27
Ii wara Isa ri Pilate wara
1 Kɛnɛ bɔ mɛn kɛni, sarakalasela kuntiilu ni Yahudiya la mɔɔbakɔrɔilu bɛɛ ka ai ɲɔɔn yen ka Isa faa ɲa ɲinin.
2 Ii ka a sidi, ka wa a ri jamanatii Pilate wara.
Judasi ka a jɛrɛ faa
3 Nba, Judasi mɛn ka Isa don mɔɔilu bolo, wo ka a yen tuma mɛn na ko ii ka kiti labe Isa kan ko a ye faa, a nimisara. Ii nɔ wodigbɛ gbanan bisawa mɛn dila a ma Isa janfa saraya ri, a ka wo lasɛ sarakalasela kuntiilu ni mɔɔbakɔrɔilu ma.
4 A ka a fɔ ii yɛ ko: «N da kojuu kɛ, baa n ka mɔɔ jalakibali don ai bolo, mɛn kɛtɔ faala.» Ii ka a fɔ ko: «Hɛn! An na ko tɛ wo rɔ. I kunko le wo ri fasayi!»
5 Judasi ka wodigbɛ gbanan woilu lafili Allabatobonba kɔndɔ ye, ka wa a jɛrɛ dun julu la ka a jɛrɛ faa.
6 Sarakalasela kuntiilu ka wodigbɛ gbananilu matɛɛ. Ii ka a fɔ ko: «An kana wodi ɲin bila kankira rɔ Allabatobonba kɔndɔ. Wo dahani tɛ, baa wodi ɲin ye mɔɔ jeli sankɔ le ri.»
7 Ii ka ɲɔɔn yen ka bɛn kan kelen ma. Wo rɔ, ii ka wodi wo ta ka bankudaa ladanna do la sɛnɛ san ko ii ri a kɛ londan kaburuso ri.
8 Wo le kosɔn, haan ka na se bi ma, mɔɔilu ye a fɔla sɛnɛ wo ma ko Mɔɔ Jeli Sɛnɛ.
9 Nabi Jeremiya ka mɛn fɔ fɔlɔfɔlɔ, wo dafara wo ɲa le ma. A ka a fɔ ko:
«Ii ka wodigbɛ gbanan bisawa ta,
Isirayɛlika doilu ka a fɔ ko a ni wodi jate mɛn ka kan.
10 Ii ka wo di bankudaa ladanna la sɛnɛ sankɔ kanma,
ikomin Maari ka n jamari ɲa mɛn ma.»
Pilate ka Isa fɛsɛfɛsɛ
11 Wo tuma, mɔɔilu ka Isa lalɔ mara jamanatii ɲana. Kunnasiila ka a maɲininka ko: «Ile le Yahudiyailu la mansa ri wa?» Isa ka a fɔ ko: «I jɛrɛ le kan ten.»
12 Sarakalasela kuntiilu ni mɔɔbakɔrɔilu ka a jalaki, kɔni a ma foyi fɔ.
13 Pilate ka a fɔ a yɛ ko: «Ii ra sɔn siyaman la i la. I ma wo mɛn wa?»
14 Kɔni Isa ma sɔn ka jabili si di, hali kuma kelen. Wo ka Pilate kabannakoya kosɛbɛ.
Pilate ka a fɔ ko Isa ye faa
15 Nba, jamanatii darini kasoden kelen bilala Taminkunna Sali waati san san, jama ye a fɛ a ye mɛn bila.
16 Nba, wo ka cɛɛ do tɛrɛn kaso la ye, mɛn tɔɔ ko Barabasi. Wo tɔɔjuu tun da bɔ kosɛbɛ.
17 Wo rɔ, jama ka ii ladɛn Pilate wara tuma mɛn na, a ka ii maɲininka ko: «Nba, ai ye a fɛ n ye mɔɔ ɲuman de bila ai yɛ? Barabasi wa, wala Isa, mɔɔilu ye a fɔla mɛn ma ko Ɲenematɔmɔnin?»
18 Baa Pilate ka a lɔn ko keleya le ka a kɛ ii ka Isa don ale bolo.
19 Ka Pilate siini to kititɛɛ diya rɔ, a muso ka kela lawa a ma ko: «I kana i sen bila mɔɔ telenni wo la ko rɔ, baa n da tɔrɔ sibo rɔ kosɛbɛ ale le kosɔn bi.»
20 Kɔni sarakalasela kuntiilu ni mɔɔbakɔrɔilu ka jama kɔndasu ko ii ye Pilate madiya ko a ye Barabasi bila ka Isa faa.
21 Kunnasiila ka ii maɲininka ikɔ tuun ko: «Mɔɔ fila ɲin dɔ, ai ye a fɛ n ye mɔɔ ɲuman bila ai yɛ?» Ii ka a fɔ ko: «I ye Barabasi bila.»
