5
Baara gbɛlɛyara ka tamin a fɔlɔma kan
1 Nba, wo kɔ rɔ, Musa ni Haruna wara Ferawuna wara, ka a fɔ a yɛ ko: «Isirayɛlika Maari Allabatala ka a fɔ ko i ye a la mɔɔilu bila sa ii ri wa ka sali ba kɛ wula kɔndɔ ale bato kanma.»
2 Ferawuna ka a fɔ ko: «Yon ye Allabatala wo ri? Nfenna n ye a kan mirala ka Isirayɛlika bila? Nde ma Allabatala wo lɔn fewu. N tɛ Isirayɛlika bilala.»
3 Musa ni Haruna ka a jabi: «Heburuilu Maari Alla a ra a jɛrɛ yiraka an na. An ye i madiyala, i ye an bila. An ye tele sawa kɛ taamala wula kɔndɔ, ka wa saraka doilu bɔ an Maari Allabatala yɛ, sa Allabatala kana an gbasi jankarɔ la, wala fanmuru la.»
4 Ferawuna ka a fɔ ko: «Ai, Musa ni Haruna, nfenna ai ye mɔɔilu labanna ii la baara ma? Ai ye i kɔsɛ baara diya!
5 Heburuilu ra siyaya bakɛ sisen jamana kɔndɔ yan. Nfenna ai ye ii la baara lalɔla?»
6 Wo lon kelen dɔ Ferawuna ka baara kɔrɔsilabailu ni baara kuntiilu jamari ko:
7 «Heburuilu ye bin mɛn kɛla bɔɔ rɔ ka birikiilu gbasi, ai ye wo da boloka. Ii ye wa bin wo ɲinin ii jɛrɛ yɛ.
8 Hali wo, ii darini biriki jate mɛn gbasila, ai ye a fɔ ii yɛ ko ii ye wo ɲɔɔn jate gbasi fɔlɔ fasayi. Ai kana foyi bɔ wo la, baa ii ra kɛ salabatɔilu ri. Wo le kosɔn, ii ye a fɔla ko: An ye wa saraka bɔ an Maari Alla ma.
9 Ai ye baarala siyaya ii ma, ka ii ɲagba kosɛbɛ. Wo wa kɛ, ii tɛ ii tolo malɔ wuyafɔla kuma la butun.»
10 Nba, baara kɔrɔsilabailu ni baara kuntiilu wara kuma wo fɔ Isirayɛlika yɛ ko: «Ferawuna ka a fɔ ko a sa bin dila ai ma butun.
11 Ko ai ye wa bin ɲinin ai jɛrɛ yɛ yɔrɔ yɔrɔ rɔ. Wo bɛɛ ni a ta, ai tɛrɛ ye biriki jate mɛn gbasila kɔrɔman na, fɔɔ ii ye wo jate gbasi fɔlɔ. Fen tɛ bɔla jate wo la.»
12 Wo le rɔ, Isirayɛlika jɛnsɛnda Misiran jamana fan bɛɛ rɔ, ka wa bin wo ɲinin.
13 Baara kuntiilu tɛrɛ ye ii latuntunna, ka a fɔ ii yɛ ko: «Ai darini tɛrɛ biriki jate mɛn gbasila tele kelen kɔrɔ ka a tɛrɛn an ye bin dila ai ma, ai ye wo ɲɔɔn jate gbasi lon lon.»
14 Ferawuna la baara kuntiilu wulira ka baara Isirayɛlika kɔrɔsibailu gbasi, baara kuntiilu tun ka Isirayɛlika mɛnilu lasii mɔɔ tɔilu kun na baara kɔrɔsi kanma kɔnin. Baara kuntiilu ka a fɔ ii yɛ ko: «Ai darini tɛrɛ biriki jate mɛn gbasila, nfenna ai ma wo ɲɔɔn jate gbasi kunun ni bi?»
15 Nba baara kɔrɔsiba woilu wara Ferawuna wara ka ii makasi. Ii ka a fɔ a yɛ ko: «Nfenna i ye ɲin ɲɔɔn kɛla i la jɔnilu la?
16 Bin tɛ dila an ma, kɔni baara kuntiilu ye an jamarila ko an ye biriki gbasi. Ka a la wo kan, ii ye an gbasila. Jo tɛ i la mɔɔilu bolo la.»
17 Ferawuna kɔni ka a fɔ ko: «Ai ye salaba jɛrɛ jɛrɛilu le ri. Wo le rɔ, ai ye a fɔla tuma bɛɛ ko: ‹An ye wa saraka bɔ Allabatala yɛ.›
18 Ai ye wa baara kɛ sisen. Bin tɛ dila ai ma butun, kɔni ai darini tɛrɛ biriki jate mɛn gbasila kɔrɔman, ai ye biriki jate wo gbasi fanan.»
19 Nba, a fɔra baara kɔrɔsilabailu yɛ tuma mɛn na ko ii darini tɛrɛ biriki jate mɛn gbasila kɔrɔman, ko ii ye wo jate gbasi lon lon, ii ka a yen ko ii ni Isirayɛlika bɛɛ a ra tɔrɔya ba sɔrɔn.
20 Ii bɔtɔla Ferawuna wara, ii bɛnda Musa ni Haruna ri. Woilu tɛrɛ ye ii makɔnɔla ye.
21 Ii ka a fɔ Musa ni Haruna yɛ ko: «Ai ka ko mɛn kɛ, Allabatala ye wo ragbɛ ka wo hakɛ bɔ ai rɔ. Ai ra an magboya Ferawuna ni a la mɔɔilu ɲakɔrɔ. A kɛni ikomin ai ka fan de di Ferawuna ma ko a ye an faa fanmuru la.»
22 Awa, Musa bɔra ye ka wa Allabatala matara, ka a fɔ a yɛ ko: «N Maari Alla, nfenna i ka kojuu kɛ i la mɔɔilu la? Nfenna i ka n kelaya ka n nana yan?
23 Kɛbi n wara ka kuma Ferawuna yɛ i tɔɔ rɔ, a ra kojuu kɛ i la mɔɔilu la. Ile fanan ma foyi kɛ ka ii bɔ a bolo.»