8
येसुनाङ कग़यवालोरगा आस्कु
1 पया येसु सबे नाह्कने देवुळि मन्कलोरा जीवातगा राजेम कीयनद बेसता कबुरतुन पोकुर कीसोर तिरियलाह बोटटोग़. ओना संगे ओनाङ बळयिर बारा मुलु मंदुर.
2 ओसो उचुक आस्क वने ओरा संगे मंदुङ, अविस्कनग्डाहि मुने रोगह्किन, देयह्किन येसु पूंडिस मतोग़. उंदि मग्डला नाटेना मरिया पेदिरता आंचाळ अगा मता, येसु तानग्डाहि एळुङ देयह्किन पेसिह कीस मतोग़.
3 दुस्रा आंचाळि इतेके योहना पेदिरतदु, अद कुजा इनवाल एरोद राजाना लोतुन ऊळेवळे केवाना मुते इविस्कनगा मता. ओसो उंद सूसना पेदिरतद मता. इद्रम वेल्लाङे आस्क मताङ. इव आस्कु, तमाङ कोताङ येसुना सेवातुह्क कर्सा कींदुङ.
विजा वीतना पीटो
(मत्याल 13:2-15; मार्कल 4:1-12)
4 अद्रमलेह्काने उंद दिया येसुनगा नाह्क-नाह्कनाहि लोकुर वासोरे मंदुर, वासि वेल्ला मुलु अगा जमा आसोर मतोर. अस्के येसु ओरिन उंद पुन्पिह कीयनद पीटो इद्रम वेहतोग़.
5 “उंद दिया ओर्वोग़ मन्कल विजा वीतलाह पेसतोग़. ओग़ वीतनेके उडुन विजा अग़दगा अरता, अदिनु अग़दुह्क अनवालोर ओय्ह्कतोर, ओसो पिटेङ वासि कतम तिताङ.
6 उडुन विजा आद बंडाना जागाते अरता, आदतगा पोग़ोन बर्बर तोळ्यो मताह्कु मोन्ह्टटा. मति एद तेग़तस्के पदन लेवाह्कु, पोर्ह्काङ वाग़िस डोलताङ.
7 उडुन विजा कोये-जपिना जागाते अरता. पया कोये-जपिङ वने पोर्ह्काना संगे बेर्सिसि, पोर्ह्कान हव्कताङ, बेर्स एवोङ.
8 उडुन विजा इसि राब जागाते अरता. अरताह्कु अद उंद-उंद मोदुदुह्क नूटुह्कायि (100) एक्वा पंटा वाता,” इनजोर येसु वेहतोग़. इव पोल्लोङ वेहचि येसु जोरते केयिस इद्रम इतोग़, “मियग्डाहि बोरिह्क पुनदलाह गिर्दा मन्ह्ता, ओर नावा पोल्लोतुन बेस केंजाटु!” इतोग़.
9 पया येसुनाङ कग़यवालोर ओनगा वासि ताल्ह्कतोर, “इद पुन्पिह कीयनद पीटोता बाताल अर्तम आस्ता गूरु?” इतोर.
10 येसु ओरिन इतोग़, “मीक इतेके देवुळि तना राजेमताङ मकतव पोल्लोन पुनदलाह बुद ईता, दुस्रोरिह्क बार इव मकतव पोल्लोन नना पुन्पिह कीयनव पीटोने वेहतह्नन. इतेके:
‘ओर नावाङ कबस्किन ऊळलाह कोनि ऊळसोर मनदनुर,
मति अविस्कना अर्तम ओरिह्क बेस्केन तेळियो आयग़ा,
ओसो लोकुर नावाङ केंजलाह कोनि केंजसोर मनदनुर,
मति ओरिह्क बेस्केन तेळियो आयग़ा.’
विजा वीतना पीटोता अर्तम
(मत्याल 13:18-23; मार्कल 4:13-20)
11 “इद पुन्पिह कीयनद पीटोता अर्तम इद्रम मन्ह्ता. अद विजा इतेके देवुळता पोल्लो आंदु.
12 विजा अरतद अग़ि इहलेह्का आस्ता. देवुळता पोल्लोतुन बोराय केंजिह्तोर, अस्के ओर विस्वस कीसि, देवुळ ईयनद पिसमुळतुन दोर्किह केमाकिर इनजोर, ओरा जीवातगा वीततद विजातुन देयह्कना मुक्याल वासि माग़्ङनाह कीस्ता.
13 बेद आदतगा विजा अरता, अद इहलेह्का आस्ता. बोर पोल्लोतुन गिर्दाते चट्नेन केंजिह्तोर, मति अद पोल्लो ओरा जीवाते गडवाह्कु गळ्के बहे विस्वस कीस्तोर. पया देवुळता पोल्लोतुन नमतेनाह्क अड्सनाय, तिपलाय वाता इतेके चट्नेन ओर विस्वसताह जेक आस्तोर.
