5
Mansailu silanda Josuwe yɛ
1 Amɔrikailu la mansa mɛnilu siini tɛrɛ Juridɛn Ba telebe rɔ, a ni Kanaankailu la mansa mɛnilu siini kɔɔji da la, woilu ka a mɛn ko Allabatala ka Juridɛn Ba ja Isirayɛlikailu ɲɛ haan ii bɛɛ banda taminna. Mansa woilu ka wo mɛn tuma mɛn na, ii silanda. Jusulatɛɛ tun tɛ ii la butun ka Isirayɛlikailu kɛlɛ.
Josuwe ka Isirayɛlika cɛɛilu kojiiya
2 Nba, waati kelen wo la Allabatala ka a fɔ Josuwe yɛ ko: «Kaba doilu lɛsɛ ka ii kɛ muruilu ri, ka Isirayɛlika cɛɛilu bila ko rɔ.»
3 Josuwe ka kaba doilu lɛsɛ ka ii kɛ muruilu ri ka Isirayɛlika cɛɛilu la faaninta kɛ. Ii la faaninta wo kɛra yɔrɔ mɛn, ii ka yɔrɔ wo tɔɔ la ko Faaninta kɛ Koyinkɛ.
4-5 Isirayɛlika cɛman mɛnilu bɔra Misiran ka a tɛrɛn ii ra se kɛlɛ ma, woilu bɛɛ la faaninta kɛni le tɛrɛ. Ii bɛɛ sara wula kɔndɔ ye, Isirayɛlikailu tɛrɛ ye taamataamala yɔrɔ mɛn. Kɔni dencɛ mɛnilu sɔrɔnda wula kɔndɔ ye, woilu tun ma faaninta kɛ. Wo le kosɔn, Josuwe ka ii la faaninta kɛ.
6 Isirayɛlikailu tun ka san binaanin de kɛ taamala wula kɔndɔ, haan cɛɛ mɛnilu bɔra Misiran ka a tɛrɛn ii ra se kɛlɛ rɔ, woilu bɛɛ sara. Allabatala tun ka lahidi ta ii benbailu yɛ ko a ri jamana ɲin di ii ma, kɔnin cɛɛ mɛnilu bɔra Misiran, ii tun ma sɔn Allabatala la kuma mirala. Wo rɔ, Allabatala ka a kali ko a tɛ sɔn woilu ɲa ye la jamana kan, li ni nɔnɔ ka siya jamana mɛn kɔndɔ ɲin.
7 Allabatala ka ii dencɛilu bila ii nɔ rɔ. Josuwe ka woilu kojiiya, baa woilu bɛɛ kojiibali le tɛrɛ fɔlɔ. Ii tun ma kojiiya taama waati wula kɔndɔ.
8 Ii bɛɛ kojiiyani kɔ, ii tora ii daa makɛ diya rɔ fɔɔ ka ii la dailu kɛndɛya.
9 Allabatala ka a fɔ Josuwe yɛ ko: «Jɔnya maloya tɛrɛ ye ai la Misiran, kɔnin n da wo bɔ ai la bi.» Wo le rɔ, yɔrɔ wo tɔɔ lara ko Kilikali haan bi.
Isirayɛlikailu ka Taminkunna Sali kɛ
10 Ka Isirayɛlikailu daa makɛni to Kilikali, ii ka Taminkunna Sali kɛ Jeriko gbɛkannan dɔ. Wo kɛra karo wo tele tan ni naaninna wura da la.
11 Wo duu sa gbɛ, ii ka buru fununbali ni sumankisɛ jilanni doilu dɔɔn.
12 Wo lon kelen, dɔɔnnifen mɛn tɔɔ ko mana, wo dɔɔn nalɔra. Isirayɛlikailu ma mana sɔrɔn wo kɔ rɔ. Ka a damira san wo ma, ii ka Kanaan jamana sumandenilu le dɔɔn.
Alla la kɛlɛjama la kuntii
13 Nba, lon do rɔ, ka Josuwe to Jeriko da fɛ, Josuwe ka cɛɛ do lɔni yen a ɲana. Fanmuru ye a bolo, wo bɔni a la rɔ. Josuwe ka a madon a la ka a maɲininka ko: «Ile ye andeilu do le ri wa, wa i ye an juu do le ri?»
14 Cɛɛ ka a fɔ ko: «Nde ni ai si tɛ. N ye Allabatala la kɛlɛjama la kuntii le ri. N natɔ le ɲin.» Josuwe ka a be wo sen kɔrɔ ka a ɲa birin duu ma ka a bonya. Josuwe ka a fɔ ko: «I la jɔn ye nde ri. I ye a fɛ n ye nfen de kɛ sa?»
15 Allabatala la kɛlɛjama la kuntii ka a jabi: «I la sanbara bɔ i sen dɔ, baa i lɔni yɔrɔ mɛn kan ɲin, yɔrɔ sɛniman de wo ri.» Josuwe ka wo kɛ.