल पिसिह केवाल राजाल वावाल मतोग़, ओग़ बह निमानेया? बार माटु दुस्रोना अग़ ऊळकोमा?” इनजोर येसुनगा लोहतोग़.
20 वेर कग़यवालोर येसुनगा वासि इद्रम इतोर, “गूरु, देवुळता पेदिरते एग़ मीहवाल योहन, ‘बोग़ देवुळ लोहवाल पिसिह केवाल राजाल वावाल मतोग़, ओग़ बह निमानेया? बार माटु दुस्रोना अग़ ऊळकोमा?’ इनजोर माक नियगा ताल्ह्कलाह लोहतोग़,” इनजोर इतोर.
21 इतस्के येसु अगा मतोर वेल्लाटोर दुकतोरिन सव्रे कीतोग़, मुर्तिय तेद पुनवोरिन, देयह्क पोस मतोरिन सव्रे कीतोग़, ओसो वेल्लाटोर तोववोरिन तोवनाह कीतोग़.
22 अह कीसि ओरिन इतोग़, “इंजेके मीट बाताङ केंजतिर, ऊळतिर, अविस्किन मल्स अनजि योहनिह्क वेहाट: नाक देवुळ ईतद लावते गुडिर तोवयलाह आतोर, कूटालोर ताकलाह आतोर, मोंडरोगमतोर सव्रेम आस्तोर, एव्डालोर वेंदलाह आतोर, हातोर बार तेग़्किह्तोर, गरिबतोरिह्क बेसता कबुर केंजलाह दोर्किह्ता.
23 इव सबेटविन ऊळिसि, नना देवुळ लोहतोग़ पिसिह केवानन आंदन इनजि बोर उन्क-मन्क आयोर, ओर देय्वातोरु,” इनजोर वेहतोग़.
येसु योहनना लोप्पा लोकुरिन वेहतह्तोग़
(मत्याल 11:7-19)
24 योहननाङ कग़यवालोर अग्डाहि पेसिस अतोर. अस्के येसु मुडोरा संगे योहनना लोप्पा वेहता बोटटोग़, “पेळ्ह्कल बूमते मीटु योहननाङ केंजलाह अतिर, अस्के बेद्रमता मन्कन ऊळलाह अनजि? वळ्यते ऊङनद काग़रोंडालेह्का तना पोल्लोतुन मिळ्हच-मिळ्हच वेहवान ऊळलाह अनजिया?
25 बार रेसेम गेंदेङ उहतोग़ मन्कन ऊळलाह अनजिया? केंजाटु, रेसेम गेंदेङ उहतोर मन्कलोर सबे रीतता मालसोम मनवालोर पेळ्ह्कल बूमतगा मनोर, ओर राजमिदेनगा मन्ह्तोर.
26 मति मीट बाताल ऊळलाह अन्ज मतिर, वेहाट? देवुळता कबुरतोन ऊळलाह, आयोया? मीक नना वेहतह्नन, मुनेतोर देवुळता कबुरतोरा सेवातुह्क वीळिस योहनना सेवा मता, अद्रमतोने मीट ऊळलाह अनजि.
27 ओनाय लोप्पा देवुळि मुने नाकु इद्रम वेहच मता,
‘ऊळा, नना नावा कबुरतोन नीवा मुने लोहतह्नन,
निमा लोकुरा जीवातगा वायना इनजि नीवा अग़दुन ओग़ तीर्ह्कनोग़.’
इनजोर देवुळता सास्त्रमते रासतद मन्ह्ता.
28 इह केंजाट, नना मीकु वेहतह्नन, देवुळताङ पाळ्नाङ अडोने ताकवालोरगा, देवुळता पेदिरते एग़ मीहवाल योहनिह्काय वीळिस बोग़े बेरोग़ पुटोग़ आसि. मतिंगा बोराङ जीवानगा देवुळ राजेम कीस्ता, ओरग्डाहि सबेटोरिह्क उड्लोग़ वने योहनिह्काय बेरोग़,” इनजोर वेहतोग़.
29 (अगा मतोर वेल्लाटोर येसु वेहतद पोल्लोतुन केंजतोर. केंजिसि देवुळता अग़ि सेतेमता अग़ि इतोर, लोकुर कोंटे केवालोरु सिद्वा एनवालोर इंका अहे इतोर. वेर सबेटोरिन योहन मुनेन देवुळता पेदिरते एग़ मीहच मतोग़.
30 मति परुसिर ओसो सास्त्रमगूरुर बार योहन देवुळता पेदिरते एग़ मीहतह्पा मीवालेवा, देवुळि तम्क तोहतद अग़दे ताकोर.)
31-32 ओसो वन येसु इद्रम इतोग़, “मीट योहननाङ केंजवोरिर, नावाङ इंका केंजवोरिर, मीट बातोरिर इनदना, इके केंजाट. बोर पेकोर बजरतगा कग़्सलाह उदिसि, तमाङ गोतयालोरिन केयसोर ओर इन्ह्तोर,
‘मीक इनजोर माट हामुर रेगाताङ पाटाङ ओतोम,
तेला मति मीट अलो देवन इनजोरे, अळसोरे अर्युल पायविर.
पया माटु तुर्स्कने गिर्दाते पाटाता रेगा ऊरतोम
तेला मति मीट एंदविर.’