14 कोये-जपिनगा अरतद विजाता जागा इहलेह्का आंदु. बोर पोल्लोतुन केंजिह्तोर, मति मनेक-मनेके सम्सरमताङ आल्सुळ्क, अनम-दनमता उळ्बे, इद दुनियाता गिर्दाता लालुस, इवु देवुळता पोल्लोतुन ओरा जीवातगा बेर्स एवोङ, पया अद पोल्लो बातय पाय्दाता आयो.
15 मति राब जागा इहलेह्का आंदु. बोर आपुना जीवातगा बेस-नेह्ना सेतेम बुदते पोल्लोतुन केंजिसि तासिह्तोर. पया ओर आरेम आयवालेवा देवुळतुह्क विचर वातव कबस्क कीसोर दास्तोर,” इनजोर वेहतोग़.
देवुळता पोल्लो वेह्च ईस्ता
(मार्कल 4:21-25)
16 ओरिन ओसो येसु वेहतोग़, “बोग़ाय कंदिल निर्विह कीसि डूटलोप्पा मुळ्हच तासनोग़ा? इलवेके कटुल इळ्न तासनोग़ा? आयो, मति लोप्पा ओळियवालोरिह्क वेह्च दिसि इनजोर तान बोव्लापोग़ोन तासिह्तोग़.
17 अद्रमे सबे मकिह कीतव पोल्लोङ पङम्ने आयनुङ, इद्रमता वेला वायग़ा.
18 अदिनेनाह्क देवुळता पोल्लोतुन बेस केंजाटु, बाराह्क इतेके, बोनगा पुनदनद बुद मन्ह्ता, ओन्कु देवुळि ओसो इंका ईयग़ा. मति बोनगा पुनदनद बुद इले, ओनगा बेचोन बुद दिसिह्ता, तान वने देवुळि ऊंदिस ओयग़ा,” इनजोर वेहतोग़.
येसुना निटम जीवातोर बोरु?
(मत्याल 12:46-50; मार्कल 3:31-35)
19 पया अस्केन येसुना तलोग़ि, ओनाङ तमोर ओनगा कलियलाह वातोर. मति वेल्लामुल सर्ने मताह्कु ओना एरे दाया पग़वोर.
20 अदिनेनाह्क बोरो येसुन वेहतोर, “गूरु, नीवा यायालि, नीवा तमोर नीक कलियलाहि पलते केपतोर,” इतोर.
21 इतस्के येसु ओरिन इतोग़, “केंजाटु, देवुळता पोल्लोतुन केंजिसि अहलेह्का ताकवालोरे, नावा यायालि, नावाङ तमोर आंदुर,” इतोग़.
येसु दूंदतुन रोमिह कीस्तोग़
(मत्याल 8:23-27; मार्कल 4:35-41)
22 पया उंद दिया इद्रम आता इतेके, येसु तनाङ कग़यवालोरा संगे गालिल सम्दुरते उंद ओडातगा तग़्ङतोग़. तग़्ङिसि ओरिन “अलेट! सम्दुरता अबर दडटके दाकल,” इतोग़. इतस्के ओर दायलाह पेसतोर.
23 ओर अनेक-अनेके येसु उंजतोग़. अस्के सम्दुरतगा बेरा दूंदि वाता. वासि बेराङ-बेराङ लच्काने ओरा ओडातगा एग़ निंदलाह आता. अस्के ओर पका तिपलते अरतोर.
24 पया कग़यवालोर येसुनगा वासि, ओन तेहतोर. तेहचि इतोर “ए गूरु, तेदा! माट मुळ्न्दिह्नल,” इनजोर केयतोर. केयतस्के पया येसु तेदतोग़. तेदिसि दूंदतुन ओसो एताङ लच्काङ वायनविन दगाङ ईतोग़. अस्के तोप्नेन दूंद-मुर्गम मायता ओसो लच्काङ वने मेर्क्ने आताङ.
25 पया येसु कग़यवालोरिन इतोग़, “नना मीकु पिसिह कीकन इनजोर नावा पोग़ोन विस्वस केविरा?” इतोग़. मति ओर पका रेयिसि, तमा-तमाय, “अलाले! वळ्दुन, एतुन उकुम ईस्तोग़, अव रेंड आसि वेना पोल्लोतुन केंजिह्ताङ अयो, इतेके वेग़ बेद्रमतोग़ मन्कल मंदनोग़ रा!” इनजोर ओर बामतोर.
