32
Isipɨn atrivim ikuvigham
1 E kalabuziabar mɨn itima, namba 12ɨn azenim otozɨ, an iakɨnir namba 12ɨn, an aruer faragha zuimɨn, Ikiavɨra Itir God kamaghɨn na mɨgei:
2 “O nguazir kamɨn gumazim, nɨ Isipɨn atrivim bagh azirakar ighiar kam bangɨva a mɨkɨm suam:
“Atrivim, nɨ uabɨ mɨgɨa ghaze,
nɨ mati laionɨn mam kantribar tongɨn iti.
Ezɨ puvatɨ, nɨ goar ekiar mamɨn mɨn ongarim abɨghava arui.
Nɨ fanebagh aruima nɨn dagariba dɨpaba dɨtima da kovakova nedi.
3 Kɨ Ikiavɨra Itir Godɨn Ekiam kɨ kamaghɨn mɨgei:
Kɨ ikɨzir igharazibar gumazamizir avɨriba inigh izɨ me akuvagh men damazimɨn,
kɨ uan iver ekiam nɨ mɨkɨnigh nɨ gekuigh azenim mɨkɨnigham.
4 Egh kɨ nɨ isɨ nguazimɨn azenara nɨ akunigham.
Eghtɨ kuarazir pɨn mɨghagha aruiba ko nguazir kamɨn asɨzir atiaba izɨ,
nɨ amɨ bar izevegham.
5 Kɨ nɨn asɨzir nataba mɨghsɨabav kɨnigh,
egh nɨn asɨzir nar ikuviba isɨ,
danganir zaribav kɨnightɨ, danganir zariba bar izevegham.
6 Kɨ nɨn ghuzim ingeghtɨ, a danganiba bar dar emɨr mangam.
Egh fanebagh izevegh mɨghsɨaba avegham.
7 Kɨ nɨ gasɨghasɨghamin dughiamɨn,
kɨ overiam avaragh mɨkovezibar angazangariba amungegham.
Egh overiamɨn ghuariabar amightɨ da aruer angazangarim apazaghtɨ a isiraghan kogham.
Eghtɨ iakɨnim uaghan isiraghan kogham.
8 Guizbangɨra, kɨ overiamɨn angazangariba bar ada mungegham.
Eghtɨ nɨn kantri bar mɨtarmegham. Kɨ Ikiavɨra Itir Godɨn
Ekiam, kɨ kamaghɨn mɨkeme.
9 “Kɨ ia amadaghtɨ ia kantrin ia fozir puvatɨzibar mangɨ
dar aven kalabuziabar mɨn ikiam.
Eghtɨ ikɨzir igharazibar gumazamizir avɨrim,
kɨ nɨ gasɨghasɨghizir biarir kam baregh bar atiatigham.
10 Kɨ nɨ gamizir bizir kam, Kantrin Igharazibar Gumazamizibar amightɨ,
me dɨgavir kuram damigham.
Men atriviba ian biarim baregh atiatigham.
Kɨ uan mɨdorozir sabamɨn nɨ gasɨghasightɨ,
atriviba ko men gumazamiziba bizir kamɨn ganigh,
puvɨra atiatingɨva nɨghɨva akongam.
Egh me vaghvagh uarigh nɨghnɨgh kamaghɨn mɨkɨm suam,
God ti arazir kamra uaghan e damigham.
11 “Kɨ Ikiavɨra Itir Godɨn Ekiam, kɨ Isipɨn atrivim mɨgɨa ghaze:
Babilonɨn atrivim uan mɨdorozir sabamɨn nɨ mɨsoghsɨ izam.
12 Kɨ kantrin kurar kabar mɨdorozir gumazir bar gavgaviba amangightɨ,
me izɨ uan mɨdorozir sababar nɨn gumazamizir avɨrim bar me mɨsoghɨrarigham.
Egh me bizir aghuir, ia Isipia da bagha uan ziaba fa bar akongeziba,
me bar dagh asɨghasigham.
