4
Kabakurun tan ni fila
1 Jama bɛɛ banni Juridɛn Ba tɛɛla tuma mɛn na, Allabatala ka a fɔ Josuwe yɛ ko:
2 «Ai ye cɛɛ tan ni fila suwandi jama rɔ, kabila kelen cɛɛ kelen.
3 I ye a fɔ cɛɛ tan ni fila woilu yɛ ko ii bɛɛ ye kabakurun kelen kelen ta Juridɛn Ba tɛma, Alla la sarakalaselailu lɔni yɔrɔ mɛn dɔ. Ii ye kabakurun woilu madonin fo ai wa se ai daa makɛ diya tuma mɛn na. Ii ri kabakurunilu bila ye.»
4 Josuwe ka cɛɛ tan ni fila suwandi ka bɔ Isirayɛlikailu rɔ, kabila kelen cɛɛ kelen. A ka woilu makili,
5 ka a fɔ ii yɛ ko: «Ai ye wa tamin ai Maari Allabatala la teriya tɔɔmasere kankira ɲɛfɛ ka don Juridɛn Ba tɛmala rɔ. Ai ye kabakurunilu ta ye, mɔɔ kelen kabakurun kelen. Ai wa woilu ta, ai ye ii la ai kanbankun kan, kabila bɛɛ ni a la kabakurun.
6-7 Kabakurun woilu ri kɛ tɔɔmasere ri ai tɛma. Ni ai denilu ka woilu kɔrɔ maɲininka sini natɔ, ai ri a fɔ ii yɛ wo lon, ko Alla la sarakalaselailu ka Allabatala la teriya tɔɔmasere kankira ta ka wa Juridɛn Ba tɛɛ. Ko ii donda ji rɔ tuma mɛn na, ko Juridɛn Ba tɛɛra fila ri Allabatala la teriya tɔɔmasere kankira ɲɛfɛ. Ko kabakurun ɲinilu ye hankilibilafen de ri tuma bɛɛ, ka Isirayɛlikailu hankili bila ko ba wo rɔ.»
8 Josuwe ka mɛn fɔ Isirayɛlikailu yɛ, ii ka wo mira ka a kɛ. Ii ka kabakurun tan ni fila ta ka bɔ Juridɛn Ba tɛma, kabila kelen kabakurun kelen, ikomin Allabatala ka a fɔ Josuwe yɛ ɲa mɛn ma. Ii ka kabakurun woilu madonin ka wa ii bila ii daa makɛ diya.
9 Josuwe ka kabakurun tan ni fila gbɛrɛ lɔ Juridɛn Ba tɛma ye, Alla la sarakalaselailu lɔni teriya tɔɔmasere kankira ri yɔrɔ mɛn. Kabakurun woilu ye ye hali bi.
10 Alla la sarakalaselailu lɔni tora teriya tɔɔmasere kankira ri Juridɛn Ba jani tɛma fo jama banda ko bɛɛ kɛla tuma mɛn na ikomin Allabatala tun ka Josuwe jamari ɲa mɛn ma. Wo bɛɛ kɛra ikomin Musa ka a fɔ Josuwe yɛ ɲa mɛn ma. Jama ka ii kaliya le ka ba tɛɛ.
11 Ii bɛɛ banda ba tɛɛla waati mɛn na, Alla la sarakalaselailu bɔra ba tɛmala rɔ, ka tamin jama ɲɛfɛ Allabatala la teriya tɔɔmasere kankira ri.
12 Rubɛn kabila cɛɛilu ni Kadi kabila cɛɛilu ni Manase kabila talantɛ cɛɛilu, woilu ka ba tɛɛ Isirayɛlika tɔilu ɲɛrɔ, ii la kɛlɛkɛfenilu ye ii bolo, ikomin Musa tun ka a fɔ ii yɛ ɲa mɛn ma.
13 Kɛlɛkɛdenilu waa binaanin ka ba tɛɛ Allabatala ɲakɔrɔ ka wa Jeriko gbɛkannan dɔ. Ii bɛɛ rabɛnni kɛlɛkɛ kanma.
14 Wo lon, Allabatala ka Josuwe bonya Isirayɛlikailu bɛɛ ɲana. Ii ka a bonya a si bɛɛ kɔrɔ ikomin ii tun ka Musa bonya ɲa mɛn ma.
15 Nba, Allabatala ka a fɔ Josuwe yɛ ko:
16 «Alla la sarakalasela mɛnilu ye Allabatala la teriya tɔɔmasere kankira madoninna, i ye a fɔ woilu yɛ ko ii ye bɔ Juridɛn Ba tɛma.»
17 Josuwe ka a fɔ Alla la sarakalaselailu yɛ ko: «Ai ye bɔ Juridɛn Ba tɛma.»
18 Wo rɔ, Alla la sarakalaselailu bɔra Juridɛn Ba rɔ teriya tɔɔmasere kankira ri. Ii senilu sera duukolo jani ma tuma mɛn na, Juridɛn Ba ji ka a kɔsɛ a nɔ rɔ i kɔrɔ, ka woyen kojuuya ka yɔrɔ bɛɛ fa ikomin a tɛrɛ ye kɛla ɲa mɛn ma fɔlɔ.
19 Jama ka Juridɛn Ba tɛɛ ii la san karo fɔlɔ tele tan. Ii wara ii daa makɛ Kilikali so dafɛ. Yɔrɔ wo ye Jeriko telebɔ rɔ.
20 Josuwe ka kabakurun tan ni fila woilu lalɔ ye, cɛɛ tan ni fila tun ka mɛnilu ta Juridɛn Ba rɔ.
21 A ka a fɔ Isirayɛlikailu yɛ ko: «Lon do rɔ, ni ai denilu ka ai maɲininka kabakurun ɲinilu kɔrɔ ma,
22 ai ye a fɔ ii yɛ ko Isirayɛlikailu ka Juridɛn Ba tɛɛ ii sen ma duukolo jaran kan.
23 Baa ai Maari Allabatala ka Juridɛn Ba ji ja ai ɲɛ haan ai bɛɛ banda ba tɛɛla, ikomin a ka Kɔɔji Fararɔbin ja an ɲɛ ɲa mɛn ma haan an bɛɛ taminda.
24 A ka wo le kɛ, sa dunuɲa mɔɔilu bɛɛ ri a lɔn ko Allabatala la sebaya ka bon. Ka a la wo kan, a ka a kɛ sa ai ri silan ai Maari Allabatala ɲɛ tuma bɛɛ.»