33 “अद्रमलेह्काने एग़ मीहवाल योहन पापेन तिंदोग़, अंगुर जोमा उनोग़, अदिह्क इसि, ‘ओनगा देयम मन्ह्ता,’ इद्रम मीट ओन इह्निर.
34 मति माने-मन्कना नडुम पुटटोनन बेस तिनजोर-उनजोर वाताह्क इसि, ‘ओन ऊळाट, ओग़ उळ्बे, ओचे, सिद्वा एनवालोरा, पाप्यहलोरा गोतयाल!’ इद्रम मीट नाक इह्निर. बाजरते मनवालोर वेर गळ्स पेकोरालेह्काने, योहन अह मताह्कु वने मीक अरवोये, नना इह मताह्क वने मीक अरवोये.
35 मति बोर देवुळता बुदते ताकिह्तोर, ओराङ कबस्क सेतेम दिसनुङ. अदिह्क योहनना अहे नावा लोप्पा सेतेमताङ विचर्क कीम्ह्टु,” इनजोर इतोग़.
उंद आंचाना पापमतुन येसु मापि कीस्तोग़
36 पया उंद दिया सिमोन इनवाल परुसि मन्कल येसुन तना लोन जावा उनडलाह केयतोग़. अस्के येसु ओना लोन अनजि जावा उनडलाह उदतोग़.
37 अचोटेने बह आता इतेके, अद नाटे ओर्वोग़ परुसिना लोतगा येसु जावा उनडलाह वातोग़, इनजोर उंद सिंड्रि आंचाह्क एर्का आता. अस्के अदु उंद बंडा-तीसाते अतर्नेय पोस अगा वाता.
38 वासि येसुना पेग़्के ओनाङ काल्कनगा उदिसि, अळसोरे तनाङ कनिर्कने येसुनाङ काल्किन नाहता. नाहचि तनाङ केल्कने ओनाङ काल्किन उम्चिंदु. पया ओनाङ काल्किन लोंडसोरे अद अतर्नेयदुन ओनाङ काल्कनगा वळन्दु.
39 येसुन केयिस मतोग़ परुसि, अद आंचाळ अद्रम कीतदिन ऊळिसि, तन-तनाय इद्रम विचर कीतोग़, “इद इतेके सिंड्रि आंचाळि! वेग़ मन्कल निटम देवुळता कबुरतोग़ मतेके, तन्क बोयनद आंचाळ बेद्रमता इनजोर पुनेग़, पुनजि इद्रम कळ्वोग़ आयोग़ आवेग़,” इद्रम विचर कीतोग़.
40 अस्के येसु ओना पोटालोप्पाडा विचरतुन पुनजि ओन इतोग़, “ए सिमोन, नीक उंद पोल्लो ताल्ह्किह्नन,” इतस्के ओग़ इतोग़, “बाताल पोल्लो गूरु?”
41 अस्के येसु इद पीटो वेहतोग़: “ओर्वोग़ साव्करनग्डाहि इर्वुर मन्कलोर करा तेंडिस मतोर. ओर्वोग़ एयुङ नूह्क वेंडटाङ बंडिङ, ओसो दुस्रोग़ बार पनास वेंडटाङ बंडिङ.
42 मति ओर इर्वुर आसि कोताङ मल्हच ईया पग़वोर, पग़वाह्कु वेग़ मन्कल ओर इर्वुरास करातुन मापि कीसीतोग़. अले! इंजेके ओर इर्वुरग्डाहि बोग़ मन्कल करा ईस मतोन पका जीवा कीयनोग़, वेहा?” इनजोर ताल्ह्कतोग़.
43 अस्के सिमोन इतोग़, “बोना वेल्ला करा मापि आता, ओग़े पका जीवा कीयनोग़ बहे,” इतोग़. इतस्के येसु ओन “निमा बराबर वेहतिन,” इतोग़.
44 ओसो येसु अद आंचानके मिळ्न्दिसि सिमोनिन इतोग़. “सिमोन! इद आंचान ऊळा. नीवाय लोन नना तिंदलाह वातन, मति नावाङ काल्क नोग़यलाह एग़ तता वेहविन, इद बार तनाङ कनिर्कने नावाङ काल्किन नाहचि, केल्कने उम्चता.
45 निमा इतेक नाक लोंडिस मनजि जोहर केविन, इद बार नना लोप्पा ओळियतस्केडाह नावाङ काल्किन लोंडसोर मन्ह्ता.
46 नावा तलातगा नेय ओकिस नाक मान एविन, इद बार नावाङ काल्कनगा वेल्ला दाराता अतर्नेय ओकता.
47 अदिनेनाह्क नना नीक वेहतह्नन, इद आंचाना वेल्ला पापमता मापि आताह्कु, इद पका जीवा कीस्ता. मति बोना उचुने पापमता मापि आस्ता, ओग़ उचुने जीवा कीस्तोग़,” इनजोर वेहतोग़.
48 पया येसु तान इतोग़, “नीवा पापि कबस्कना मापि कीसीतन.”
49 इतस्के ओना संगे जावा उनडलाह उदिस मतोरु, “वेग़ बेद्रमतोग़ मन्कल, देवुळतन इतपे पापमतुन मापि कीस्तोग़!” इनजोर बोनाङ ओग़े विचर कींदुर.
50 पया येसु अद आंचान इतोग़, “नाक विस्वस कीताह्के देवुळि नीक पापमताहि पिसिह कीता, गिर्दाते अन,” इतोग़.