13 Eghtɨ nɨn bulmakaun dɨpar avɨriba itir danganibar ikiava apiba,
kɨ bar adav soghɨrarɨgham.
Eghtɨ bulmakauba ko gumazamiziba ua ikɨ dɨpaba dɨkan kogham.
Egh dar amutɨ da nengan kogham.
14 Kɨ ian dɨpabar amightɨ da dɨkɨrigh,
olivɨn boremɨn mɨn amɨraghvɨra emɨr mangam.
Kɨ Ikiavɨra Itir Godɨn Ekiam kɨ mɨkemes.
15 Kɨ Isipɨn nguazim gasɨghasightɨ a ikuvigh nguazir kɨnimɨn mɨn ikiam.
Egh kɨ uaghan gumazamiziba ko bizir an aven itibagh asɨghasigham.
Eghtɨ me kamaghɨn fogh suam, kɨ Ikiavɨra Itir God.
16 Eghtɨ kantrin igharazibar amiziba, Isipɨn kantri ko an itir gumazamizir avɨrim bagh azirakar ighiar kam bangam.
Kɨ Ikiavɨra Itir Godɨn Ekiam, Kɨ mɨkemegha gɨfa.”
Gumazamizir Oveaghuezibar Nguibamɨn itiba
17 E kalabuziabar mɨn itima, azenir namba 12ɨn, an akɨnir faragha zuimɨn, aruer namba 15ɨn, Ikiavɨra Itir God, kamaghɨn na mɨgei:
18 “O nguazir kamɨn gumazim,
nɨ Isipɨn gumazamizir avɨrir kam bagh azi.
Egh nɨ me amadaghtɨ,
me mangɨ kantrin gavgavir igharazibar gumazamiziba ko, Gumazamizir Oveaghuezibar Nguibamɨn magɨrɨ.
19 Nɨ kamaghɨn Isipian mɨkɨm suam,
ia ghaze, ia ti bar deragha gumazamizir igharazibagh afira? Bar puvatɨ.
Ia magɨrɨ gumazir Oveaghuezibar Nguibamɨn,
God gɨfozir puvatɨzir gumazamiziba, me ko ikɨva avughsɨ.
20 “Isipia gumazamizir mɨdorozir sabamɨn ariaghirezibar tongɨn, me arɨmɨghiram. Kɨ me isa apanibar dafarim gatɨ, ezɨ me Isipɨn gumazamizir avɨrim mɨsoghasava ami.
21 Eghtɨ Oveaghuezibar Nguibamɨn aven, gumazir faragha mɨdorozimɨn ziar ekiaba ikeziba, Isipia ko Isipɨn akuragha mɨsoghezir darazi mɨkɨm suam: kar Gumazir God gɨfozir puvatɨziba, me mɨdorozir sabamɨn ariaghiregha izaghira Oveaghuezibar Nguibam gireghav iti.
22 “Asirian kantri uaghan Nguibar kamɨn iti, ezɨ an mɨdorozir gumazibar moziba uaghan iti. Apaniba mɨdorozimɨn aven bar moghɨra me mɨsuagharɨki.
23 Ezɨ men kuaba afir moziba, Oveaghuezibar Nguibamɨn saghuiamɨn itir danganim iti. Ezɨ Asirian kantrin mozim uabɨ, an mɨdorozir gumazibar moziba an okarizɨ, a men torimɨn iti. Asiriaba faragha angamɨra itir dughiamɨn, me gumazamizibagh amizɨ, me puvɨrama aguava atiati.
24-25 “Kantri Elam, ko an mɨdorozir gumaziba bar moghɨra mɨdorozimɨn ariaghire. Ezɨ an mɨdorozir gumazibar moziba bar an mozim okarizɨ, a tongɨra iti. Elamia God gɨfozir puvatɨgha, me angamɨra ikiavɨra ikia gumazamizir avɨrim gamizɨ, me aguava atiati. Me datɨrɨghɨn uaghira Oveaghuezibar Nguibamɨn ikia, gumazir aremezibar tongɨn ireghav ikia bar aghumsɨki.
