26
Janfa donda Isa ma
1 Isa banda kuma wo bɛɛ fɔla tuma mɛn na, a ka a fɔ a la karandenilu yɛ ko:
2 «Ai ka a lɔn ko a ra to tele fila ma, Taminkunna Sali ri kɛ. Ni wo lon sera, Mɔɔ Dencɛ ri mira ka a gbɔngbɔn jiri kan ka a faa.»
3 Wo tuma, sarakalasela kuntiiilu ni Yahudiya la mɔɔbakɔrɔilu wara ladɛn diya sarakalasela kuntiiba la bon na. Wo tɔɔ ko Kayifasi.
4 Ii ka i ɲɔɔn yen ka Isa mira ɲa ɲinin kewuya rɔ a faa ko rɔ.
5 Kɔni ii ka a fɔ ko: «an kana a mira sali waati la. Ko ni wo tɛ, mɔɔilu ri wuli ka murunti.»
Muso do ka tulu sumaduman kɛ Isa kun dɔ
6 Awa, Isa wara cɛɛ do wara Betani so kɔndɔ, cɛɛ mɛn tɔɔ ko Simɔn Kunatɔ.
7 Ka Isa siini to dɔɔnnin diya, muso do wulira ka na daa alabasitari ri, mɛn fani latikɔlɔn tulu dagbɛlɛn na. Muso wo ka latikɔlɔn tulu wo burundun Isa kun ma.
8 Karandenilu ka wo yen tuma mɛn na, ii mɔnɛra ka a fɔ ko: «Tiɲanni ɲin kun ye nfen di?
9 Tulu ɲin tun di se feerela wodi ba la, ka wodi wo kɛ fantanilu dɛmɛnfen di.»
10 Kɔni Isa ka wo mɛn ka a fɔ ii yɛ ko: «Nfenna ai ye muso tɔrɔla? A ra koɲuma kɛ n yɛ,
11 baa fantanilu ye ai fɛ waati bɛɛ. Kɔni n tɛna tola ai fɛ yan haan waati bɛɛ de.
12 Muso ɲin ka latikɔlɔn tulu burundun n fari kan ka a rabɛn n su don kanma.
13 N di tuɲa fɔ ai yɛ: kibaro ɲuma ɲin wa lase mɔɔilu ma yɔrɔ yɔrɔ dunuɲa rɔ yan, muso ka mɛn kɛ ɲin, wo fanan di fɔ ye, sa mɔɔilu hankili ri to ale rɔ.»
Yahudasi ka Isa don a juuilu bolo
14 Wo kɔ rɔ, Isa la karanden mɛn tɔɔ ko Judasi Sikariyɔti, wo wara sarakalasela kuntiiilu tɛrɛn ye. Yahudasi tɛrɛ ye Isa la karanden tan ni fila do le ri.
15 Yahudasi ka a fɔ sarakalasela kuntiiilu yɛ ko: «Ni n ka Isa don ai bolo, ai ri nfen di n ma?» Ii ka wodigbɛ gbanan bisawa di a ma.
16 Ka bɔ lon wo ma, Yahudasi ka fɛrɛ ɲinin ka Isa don ii bolo.
Isa ni a la karandenilu ka Taminkunna Sali kɛ
17 Nba, Buru Fununbali Sali lon fɔlɔ rɔ, Isa la karandenilu ka ii madon a la ka a maɲininka ko: «I ye a fɛ an ye Taminkunna Sali dɔɔnnin dabɛn i yɛ mi?»
18 Isa ka a fɔ ii yɛ ko: «Ai ye wa fakarisa tɛrɛn so kɔndɔ. Ai ye a fɔ a yɛ ko: ‹Karanmɔɔ ka a fɔ ko: «N na waati ra sudunya. Ko n ni n na karandenilu ri Taminkunna Sali kɛ i wara.»›»
19 Isa ka mɛn fɔ, karandenilu ka a kɛ ten. Ii wara Taminkunna Sali dɔɔnnin dabɛn ye.
20 Fitiri waati, a ni a la karanden tan ni fila ka ii sii dɔɔnnin diya.
Isa ka Yahudasi la janfa ko fɔ
21 Ka ii siini to dɔɔnnin na, Isa ka a fɔ ii yɛ ko: «N di tuɲa fɔ ai yɛ: ai rɔ kelen di n don mɔɔ juuilu bolo.»
22 Karandenilu niilafinda kosɛbɛ kuma wo kosɔn. Ii bɛɛ ka a fɔ a yɛ kelen kelen ko: «Maari, nde le wo ri wa?»
23 Isa ka a fɔ ko: «N ni mɔɔ mɛn da an bolo bila fɛ kelen de kɔndɔ, wo le n janfala.
24 Mɔɔ Dencɛ ri faa ikomin a sɛbɛni a la ko rɔ ɲa mɛn ma. Kɔni mɔɔ mɛn di a don mɔɔ juuilu bolo, gbalo ye wo tii yɛ. Hali ni wo tii sɔrɔnbali tun tora, wo tun ka fisa a ma paaɔn.»