येसु देयह्क पोयतोग़ मन्कन सव्रे कीस्तोग़
(मत्याल 8:28-34; मार्कल 5:1-20)
26 पया ओर गालिल पटटाहि सम्दुरतुन वेंडिसि गिरासेनिर इनवालोर दुस्रा जाततोरा एरियातगा एवतोर.
27 येसु तनाङ कग़यवालोर बार ओडाताहि रेगताहे देयह्क पोयतोग़ गिरासा सहरतोग़ ओर्वोग़ मन्कल ओरगा वातोग़. ओग़ वेल्लाङे दियानाहि गेंदेङ केग़वा कूळलिय मंदोग़, ओसो लोन वने मनवा, डोलतोरिन पोहतनाङ पांजानगा मंदोग़.
28-29 अद देयमि ओग़ मन्कन ऊक-ऊके पोयन्दु. इद्रम पोयतस्के लोकुर ओनाङ कय्किन-काल्किन गोल्स्कने दोहचि पह्रा मंदुर. मति ओग़ ऊक-ऊके गोल्स्किन देहन्दोग़, अस्के देयम ओन बोरे लेवा जागातेके पोस वितिंदु. पया येसु, अद देयमतुन ओनग्डाहि पेसिस दायलाह उकुम ईतोग़, अस्के ओग़ येसुना कालगडेम अरसि “एय सबेट्क बेरा देवुळता मग़ि येसुनिन, निमा नाक बार्किया अडम आय्ह्निन? नना नीक अर्जि कीय्ह्नन नाकु सिक्सा एमा,” इनजोर जोरते केयतोग़.
30 येसु ओन, “नीवा पेदिर बाताल?” इनजोर ताल्ह्कतोग़. ताल्ह्कतस्के ओन वेल्लाङे देयह्क पोस मताह्कु “वेल्लाटोरोम” इतोग़.
31 पया अव देयह्कु, येसुन इद्रम अर्जि कींदुङ इतेके, “माक देयमदीपता सिक्सा-बोंदातगा दायलाह उकुम एमा.
32 ओद ऊळा, अगा मेटातगा वेल्लाङे गोह्ड पदिङ मेयसोर मन्ह्ताङ. माक अव पदिनगा लोहचीम,” इनजोर येसुन इताङ. अस्के अविस्किन येसु पदिनगा दायलाह ईतोग़.
33 ईताहे देयह्क चट्नेन ओग़ मन्कनग्डाह पेसिस पदिना गोह्डटगा तुर्म्ने नेङताङ. अस्के गोह्ड पदिङ अद मेटा ओळ्सिये मुटेङ-मुळ्गेङ आसोर वितिस सम्दुरता एतगा अरसि कतमे मुळ्न्दिस डोलताङ.
34 पया पदिङ मेहवालोर इद्रम आतदिन ऊळिसि रेयिस विततोर. वितिसि इद पोल्लोतुन गिरासा सहरतगा ओसो एरे-गूरेताङ नाह्कनगा अनजि वेहतोर.
35 वेहतस्के बाताल-बाताल आता, तान ऊळलाहि अग्डा लोकुर येसुनगा वातोर. वासि देयह्क पेसिस विततोग़ मन्कल येसुनाङ काल्कनगा उदिस मतद ऊळतोर. ओसो ओग़ बेस गेंदेङ केग़सि, बेस बुदते मतोग़. इदिन ऊळिसि नाटेनोर येसुन रेयतोर.
36 अगा येसु कीतद कबळतुन ऊळतोर मन्कलोर ओग़ बेद्रम बेस आतोग़, अद कतमे लोकुरिह्क वेहतोर.
37 अस्के गिरासेनिरा एरियातोर सबेटोर पका रेयिसि, “निमा मयगा मनमा, इग्डाहि पेसिस अन,” इनजोर येसुन अर्जि कीतोर. अदिनेनाह्क येसु तनाङ कग़यवालोर बार पेसिस दायलाह ओडातगा उदतोर.
38 येसु अग्डाहि दायह्पा देयह्क पेसिस विततोग़ मन्कल, “नाक नीवा संगे वायलाह ईम, गूरु!” इनजोर अर्जि कीतोग़. मति येसु ओन इद्रम इनजोर मल्हच लोहतोग़ इतेके,
39 “आयो निमा मल्स अन! देवुळि नियेनाह्क बेद्रमता कबळ कीता, तान मियग्डोरिन वेहा,” इनजोर इतोग़. इतस्के ओग़ मन्कल अग्डाहि मलसि, तनेनाह्क येसु कीतद बेरा कबळतुन, कतम सहरमेटोरिह्क पूरा वेहचोर तिरियतोग़.