26 “Kantri Mesek ko kantri Tubal, ko aningɨn mɨdorozir gumazir avɨrim uaghan danganir kamɨn iti. Ezɨ aningɨn mɨdorozir gumazibar moziba bar aningɨn mozimning okarizɨ, aning tongɨra iti. Kantrin kamningɨn gumaziba God gɨfozir puvatɨgha, mɨdorozimɨn aven bar ariaghire. Aning angamɨra ikiavɨra itir dughiamɨn, aning kantrin avɨribar gumazamizibagh amizɨ me aguava atiati.
27 Me nguibar kamningɨn mɨdorozir gumazir kaba, mozibagh arɨgha gumazir onganarazibagh amibar mɨn pura me afi. Me fomɨra mɨdorozir gumaziba mozibagh arɨzir arazibar gɨn ghua me afir puvatɨ. Me men arazir kurar me fomɨram amizibar gɨn ghua, men mɨdorozir sababa men dapanibar aghonegha, men oraba men agharibagh isɨn arɨki, ezɨ me Gumazamizir Oveaghuezibar Nguibamɨn ghuaghiri. Mesek ko Tubal angamɨra itir dughiamɨn, aning gumazamizir bar avɨrim atiatim me ganɨngi. Kamaghɨn amizɨ, aningɨn arazir kurabar osɨmtɨzim aningɨn ikiavɨra itima aning areme.
28 “Eghtɨ kantri Isip uaghan ikuvigh mangɨ, apaniba mɨdorozimɨn mɨsuagharɨghizir gumazibar tongɨn ikiam. Gumazir kaba, me God gɨfozir puvatɨ.
29 “Ezɨ kantri Idom uaghan Oveaghuezibar Nguibamɨn iti. A uan atriviba ko gumazir dapaniba ko iti. Fomɨra Idomia mɨdorozir gumazir bar gavgavibar mɨn ike. Egha datɨrɨghɨn, me ariaghiregha ghua apaniba mɨdorozimɨn mɨsoagharɨghizɨ gumaziba ko iti. Gumazir kaba God gɨfozir puvatɨ.
30 “Ezɨ notɨn amadaghan itir atriviba uaghan bar danganir kamɨn iti. Ezɨ Saidonia me ko iti. Idomia fomɨra bar gavgavigha gumazamizir avɨriba atiatim me ganɨdi. Egha datɨrɨghɨn me ariaghiregha, ghua gumazir igharazir apaniba mɨdorozimɨn aven mɨsoagharɨghɨziba ko iti. Gumazamizir kaba God gɨfozir puvatɨ. Egha me gumazamizir faragha Oveaghuezibar Nguibamɨn itiba ko, vɨrara ivezir kurar magh garim inigha, men mɨn bar aghumsɨki.
31 “Isipɨn atrivim, danganir kamɨn izegh gantɨma, gumazir igharazir aremeziba danganir kamɨn ikiam. Eghtɨ a navim deragham, egh uan mɨdorozir gumazir avɨrir ovengeziba bagh bar aghumsɨghan kogham. Kar an mɨdorozir gumazir apaniba mɨsogheziba. Kɨ Ikiavɨra Itir Godɨn Ekiam, kɨ kamaghɨn mɨkeme.
32 Kɨ uabɨ Isipɨn atrivim gamizɨ, a uan mɨdorozir gumaziba ko gumazamizir avɨrim atiatim me ganɨngi. Ezɨ datɨrɨghɨn, apaniba mɨdorozimɨn an mɨdorozir gumazir avɨrim mɨsoghɨrarightɨ, me mangɨ Oveaghuezibar Nguibamɨn ikɨ apaniba mɨdorozimɨn mɨsuagharɨghizir gumazibar tongɨn ikiam. Gumazir kaba me God gɨfozir puvatɨ. Kɨ Ikiavɨra Itir Godɨn Ekiam, kɨ kamaghɨn mɨkemegha gɨfa.”