33
Isirayɛlikailu bilara sila kan
1 Allabatala ka a fɔ Musa yɛ ko: «I ye wuli ka bɔ yan, i ni jama mɛn nara i bolo ka bɔ Misiran. N ka n kali Iburahima ni Isiyaka ni Yakuba yɛ ko n di jamana mɛn di ii bɔnsɔnilu ma, i ye wa ye.
2 N di n na mɛlɛka lawa ai ɲɛfɛ. N di Kanaankailu gbɛn ka ii labɔ jamana wo kɔndɔ, ka Amɔrikailu fanan gbɛn, a ni Hɛtikailu ni Peresikailu ni Hifikailu ni Jebusikailu.
3 Ai ye wuli ka wa ye. Damununta duman ye bɔla jamana wo rɔ a ɲa jɛrɛ jɛrɛ ma, li ni nɔnɔ a bɛɛ ye bɔla ye. N kɔnin ti nala wala ai fɛ, sa n kana ai halaki sila la, baa ai ye mɔɔ kun gbɛlɛnilu le ri.»
4 Mɔɔilu ka kunnagboya kuma wo mɛn tuma mɛn na, ii jusukasira. Mɔɔ si ma sɔn masidifenilu bilala a ma,
5 baa Allabatala tun ka a fɔ Musa yɛ ko: «I ye a fɔ Isirayɛlikailu yɛ ko ii ye mɔɔ kun gbɛlɛnilu le ri. Ko ni n wara ii fɛ hali waati kuru ɲin kelen kɔrɔ, n di ii halaki. Ko ii ye ii la masidifenilu bɛɛ bɔ ii ma sisen. Ko wo kɔ rɔ, ko n ka kan ka ii mira ɲa mɛn ma, n di wo latɛɛ.»
6 Isirayɛlikailu bɔ mɛn kɛni Horɛbu koyinkɛ kan, ii ka ii la masidifenilu bɔ ii ma.
Alla Kunbɛn Diya Faaninbon dɔɔmanni
7 Nba, Musa tɛrɛ ye faaninbon do tala ka wa a lɔ kɔkan, ka a yɔrɔ mataa daa makɛ diya la. A ka a fɔ wo ma ko Alla kunbɛn faaninbon. Mɔɔ mɔɔ tɛrɛ ye a fɛ ka ii la kunko yiraka Allabatala la, woilu tɛrɛ ye bɔla ka wa Alla Kunbɛn Diya Faaninbon na daa makɛ diya kɔkan.
8 Musa tun wa kɛ wala faaninbon wo la tuma tuma, mɔɔilu bɛɛ ri i wuli ka i lɔ ii jɛrɛ la faaninbon da la ka Musa watɔla ragbɛ fɔɔ a wa ban donna faaninbon na tuma mɛn na.
9 Musa wa don faaninbon kɔndɔ tuma mɛn na, sanfinnama ri jii ka a lɔ faaninbon da la. Allabatala ri kuma Musa yɛ.
10 Ni mɔɔilu ka sanfinnama wo lɔni yen faaninbon da la tuma mɛn na, ii bɛɛ ri i lɔ ii la faaninbon da la, ka ban ka i ɲakɔrɔ bɛn duu ma ka Alla bato.
11 Allabatala tun di kuma Musa yɛ ɲa ni ɲa ikomin mɔɔ ye kumala a teri yɛ ɲa mɛn ma. Wo kɔ rɔ, Musa ri a kɔsɛ daa makɛ diya. Kɔni a la dɛmɛnba Josuwe tora faaninbon kɔndɔ ye. Josuwe tɛrɛ ye kanberen de ri. A fa tɔɔ ko Nun.
Allabatala ka a fɔ ko a ri to a la jama fɛ
12 Musa ka a fɔ Allabatala yɛ ko: «A ragbɛ, ile le ka a fɔ n yɛ ko: ‹Na jama ɲin di›, kɔni i kɛtɔ mɛn lɔla n fɛ ka n dɛmɛn, i ma wo tii fɔ n yɛ. I ka a fɔ ko: ‹N ka i tɔɔ lɔn›, a ni, ‹I la ko duman n yɛ.›
13 Ni n da i la hina sɔrɔn, i sɔn i ye i la silailu yiraka n na kosa n ye i lɔn ka to i la hina sɔrɔnna. Jama ɲin fanan jate ko i la jama le ai ri.»
14 Allabatala ka a fɔ ko: «N nɔɔrɔ ri wa i fɛ ka i rafɔɲɔ.»
15 Musa ka a fɔ a yɛ ko: «Ni i jɛrɛ tɛ wala an kɔfɛ, i kana a fɔ an yɛ ko an ye bɔ yan.
16 Ni i ma wa an kɔfɛ, mɔɔ si tɛ a lɔn ko n na ko ni i la jama la ko duman i yɛ. Ni i ma wa an kɔfɛ, foyi tɛ andeilu faranfaasi duukolo kan siya tɔilu ma.»
17 Allabatala ka a fɔ Musa yɛ ko: «I ka mɛn tara, n di wo kɛ, baa i la ko duman n yɛ. N da i tɔɔ lɔn.»
18 Musa ka a fɔ ko: «Awa, i la nɔɔrɔ yiraka n na.»
19 Allabatala ka a fɔ ko: «N di tamin i ɲakɔrɔ ka n na ɲumaya yiraka i la, ka n tɔɔ fɔ i yɛ ko Allabatala. N ye a fɛ ka ɲumaya kɛ mɔɔ mɛn yɛ, n di ɲumaya kɛ wo yɛ. N ye a fɛ ka hina mɔɔ mɛn na, n di hina wo la.
20 Kɔni i ti se n ɲakɔrɔla yenna, baa mɔɔ si ti se n ɲakɔrɔla yenna ka a to ɲenemaya rɔ.
21 Yɔrɔ do ye n tɔrɔfɛ yan. I ri se i lɔla farakolo kan ye.
22 N na nɔɔrɔ wa kɛ taminna tuma mɛn na, n di i don farakolo falan kɔndɔ ka n bolo birin i kun na fɔɔ n wa ban taminna.
23 Wo kɔ rɔ, n di n bolo bɔ ye, i ri n kɔ yen. Kɔni mɔɔ ti nala n ɲakɔrɔla yenna.»