डोलता पिला तेग़्किह्ता ओसो दुकता आंचाळ सव्रेम आस्ता
(मत्याल 9:18-26; मार्कल 5:21-43)
40 पया येसु सम्दुरतुन वेंडिसि गालिल पटटे मल्स वातोग़. अस्के ओग़ वायनदिन अग़ ऊळसोर मतोर सबेटोर लोकुर ओन ऊळिसि पका गिर्दा आतोर.
41 अचोटेने ओर्वोग़ यारोस पेदिरतोग़ मन्कल येसुनगा वातोग़. ओग़ अग्डा यहुदिरा पार्तना कीयनद लोता मुक्याल मतोग़. ओग़ येसुनाङ काल्क अरसि “नावा लोन दय” इनजोर अर्जि कीतोग़.
42 बाराह्क इतेके ओना बारा वय्सता मयाळि बेमरते डोललाह आस मता.
पया येसु ओग़ मुक्याना संगे अनेके मुडा लोकुर पका गर्दि आसि दोबेङ-नूकेङ कींदुर.
43 अस्के अद मुडगा उंद आंचाळ मता. अद आंचाळ बारा वर्सानाहि कुर्माते बादा आंदु. अदु तनाङ पूरा कोताङ मत एवालोरिह्क ईसि मारिह कीता, मति तान बोग़े सव्रे कीया पग़वोग़.
44 अद आंचाळ येसुन ऊळिसि ओना पयाह वाता, वासि अद पलते आस मताह्कु सिरप ओना गेंदे कोङतुन कुस्क्ने बोयता. बोयताहे ताना कुर्माता बादा मायता.
45 अस्के येसु “नाक बोग़ बोयतोग़ रा?” इनजोर ताल्ह्कतोग़. ताल्ह्कतस्के अगा मतोरु, “माट आयोम! माट आयोम!” इनजोर इतोर. पया पत्रु इतोग़, “गूरु! इद मुल नीवा सर्ने मनजि नियके दोबेङ-नूकेङ कीसोर वेल्लाटोर बोयिस मनदनुर,” इतोग़.
46 मति येसु इतोग़, “आयो बोग़ो मति सव्रेम आयनेनाह्क नाक बोयतोग़, नयग्डा सव्रे कीयनद लाव ओन बेस कीतदिन पुतन,” इतोग़.
47 अद आंचाळ पया, “नना बोयतदिन वेग़ पुतोग़,” इनजोर रेयते साङसोर वासि, येसुनाङ काल्क अरता. अरसि ओन बाराह्क बोयता ओसो बेद्रम चट्नेन सव्रेम आता, इद पोल्लोतुन सबे लोकुरा मुनेह वेहता.
48 वेहतस्के येसु तान इतोग़, “बायि! नना नीक सव्रे कीकन इनजि निमा विस्वस कीताह्के बेस आतिन, गिर्दाते अन,” इनजोर इतोग़.
49 येसु इद्रम वेहनेकेन यारोस पेदिरतोग़ मुक्याना लोताहि ओर्वोग़ मन्कल वासि इद्रम ओन वेहतोग़, “नीवा मयाळ हाता रा! इंजेके गूरु लोन वास आय बाताल पाय्दा, ओग़ मल्स अनेग़,” इतोग़.
50 अस्के येसु इदिन केंजिसि यारोसिन इतोग़, “निमा रेयमा! नावा पोग़ोन विस्वस तासा! अद पिसग़ा,” इतोग़.
51 पया येसु यारोसना लोन अतोग़, अनजि पिला मतद अराता लोप्पा बोरिने ओळिय एवा, सिरप पत्रु, योहन, याकुब ओसो हाता पिलाता तलोग़-तपे वेरिन पोसि लोप्पा ओळियतोग़.
52 सबेटोर लोकुर अद पिलातेनाह्क अळसोर-केयसोर मतोर. अस्के येसु ओरिन “अळमाटु! पिला हायो, अद निद्रतेन मन्ह्ता!” इतोग़.
53 अस्के पोहता वाता मुलु, अद पिला हाता इनजोर पुन्ज मतोर. अदिनेनाह्क येसु इतद पोल्लोतेनाह्क ओर कवतोर.
54 पया येसु अद पिलाता कयदुन पोसि, “अले पिला! तेदा!” इनजोर जोरते इतोग़.
55 इतस्के ताना जीवा मल्स वाता, अस्के अद चट्नेन तेदिस उदता. पया “तेन्क बातालाय तिनदलाह ईम्ह्ट,” इनजोर येसु वेहतोग़.
56 इदिन ऊळिसि पिलाता तलोग़-तपे पका बामतोर. मति “इद पोल्लोतुन बोन्के वेहमाटु,” इनजोर येसु ओरिन उकुम इतोग़.