38
Sarakabɔdiya saraka janintailu ladan ko
1 Awa, sarakailu ri janin saraka janin diya mɛn kan ka a kɛ buuri ri, Besalɛli ka wo ladan kasiya jiri la. Sarakabɔdiya fan naanin bɛɛ kanyara. A fan kelen kelenna bɛɛ kɛra nunkan ɲa loolu ri. A lɔ kɛra nunkan ɲa sawa ri.
2 A ka kere kelen kelenna ladan saraka janin diya tonkon naanin bɛɛ la. Sarakabɔdiya ni kereilu bɛɛ tɛrɛ ye fen kelen de ri. Besalɛli ka sulanɛɛ la a yɔrɔ bɛɛ kan.
3 A ka buurigbɛ kɛ muranilu ladan, a ni buurigbɛ tafenilu ni jeli kɛ muranilu ni sobo sɔɔlanilu ni takisɛ kɛ fenilu. A ka saraka janin diya muran woilu bɛɛ ladan sulanɛɛ la.
4 A ka sansan sulanɛɛlaman ladan, ka wo bila saraka janin diya kɔndɔ. A ka a bila da kirinkirin kɔrɔ saraka janin diya lɔ tɛmala rɔ.
5 A ka koyina sulanɛɛlamanilu ladan sansan wo tonkon naanin na, tonkon kelen koyina kelen. Sarakabɔdiya madonni gbelekeilu ri don koyina woilu rɔ.
6 A ka gbelekeilu rabɛn kasiya jiri la ka sulanɛɛ la woilu yɔrɔ bɛɛ kan.
7 A ka gbeleke woilu don koyina sulanɛɛlamanilu rɔ saraka janin diya fan fila bɛɛ fɛ, sa mɔɔilu ri se saraka janin diya madonninna. A ka saraka janin diya ladan jiri fɛrɛnilu la, ka a kɔndɔ rakolon to.
Koli muran ba ladan ko
8 Muso mɛnilu tɛrɛ ye ii ladɛnna faaninbon da la ka faaninbon baara kɛ, woilu ka ii la dubalenilu di. Besalɛli ka woilu ta ka koli muran ba sulanɛɛlaman ni a siifenju sulanɛɛlaman nadan woilu la.
Faaninbon lukɔndɔla ko
9 A ka lukɔndɔla laminin faaninilu ladan faaningbɛ ɲumailu la. Lukɔndɔla laminin faanin mɛn di dun faaninbon tele kankan bolokinin fan fɛ, wo janya kɛra nunkan ɲa kɛmɛ ri.
10 Faanin wo duntɔ samasen muwan de la. Besalɛli ka samasen woilu ladan, a ni ii siifenju sulanɛɛlaman, samasen kelen siifenju kelen. Sɔɔlan wodigbɛlamanilu ni faanindun koyina wodigbɛlamanilu kɛra samasen na.
11 Lukɔndɔla laminin faanin mɛn di dun faaninbon tele kankan bolomaran dɔ, wo fanan janya kɛra nunkan ɲa kɛmɛ ri. Faanin woilu duntɔ samasen muwan de la, mɛnilu kelen kelenna siini a siifenju sulanɛɛlaman kan. Sɔɔlan wodigbɛlamanilu ni faanindun koyina wodigbɛlamanilu kɛra samasen na.
12 Faaninbon telebe rɔ, faanin janya kɛra nunkan ɲa biloolu ri. Faanin woilu duntɔ samasen tan de la, mɛnilu kelen kelenna siini a siifenju kan. Sɔɔlan wodigbɛlamanilu ni faanindun koyina wodigbɛlamanilu kɛra samasen na.
13 Faaninbon telebɔ rɔ, lukɔndɔla janya kɛra nunkan ɲa biloolu ri.
14-15 Lukɔndɔla donda kɛra fan wo fɛ. Donda fan fila bɛɛ fɛ, faaninilu janya kɛra nunkan ɲa tan ni loolu ri. Faanin woilu duntɔ samasen sawa sawa le la, mɛnilu kelen kelenna siini a siifenju kan.
16 Lukɔndɔla laminin faaninilu bɛɛ rabɛnni faaningbɛ ɲuma la.
17 Samasen siifenju ladanni sulanɛɛ la. Sɔɔlan ni koyina mɛnilu tɛrɛ ye samasen na, woilu bɛɛ ladanni wodigbɛ la. Wodigbɛ lara samasen bɛɛ kun na. Koyina wodigbɛlaman tɛrɛ ye samasen bɛɛ la.
18 Mɛn kusan faanin sɔɔ la, wo ka lu donda faanin dabɛn faaningbɛ ɲuma la, a ni kari buleman ni kari wulenman ɲalagbɛ ni kari wulenman kadi kadi. Wo janya kɛra nunkan ɲa muwan di. A lɔ kɛra nunkan ɲa loolu ri, ikomin lukɔndɔla laminin faaninilu lɔ.