22 Pilate ka ii maɲininka ko: «Ai ye a fɛ n ye nfen kɛ Isa la wo rɔ, mɔɔilu ye a fɔla mɛn ma ko Ɲenematɔmɔnin?» Ii bɛɛ ka a fɔ ko: «A ye gbɔngbɔn jiri kan ka a faa!»
23 Pilate ka a fɔ ko: «Nfenna? A ka kojuu ɲuman de kɛ?» Kɔni ii ka do la ii la wɔyɔ kan kan ikɔ tuun ko: «A ye gbɔngbɔn jiri kan ka a faa!»
24 Pilate ka a yen tuma mɛn na ko a la kuma tɛ foyi ɲala, ko jama muruntitɔ le, a ka ji ta ka a bolo ko jama ɲana, ka a fɔ ii yɛ ko: «N sen ti cɛɛ ɲin jeli labɔn ko rɔ. A ko ye ai bolo.»
25 Mɔɔilu bɛɛ ka a fɔ ko: «Ale le wo ri. A jeli kunko ye be ande ni an denilu ma.»
26 Wo rɔ, a ka Barabasi bila, ka ban ka mɔɔilu lɔ Isa gbasila gbiɲɛ la. Wo kɔ rɔ, a ka Isa don kɛlɛdenilu bolo ko ii ye wa a gbɔngbɔn jiri kan.
Kɛlɛdenilu ka Isa lafɛya
27 Kunnasiila la kɛlɛdenilu wara Isa ri mara kunnasiila la mansabolon kɔndɔ, ka kɛlɛden tɔilu bɛɛ kili ko ii ye na.
28 Ii ka a jɛrɛ la faaninilu bɔ a kan na, ka durukiba wulenman kadi kadi bila a kan na.
29 Ii ka jiri bolon wɔninmailu mɔrɔmɔrɔ ii ɲɔɔn ma ka ii kɛ mansa fula munuɲa ri, ka wo la a kun na, ka gbeleke do don a bolokinin dɔ. Wo kɛni, ii ka ii ɲɔnkin a kɔrɔ ka a lafɛya ko: «Yahudiyailu la mansa, an ye i fola.»
30 Ii ka ii daji tu a kan, ka gbeleke mira a bolo ka a gbasi a la a kun dɔ ko siyaman.
31 Ii banni a lafɛyala, ii ka durukiba wulenman kadi kadi bɔ a kan na, ka a jɛrɛ la faaninilu bila a kan na. Wo kɔ rɔ, ii bɔra a ri ka wa a gbɔngbɔn diya.
Ii ka Isa gbɔngbɔn jiri kan
32 Nba, ii watɔla, ii bɛnda cɛɛ do la, mɛn tɔɔ ko Simɔn Sirɛnika. Kɛlɛdenilu ka a diyagboya ka Isa la gbɔngbɔn jiri la a kan ma.
33 Ii wara se yɔrɔ do rɔ, mɛn tɔɔ ko Kɔlikota. Wo kɔrɔ le ko kunkolo yɔrɔ.
34 Ii seni ye, ii ka rɛsɛnji di Isa ma, fen kunaman ɲaaminni mɛn na. A ka rɛsɛnji wo nene tuma mɛn na, a ma sɔn ka a min.
35 Ii ka Isa gbɔngbɔn jiri kan tuma mɛn na, ii ka matɛɛli kɛ a la faaninilu ratala kanma ii tɛma.
36 Ii banni wo bɛɛ la, ii ka ii sii ka ii janto Isa rɔ.
37 Ii tun ka walan do bila gbɔngbɔn jiri ma Isa kun na. A gbɔngbɔn kun sɛbɛni walan wo kan ko: «Isa le ɲin, ni a ye Yahudiyailu la mansa ri.»
38 Isa ni bɛnkaninnailu fila gbɔngbɔnda jiriilu kan waati kelen na. Bɛnkaninna kelen gbɔngbɔnda jiri do kan a bolokinin fɛ, a tɔ kelen a bolomaran fɛ.
39 Taminbatɔilu tɛrɛ ye a nanila, ka ii kun dɔndɔn a kanma.
40 Ii ka a fɔ a yɛ ko: «Hɛn! I ma a fɔ ko i ri se Allabatobonba tela ka a lɔ ikɔ tele sawa kɔrɔ wa? I ye i jɛrɛ kisi. Ni ile le ye Alla Dencɛ ri, i ye jii ka bɔ jiri kan.»
41 Wo ɲa kelen ma, sarakalasela kuntiilu ni sariya karanmɔɔilu ni mɔɔbakɔrɔilu fanan tɛrɛ ye a lafɛyala. Ii ka a fɔ ko:
42 «A ka doilu kisi, kɔni a ti se a jɛrɛ kisila. Ni a ye Isirayɛlikailu la mansa ri, a ye jii ka bɔ jiri kan! Ni a ka wo le kɛ, an di lemɛniya a ma.