25 Judasi mɛn kɛtɔ Isa donna mɔɔ juuilu bolo, wo ka a fɔ Isa yɛ ko: «Karanmɔɔ, nde le wo ri wa?» Isa ka a jabi: «I jɛrɛ le kan ten.»
Maari la dɔɔnnin
26 Nba, ka ii to dɔɔnnin na Isa ka buru ta ka baraka bila Alla yɛ. A ka buru rakadikadi, ka a di ii ma ka a fɔ ii yɛ ko: «Ai ye ɲin mira ka a dɔɔn. N fari le ɲin di.»
27 Wo kɔ rɔ, a ka minninfen ta, rɛsɛnji ye a kɔndɔ. A ka baraka bila Alla yɛ, ka ban ka minninfen di ii ma. A ka a fɔ ko: «Ai bɛɛ ye do min a rɔ.
28 N jeli le ɲin di, mɛn ye teriya sidila an tɛma. A bɔnni mɔɔ siyaman de yɛ sa ii la kojuuilu ri makoto.
29 N di a fɔ ai yɛ ko n tɛna rɛsɛnji minna butun fewu, fɔɔ n ni ai wa a kura min n Fa la mansaya rɔ lon mɛn na.»
Piyɛri ri a fɔ ko a ma Isa lɔn
30 Awa, ii ka kalaman bɔ Alla yɛ, ka ban ka wa Olibiye Koyinkɛ kan.
31 Ii seni ye, Isa ka a fɔ ii yɛ ko: «Ai bɛɛ ri ai ban n dɔ, baa a sɛbɛni ko:
‹N di saagbɛngbɛnna gbasi ka a faa,
saa kuru ri jɛnsɛn.›
32 «Kɔni ni n wulira ka bɔ saya rɔ, n di wa ai makɔnɔ Kalile mara rɔ.»
33 Piyɛri ka a fɔ Isa yɛ ko: «Hali ni tɔilu bɛɛ ka i bila ka ii bori, n kɔnin tɛna i bilala habadan.»
34 Isa ka a jabi: «N di tuɲa fɔ i yɛ: bi su ɲin dɔ jɛrɛ, sani dondon ye kasi, i ri a fɔ mɔɔilu yɛ haan siɲa sawa ko i ma n lɔn.»
35 Kɔni Piyɛri ka a fɔ a yɛ ko: «N tɛ a fɔ habadan ko n ma i lɔn, hali ni mɔɔilu wulira ile ni nde faala kelen di.» Karanden tɔilu bɛɛ fanan ka a fɔ ten.
Isa ka Alla tara Ketisemane
36 Nba, Isa ni a la karandenilu sera yɔrɔ do rɔ, mɛn tɔɔ ko Ketisemane. Isa ka a fɔ ii yɛ ko: «Ai ye ai sii yan ka n makɔnɔ. N watɔ ɲɛfɛ dɔɔni Alla matara diya.»
37 A ka Piyɛri ni Sebede dencɛ fila kili ko ii ye wa a malɔ. Isa niilafinda, a jusu tɔrɔra kosɛbɛ.
38 A ka a fɔ ii yɛ ko: «Jusukasi ra wara n ma. A ye ikomin n satɔ le. Ai ye mɛn yan ka ai to ɲana n fɛ.»
39 A wara ɲɛfɛ dɔɔni, ka a be duu ma ka a ɲa birin. A ka Alla tara ko: «N Fa, ni a ri se bɛnna, i ye nii ɲakankata minninfen ɲin mataa n na, kɔni n jɛrɛ sawo kana kɛ fɔɔ i sawo.»
40 Wo kɔ rɔ, Isa ka a kɔsɛ ka wa karanden sawa tɛrɛn. Ii ye sunɔɔ rɔ. A ka a fɔ Piyɛri yɛ ko: «A se tɛ ai yɛ ka to ai ɲana n fɛ hali waati kelen wa?