19 A samasen naanin ni woilu siifenju naanin nadanni sulanɛɛ la. Sɔɔlan ni koyina mɛnilu tɛrɛ ye samasen na, woilu bɛɛ ladanni wodigbɛ la. Wodigbɛ lara samasen bɛɛ kun na.
20 Faaninbon ni a laminin faaninilu ri sidi bɔlɔ mɛnilu la duu ma, woilu fanan nadanni sulanɛɛ la.
Sanin ni wodigbɛ ni sulanɛɛ la ko
21-23 Allabatala ka mɛn fɔ Musa yɛ, Uri dencɛ Besalɛli ka wo bɛɛ ladan. Yahuda kabila mɔɔ le a ri. A benba ye Huri le ri, Uri fa kɔnin. Besalɛli dɛmɛnba le tɛrɛ Ahisamaki dencɛ Oholiyabu ri, ni a ye Daan kabila mɔɔ ri. Oholiyabu tɛrɛ ye bololabaara ɲuma le ri. A tɛrɛ ye kolɔnna le ri, mɛn tɛrɛ ye fen ɲatɔnɔmailu ni fen kenɲiilu ladanna. Faanin sɔɔla tɛrɛ ye a ri fanan, mɛn tɛrɛ ye faaningbɛ ɲuma sɔɔla kari buleman ni kari wulenman ɲalagbɛ ni kari wulenman kadi kadi la.
Nba, Alla daa makɛ faaninbon mɛn ye Alla la teriya tɔɔmasere daa makɛ faaninbon di. Faaninbon wo ladanda fen mɛnilu la, Musa ka a fɔ Lebi bɔnsɔn mɔɔilu yɛ ko ii ye wo jatebɔ ka a bɛɛ sɛbɛ. Alla sarakabɔla Haruna dencɛ Itamari tɛrɛ ye jatebɔ baara wo kuntii le ri. Ii ka mɛnilu sɛbɛ, woilu le ɲin di.
24 Isirayɛlikailu ka sanin mɛnilu kɔrɔta Allabatala ɲakɔrɔ ka a di a ma, woilu kɛra kilo waa kelen de ri. Woilu bɛɛ donda yɔrɔ sɛniman baara rɔ.
25 Isirayɛlika mɛnilu tɔɔ sɛbɛra jama jatebɔ waati, woilu ka wodigbɛ di wo waati. Ii ka jate mɛn di, wo bɛɛ ladɛnnin kɛra kilo waa sawa ni kilo kɛmɛ naanin ni kilo muwan de ri.
26 Mɔɔ mɛnilu sɔrɔn tun da san muwan bɔ, woilu ni woilu kɔrɔilu bɛɛ tɔɔ sɛbɛra. Ii bɛɛ ladɛnnin kɛra mɔɔ waa kɛmɛ wɔɔrɔ ni mɔɔ waa sawa ni mɔɔ kɛmɛ loolu ni mɔɔ biloolu. Ii kelen kelenna bɛɛ ka wodigbɛ karamun wɔɔrɔ bɔ. Yɔrɔ sɛniman jateli bɛnni karamun tan ni fila le ma. Ii bɛɛ ka wo tala bɔ ten.
27 Besalɛli ka wodigbɛ kilo waa sawa ni kilo kɛmɛ naanin ta wo rɔ ka wo yelen ka siifenju kɛmɛ ladan, mɛnilu ri bila faaninbon jiriilu kɔrɔ, a ni faaninbon tatɛɛfaanin samasen kɔrɔ, siifenju kelen, wodigbɛ kilo bisawa ni kilo naanin.
28 Wodigbɛ kilo muwan tora. A ka wo ta ka samasen sɔɔlanilu ni koyinailu ladan, ka do fanan la samasen kun na.
29 Isirayɛlikailu ka sulanɛɛ mɛnilu kɔrɔta Allabatala ɲakɔrɔ ka a di a ma, woilu kɛra kilo waa fila ni kilo kɛmɛ naanin ni kilo muwan ni kelen de ri.
30 A ka siifenju ladan sulanɛɛ woilu la, siifenju mɛnilu ri bila faaninbon donda samasen kɔrɔ. Ii ka saraka janin diya sulanɛɛlaman fanan nadan sulanɛɛ woilu la, a ni a sansan sulanɛɛlaman ni a muranilu bɛɛ.
31 A ka siifenju gbɛrɛilu fanan nadan sulanɛɛ woilu la. Siifenju woilu ri bila lukɔndɔla laminin samasen kɔrɔ, a ni lu donda samasen kɔrɔ. Faaninbon ni a laminin faaninilu ri sidi bɔlɔ mɛnilu la duu ma, a ka woilu fanan nadan sulanɛɛ woilu la.