31
God ghaze, Isipian atrivim mati temer sida
1 E kalabuzibar mɨn itima, azenir namba 11ɨn, an iakɨnir namba 3ɨn, an aruer bar faraghavɨra zuimɨn, Ikiavɨra Itir God kamaghɨn na mɨgei,
2 “O nguazir kamɨn gumazim, nɨ Isipian atrivim ko an gumazamizir avɨriba me mɨkɨm suam:
“Ia Isipia gavgavir bar ekiam iti.
Bizir manamra, ia an mɨn gavgafi?
3 Ia Asirian kantri gɨnɨghnɨgh, a fomɨra tugha bar gavgavigha iti,
mati Lebanonɨn kantrin itir temer sida ruaragha tughav ikia,
aguar diriba ikia dughuazir aghuim isa ruarim ganɨdi.
Egha bar ruaragha ghuanaga overiamɨn ghuariabar suiragha iti.
4 Dɨpar avɨriba nguazimɨn aven ikia temer kam gamizɨ
an aghua ruara.
Ezɨ dɨpar emɨmɨrir mam nguazimɨn aven ikia, dɨpam temer sida ganɨdima
an aghua bar ekefe.
Ezɨ dɨpar isɨn emɨrim ivemara ghua temer kamɨn povim boroghɨn ghua,
uaghan ruarimɨn itir temer igharazir tintinibar itiba bar dar zui.
5 Dɨpar emɨmɨrir zurara itir kam bangɨn, temer kam deraghavɨram aghua bar ruaragha
ruarimɨn temer igharaziba bar dagh afira.
Ezɨ an aguaba aghua bar ekevegha ruari.
6 Ezɨ kuarazir guar igharagha garir avɨrim an aguabar mɨkonibagh ami.
Ezɨ asɨzir atiaba iza an apebamɨn oti.
Ezɨ kantrin gavgavibar gumazamiziba,
temer gavgavir kamɨn dughuazimɨn apengan avughsa iti.
7 Temer kam, aguar bar ruariba ikiava, an ruarimɨn ganganim bar dera.
Ezɨ an biba nguazimɨn aven bar iraghuezɨ a dɨpar avɨriba isi.
8 Godɨn azenim Idenɨn aven, temer sidan tam a ko magh garir puvatɨ.
An ganganim bar dera.
Ezɨ temer guar igharaziba,
an mɨn aguar ruariba itir puvatɨ.
9 Kɨ Ikiavɨra Itir God, kɨ temer kam gamizɨ,
an ganganim bar deragha aguar bar avɨriba iti.
Ezɨ Idenɨn azenimɨn itir temeba,
da an gara an mɨn otivasa.
10 “Ezɨ datɨrɨghɨn, kɨ Ikiavɨra Itir Godɨn Ekiam, kɨ kamaghɨn mɨgei: Temer kam bar ruaragha ghuariabar suiragha, uabɨ fa ghaze, bizir tizitam na batogham?
11 Kamaghɨn amizɨ, kɨ an aghuagha, a isa kantrin igharazibar atrivimɨn agharim gatɨ. Ezɨ atrivir kam temer kamɨn arazir kuram bangɨn ivezir kuram a ganɨngi. Ezɨ kɨ uabɨ a makunigha gɨfa.
12 Kantrin kurar igharazibar adarazi iza, an okegha anetaghizɨ, a irɨghav iti. Ezɨ an aguaba tintinibar mɨghsɨaba ko danganir zaribar ire. Kantrin igharazibar gumazamizir an aguabar dughuazibar apengan itiba, anetegha igharagha ghue.
13 Eghtɨ kuaraziba izɨ temer irɨzir kam gisɨn dapiam, eghtɨ asɨzir atiaba izɨ an aguabagh isɨn daruam.
14 Kamaghɨn amizɨ, datɨrɨghɨn ikegh mangɨva temer deravɨra dɨpam isava aghuir ruaribagh amiba, ua puvatɨgham. Temeba bar arɨghiram, mati gumazamiziba ariaghira ghua Oveaghuezibar Nguibamɨn iti.
15 “Kɨ Ikiavɨra Itir Godɨn Ekiam, kɨ kamaghɨn mɨgei: Temer kam, Oveaghuezibar Nguibamɨn ghuzir dughiamɨn, kɨ nguazimɨn apengan itir dɨpabagh amizɨ, da azir akam gamua bar anevara. Kɨ dɨpabar anogoroghezɨ, da uam emɨrir puvatɨ. Kɨ mɨtarmem gamizɨ, a Lebanonɨn Mɨghsɨaba avarazɨ, da temer kam bagha azi. Ezɨ kɨ ruarir ekiamɨn temeba bar dagh amizɨ, da mɨsɨngi.
16 Kɨ temer kam, mozim magɨramin temer igharaziba sara, da isɨ Oveaghuezibar Nguibamɨn me akunamin dughiamɨn, dar irɨrimɨn tɨngagharim, kantriba bar a bareghɨva akongam. Eghtɨ Idenɨn azenimɨn temeba ko Lebanonɨn temer bar aghuiba ko, temer igharazir deravɨra dɨpam isiba, me an irɨrim baregh bar akongegham.
17 Gumazamizir an dughuazimɨn apengan ikeziba, kar kantrin an akurvaghiziba, me a ko Oveaghuezibar Nguibamɨn mangɨ apaniba faragha mɨdorozir sabamɨn mɨsoghezir gumaziba ko ikiam.
18 “Isipɨn atrivim, nɨ ko nɨn gumazamizir avɨrim, ia mati temer kam, nguazir kamɨn ikia bar ruaragha gavgafi. Ezɨ Idenɨn azenimɨn aven temetam nɨn mɨn ruaragha gavgavizir puvatɨ. Ezɨ datɨrɨghɨn, me nɨ okeghtɨ nɨ irɨ, mati Idenɨn ikezɨ temeba bar ariaghire. Nɨ Oveaghuezibar Nguibamɨn mangɨ, God gɨfozir puvatɨziba ko mɨdorozimɨn aven ariaghirezir darazi ko ikiam. Arazir kaba, da Isipɨn atrivim ko an gumazamizir avɨrim bativam. Kɨ Ikiavɨra Itir Godɨn Ekiam, kɨ mɨkemegha gɨfa.”