41 Ai ye to ai ɲana ka Alla tara, sa ai kana manɛɛn ka bila kojuu rɔ. Sika tɛ a rɔ, sɔlɔmɛ bɛnna a ma kɔni fanka tɛ faribanku la.»
42 Isa bɔra ii fɛ a siɲa filana rɔ ka wa Alla matara ikɔ tuun. A ka a fɔ ko: «N Fa, ni a ti se bɛnna i ye nii ɲakankata minninfen ɲin mataa n na ko fɔɔ a ye n sɔrɔn, wo rɔ i sawo ye kɛ.»
43 A kɔsɛ mɛn kɛni karandenilu ma, a ka ii tɛrɛn sunɔɔ rɔ ikɔ tuun, baa sunɔɔ ba tɛrɛ ye ii ɲa rɔ.
44 Wo rɔ, a bɔra ii fɛ ka wa ɲɛfɛ ikɔ tuun, ka Alla tara a siɲa sawana rɔ. A tun ka mɛn fɔ kɔrɔman, a ka wo fɔ ikɔ tuun.
45 A ka a kɔsɛ ka na karandenilu tɛrɛn ikɔ tuun, ka a fɔ ii yɛ ko: «Ai ye sunɔɔ rɔ fɔlɔ ka ai ɲɔɲɔ wa? Ai ɲa lɔ, waati ra se. Sisen, Mɔɔ Dencɛ kɛtɔ donna kojuukɛlailu bolo.
46 Ai ye ai wuli, an ye wa. Mɛn di n don mɔɔ juuilu bolo, wo ra na.»
Mɔɔilu nara Isa mira diya
47 Nba, ka Isa to kumala, Judasi sera ye, wo mɛn ye Isa la karanden tan ni fila do ri. A ni jama ba nara. Fanmuruilu ni gbelekeilu ye ii bolo. Ii kelayani sarakalasela kuntiiilu ni Yahudiya la mɔɔbakɔrɔilu le bolo.
48 Mɛn kɛtɔ Isa donna ii bolo, a tun ka tɔɔmasere yiraka ii la. A ka a fɔ ko: «N wa n ton mɛn kan ka a sunbu, wo le. Ai ye a mira.»
49 Awa, Yahudasi ka a madon Isa la i kɔrɔ ka a fɔ a yɛ ko: «Karanmɔɔ, i ni su!» A ka a ton a kan ka a sunbu.
50 Isa ka a jabi: «N duɲɔɔ, i nani mɛn kɛ kanma, i ye wo kɛ.» Wo tuma, ii ka ii kɛ Isa kan, ka a mira.
51 Isa la karanden do ka a la fanmuru bɔ a laa rɔ ka sarakalasela kuntiiba la jɔncɛ gbasi, ka a tolo kelen tɛɛ a la.
52 Isa ka a fɔ karanden wo yɛ ko: «I la fanmuru don a laa rɔ! Mɔɔ mɛn wa fanmuru mira kɛlɛkɛ kanma, wo tii fanan di faa fanmuru la.
53 I ma a lɔn wa ko n di se n Fa tarala ko a ye n dɛmɛn? Ni n ka a tara ten, a ri mɛlɛka kuru tan ni fila lana n dɛmɛn kanma sisɛn.
54 Kɔni ni n ka n Fa tara ten, mɛn sɛbɛni Alla la kitabu kɔndɔ, wo ri se kanbalila di? Baa a sɛbɛni ko ko ɲinilu ka kan ka kɛ ten.»
55 Wo tuma, Isa ka a fɔ jama yɛ ko: «Ai nani n mira diya gbelekeilu ni fanmuruilu ri ikomin mɔɔilu ye bɔla bɛnkanninna kanma ɲa mɛn ma. N siini tɛrɛ mɔɔilu karanna lon lon Allabatobonba jin kɔndɔ. Ai ma n mira ye.
56 Kɔni nabiilu ka mɛnilu sɛbɛ Alla la kitabu kɔndɔ, sa woilu ye kanbali: wo le ka a kɛ, ko ɲinilu bɛɛ kɛni ten.»
Isa la karandenilu bɛɛ ka a to ye ka ii bori ka wa.
Ii wara Isa ri kititɛɛ diya
57 Awa, Isa mirabailu wara a ri sarakalasela kuntiiba Kayifasi wara. Sariya karanmɔɔilu ni mɔɔbakɔrɔilu ladɛnnin tɛrɛ ye.