43 A lani Alla la. Nba, ni a la ko duman Alla yɛ, fɔɔ a ye a kisi sisen, baa a ka a fɔ ko: ‹N ye Alla Dencɛ ri.›»
44 Bɛnkaninna fila mɛnilu gbɔngbɔnni jiri doilu kan a dafɛ, woilu fanan tɛrɛ ye a naninna ten.
Isa sara
45 Nba, tele tala seni, dibi donda jamana fan bɛɛ rɔ. A tora ten haan wura tele la.
46 Wo tuma, Isa wɔyɔra kan ba la ko: «Eli, Eli, lama sabakatani?» Wo kɔrɔ le ko: «N Maari, n Maari. Nfenna i ra n bila?»
47 Mɔɔ mɛnilu lɔni tɛrɛ ye, wo doilu ka wo mɛn ka a fɔ ko: «Cɛɛ ɲin ye Nabi Eli le kilila.»
48 Ii tɛma kelen ka a bori ka wa fuu do ta i kɔrɔ, ka a sun rɛsɛnji kumunni rɔ. A ka wo dun kala la ka a la Isa da la ko a ye a min.
49 Kɔni tɔilu ka a fɔ ko: «A to ten. An ye a ragbɛ, ni Nabi Eli ri na ka a kisi.»
50 Isa ka kule kan ba bɔ ikɔ tuun, ka a nii di Alla ma ka sa.
51 Wo waati kelen, Allabatobonba tɛɛtɛɛ faanin farara fila ri ka bɔ san ma ka se duu ma. Duukolo yɛrɛyɛrɛra, farakoloilu tera.
52 Kaburuilu dalakara, mɔɔ sɛniman mɛnilu sani, wo siyaman su kununda.
53 Ii bɔra ii la kaburuilu kɔndɔ. Isa wulini kɔ ka bɔ saya rɔ, ii donda Jerusalɛmu, ni a ye so sɛniman di. Mɔɔ siyaman ka ii yen.
54 Rɔmu kɛlɛden kuntii ni kɛlɛden tɔ mɛnilu ye ii jantola Isa rɔ, woilu ka duukolo yɛrɛyɛrɛ yen, ka ko kɛni woilu fanan yen. Wo rɔ, ii silanda kosɛbɛ. Ii ka a fɔ ko: «Tuɲa le, Alla Dencɛ le tɛrɛ cɛɛ ɲin di.»
55 Muso siyaman tora yɔrɔ jan ka ko woilu ragbɛ. Woilu ni Isa le nani kelen di ka bɔ Kalile. Ii bilani tɛrɛ a kɔ a dɛmɛn kanma.
56 Mariyamu Makidalaka tɛrɛ ye muso woilu rɔ, a ni Yakuba ni Yusufu na Mariyamu, a ni Sebede muso.
Isa su don ko
57 Nba, su kotɔ le tɛrɛ. Cɛɛ nanfulutii do nara, mɛn tɔɔ ko Yusufu. A bɔni Arimate. Ale fanan tɛrɛ ye Isa la karanden do le ri.
58 A wara Pilate madiya ko a ye diɲɛ Yusufu ye wa Isa su ta ka a don. Pilate diɲɛra. A ka a la mɔɔilu jamari ko ii ye Isa su di Yusufu ma.
59 Yusufu wara Isa su ta, ka a kasanke faaningbɛ sɛniman do la.
60 A wara a don kaburu kura kɔndɔ, a tun ka mɔɔilu lɔ mɛn senna farakolo rɔ a jɛrɛ yɛ. Wo kɔ rɔ, a ka kabakurun ba makurukuru ka a la kaburu da la ka wo da tuun. A banni wo la, a bɔra ye ka wa.
61 Mariyamu Makidalaka ni a tɔɔma Mariyamu siini tɛrɛ ka ii ɲa telen kaburu la.
62 Isa sara lon mɛn, wo lon tɛrɛ ye Ɲɔɲɔ lon ɲasii lon de ri. Wo duusa gbɛ, sarakalasela kuntiilu ni Farisilu wulira ka wa Pilate tɛrɛn ye.
63 Ii ka a fɔ a yɛ ko: «Maari, an hankili ye a rɔ ko ka wuyafɔla wo to nii na, a ka a fɔ ko tele fila a sawana a ri wuli ka bɔ saya rɔ.
64 I ye mɔɔilu lɔ kaburu kɔrɔsila fɔɔ tele sawa wa dafa, baa ni a la karandenilu wara a su ta ka a dokon, ka a fɔ mɔɔilu yɛ ko a ra wuli ka bɔ saya rɔ, wuya wo ri juuya ka tamin fɔlɔmanta kan.»
65 Pilate ka a fɔ ko: «Kɔnɔgbɛnnailu ye ai bolo. Ai ye ii lawa ka kaburu kandan ii se ko bɛɛ la.»
66 Wo rɔ, ii wara tɔɔmasere kɛ kabakurun kan, ka kɔnɔgbɛnnailu lalɔ ko ii ye kaburu kɔrɔsi koɲuma.