37
Kankira ladan ko
1 Besalɛli ka teriya tɔɔmasere kankira ladan kasiya jiri rɔ. A janya kɛra nunkan ɲa fila ni tala ri. A bonya kɛra nunkan ɲa kelen ni tala ri. A lɔ kɛra nunkan ɲa kelen ni tala ri.
2 A ka sanin jɛrɛwolo la a kɔndɔla ni a kɔkanna bɛɛ ma, ka a jiri bɛɛ latunun. A ka a da kirinkirin bɛɛ kɛ sanin di.
3 A ka koyina saninnaman naanin nadan, ka woilu kelen kelenna bila kankira sen naanin na. Wo rɔ, koyina fila bilara kankira fan kelen fɛ, a tɔ fila bilara a fan do fɛ.
4 A ka gbelekeilu rabɛn kasiya jiri rɔ, ka sanin la woilu ma ka a jiri bɛɛ latunun.
5 A ka woilu don koyinailu rɔ teriya tɔɔmasere kankira fan fila bɛɛ rɔ, sa kankira ri se madonninna.
6 A ka julumun kafari dalatuun nadan sanin jɛrɛwolo la. A janya kɛra nunkan ɲa fila ni tala ri. A kɔndɔ kɛra nunkan ɲa kelen ni tala ri.
7 A ka serubɛn bisiki kelen kelenna ladan datuun na kun fila ma. A ka woilu ladan sanin gbasinin dɔ.
8 A ka serubɛn bisiki kelen nadan kankira datuun na kun kelen na, ka a tɔ kelen nadan datuun na kun do wo la. Serubɛn bisiki fila ni kankira datuun na bɛɛ kɛra fen kelen de ri.
9 Serubɛn bisiki fila ɲabɛnni i ɲɔɔn na, ka ii ɲa lɔni to kankira datuun na rɔ. Ii kawailu layɛlɛra san ma, ka birin kankira datuun na kun na.
Tabali ladan ko
10 Besalɛli ka tabali kelen nadan kasiya jiri rɔ. A janya kɛra nunkan ɲa fila ri, a kɔndɔ kɛra nunkan ɲa kelen di, a lɔ kɛra nunkan ɲa kelen ni tala ri.
11 A ka sanin jɛrɛwolo la tabali wo bɛɛ ma ka jiri bɛɛ latunun, ka a da kirinkirin bɛɛ kɛ sanin di.
12 A ka fɛrɛnilu kankan tabali la tabali fan bɛɛ la. Fɛrɛn woilu bonya bɛnda bolo koyini naanin bonya ma. A ka a da kirinkirin bɛɛ kɛ sanin di fɛrɛn woilu la.
13 A ka koyina naanin nadan sanin dɔ, ka woilu kelen kelenna don tabali tonkon naanin na a sen kelen kelenna dafɛ.
14 A ka koyinailu lasudunya fɛrɛnilu la. Tabali ta gbelekeilu ri don koyina woilu rɔ sa tabali ri se madonninna.
15 A ka tabali ta gbelekeilu rabɛn kasiya jiri rɔ, ka sanin la woilu ma ka a jiri bɛɛ latunun.
16 Muran mɛnilu ri bila tabali kan, a ka woilu ladan sanin jɛrɛwolo la. Wo doilu kɛni ikomin pileti ni kalamailu ni jilafɛilu ni daailu. Alla sarakalaselailu ri rɛsɛnji kɛ muran woilu kɔndɔ, ka a labɔn ka a kɛ niilifen di.
Fitinasiifen nadan ko
17 A ka fitinasiifen nadan sanin jɛrɛwolo gbasinin dɔ. A kala ni a sen, a ni a fitinasii daaninilu ni a kuruilu ni a fɛrɛn bisikilu bɛɛ kɛra fen kelen de ri.
18 Bolon wɔɔrɔ bɔra a kala rɔ. Bolon sawa kɛra bolokinin fɛ, bolon sawa kɛra bolomaran fɛ.
19 A ka daani sawa ladan bolon kelen kelenna bɛɛ la, ka woilu kɛ amande jiriden munuɲa ri, bɛɛ ni a kuruilu, bɛɛ ni a fɛrɛnilu.
20 A ka daani naanin nadan fitinasiifen kala la, ka woilu fanan kɛ amande jiriden munuɲa ri, bɛɛ ni a kuruilu, bɛɛ ni a fɛrɛnilu.
21 A ka kuru kelen kɛ bolon fila fila fara yɔrɔ kɔrɔ kala la. Fitinasiilan bolon wɔɔrɔ bɛɛ kɛra ten.
22 Fitinasiilan ni a kuruilu ni a bolonilu bɛɛ ri ladan sanin jɛrɛwolo gbasinin dɔ. Wo bɛɛ kɛra fen kelen de ri.
23 A ka fitina wɔrɔnwula ladan, a ni a rabɔlanilu ni a buurigbɛ kɛ fenilu. A ka wo bɛɛ ladan sanin jɛrɛwolo la.
24 A ka fitinasiifen ni a muranilu bɛɛ ladan sanin jɛrɛwolo kilo bisawa rɔ.
Wusulan janin saraka janin diya ladan ko
25 A ka wusulanjanin saraka janin diya ladan kasiya jiri la. Wo fan naanin bɛɛ kanyara. A fan kelen kelen bɛɛ kɛra nunkan ɲa kelen di. A lɔ kɛra nunkan ɲa fila ri. Kere munuɲa kɛra a tonkon naanin bɛɛ la, kɔni kereilu ni saraka janin diya bɛɛ tɛrɛ ye fen kelen de ri.
26 A ka sanin jɛrɛwolo la a yɔrɔ bɛɛ kan, a sanfɛ yɔrɔ ni a kɛrɛfɛ yɔrɔilu a ni a kereilu bɛɛ. A ka a da kirinkirin bɛɛ kɛ sanin di a fan naanin bɛɛ la.
27 A ka koyina saninnaman fila ladan da kirinkirin wo kɔrɔ saraka janin diya fan fila fɛ, fan kelen koyina fila. Sarakabɔdiya ta gbelekeilu tɛrɛ ye donna koyina woilu rɔ, sa saraka janin diya ri se madonninna.
28 A ka gbelekeilu rabɛn kasiya jiriilu la ka sanin la ii yɔrɔ bɛɛ kan.
29 Besalɛli ka wusulan sumaduman jɛrɛwolo ladan, ka suwandili tulu sɛniman fanan nadan. A ka woilu ladan ikomin latikɔlɔn nadanna ye latikɔlɔn nadan ɲa mɛn ma.