58 Ii watɔla Isa ri ye, Piyɛri bilani tɛrɛ ii kɔ. Kɔni a tora yɔrɔ jan. A wara ten fɔɔ ka na se sarakalasela kuntiiba la lu kɔndɔ. A donda ye, ka wa a sii sarakalasela kuntiiba la bon kandaninnailu fɛ, ka a ragbɛ ko ɲin di laban ɲa mɛn ma.
59 Sarakalasela kuntiilu ni Yahudiya la kititɛɛla dɛkuru mɔɔilu bɛɛ tɛrɛ ye wuya kuma do ɲininna Isa kanma, mɛn di se ka kɛ a faa sababu ri.
60 Mɔɔ siyaman nara ka wuya fɔ ka kɛ serejuuilu ri. Wo bɛɛ ni a ta, ladɛn mɔɔilu ma jalaki yɔrɔ sɔrɔn Isa kanma. A laban, mɔɔ fila nara ka a fɔ ko:
61 «Cɛɛ ɲin ka a fɔ ko a ri se ka Allabatobonba te, ka ban ka a lɔ ikɔ tele sawa kɔrɔ.»
62 Wo rɔ, sarakalasela kuntiiba wulira jama tɛma ka Isa maɲininka ko: «Mɔɔ ɲinilu ye kuma mɛnilu fɔla i ma, i tɛ woilu jabila wa?»
63 Kɔni Isa ka a makun. Sarakalasela kuntiiba ka a fɔ a yɛ ko: «N ye i jamarila Alla ɲenema tɔɔ rɔ ko i ye tuɲa fɔ an yɛ. Ile le ye Ɲenematɔmɔnin di wa, Alla Dencɛ kɔnin?»
64 Isa ka a jabi: «I jɛrɛ le kan ten. Kɔni n di a fɔ ai yɛ ko ai ri Mɔɔ Dencɛ siini yen Sebɛɛtii Alla bolokinin fɛ. Wo kɔ rɔ, ai ri a natɔla yen duruilu tɛma ka bɔ sankolo rɔ.»
65 Wo rɔ, sarakalasela kuntiiba ka a jɛrɛ la durukiba mira ka a rafara. A ka a fɔ ko: «A ra Alla tanama ko kɛ. An mako tɛ mɔɔilu la sereya la butun. Ai jɛrɛ ka a la Alla tanama kumailu mɛn.
66 An ye nfen kɛ wo rɔ?» Ii bɛɛ ka a fɔ ko Isa ni saya ka kan.
67 Mɔɔ doilu wulira ii daji tula a ɲa rɔ, ka a gbasi ii bolokudu la, ka a tolo gbasi.
68 Ii ka a fɔ ko: «Ile, Ɲenematɔmɔnin, i ye kelaya kuma fɔ an yɛ. Mɛn ka i gbasi, wo tɔɔ fɔ an yɛ!»
Piyɛri ka a fɔ ko a ma Isa lɔn
69 Awa, wo tuma Piyɛri siini tɛrɛ lu ma. Ka a to ye, jɔnmuso do ka a madon a la, ka a fɔ a yɛ ko: «Ile fanan tɛrɛ ye Kalileka Isa la dɛkuru rɔ.»
70 Kɔni Piyɛri ma sɔn wo ma mɔɔilu ɲana. A ka muso jabi: «N ma i la kuma ɲayen.»
71 Piyɛri bɔra ye ka wa lu da la. Jɔnmuso gbɛrɛ ka a yen, ka a fɔ ye mɔɔilu yɛ ko: «Cɛɛ ɲin tɛrɛ ye Isa Nasarɛtika la dɛkuru rɔ.»
72 Piyɛri ma a lɔ a la. A ka a kali ko: «N ma cɛɛ wo lɔn.»
73 A ma mɛn ba kɛ, mɔɔ mɛnilu lɔni tɛrɛ ye, woilu ka a fɔ Piyɛri yɛ ko: «Sika tɛ a rɔ, i fanan ye mɔɔ woilu do le ri, baa i kumaɲa ye a yirakala ko i bɔni Kalile.»
74 Piyɛri ka a fɔ ko: «N ye n kalila ko n ma cɛɛ wo lɔn. Ni n ka wuya fɔ, Alla ye ko latɔn n na.» Dondon kasira i kɔrɔ.
75 Isa tun ka mɛn fɔ, Piyɛri hankili bilara wo rɔ, baa Isa ka a fɔ a yɛ ko: «Sani dondon ye kasi bi, i ri a fɔ mɔɔilu yɛ siɲa sawa ko i ma n lɔn.» Wo rɔ, Piyɛri bɔra ye ka wa kasi kojuuya.