3
Jerusalemɨn gumazamizibar dabirabim bar ikuvigham
Ia oragh! Ekiam, a Ikiavɨra Itir Godɨn Gavgaviba Bar Itim,
a kɨran oveghangɨn Jerusalem ko Judan gumazamiziba, me da, men akurvaziba ko biziba bar da batuegham,
kar bizir me gamima men dabirabim deraziba.
A men dagheba ko dɨpaba bar da agɨvagham.
A men mɨdorozir gumazir gavgaviba ko mɨdorozir gumazir igharaziba sara batuegham,
egh kotiaba barazir gumaziba ko, Godɨn akam inigha izir gumaziba ko, kukunir gumaziba ko, nguibar ekiabar garir gumazir dapaniba batuegham.
Egh a uaghan mɨdorozir gumazibar gumazir ekiaba ko, gavmanɨn gumazir ekiaba ko, gumazir nɨghnɨzir aghuiba atrivim ganɨdiba, a bar me batuegham.
Egh gumazir bizir igharagha garir avɨribar ingariba ko, gumazir imezibagh amiba batuegham.
Egh kɨ pura otarir igiaba ateghtɨ, me Jerusalem ko Judan gumazir dapanibar otivigham.
Egh me uan ifongiar onganibar kantrin ganɨva, arazir guar avɨribar amuam.
Egh gumazamiziba uarigh afighafighsɨ, igharaz darazi dɨkabɨnam.
Namakaba uaghan uari dɨkabɨnam.
Eghtɨ gumazamizir igiaba, me uan gumazamizir ghuribar akaba munasɨ, me batogham.
Eghtɨ gumazamizir nɨghnɨzir kuraba itiba, me gumazamizir nɨghnɨzir aghuiba itibar akaba batogham.
 
Eghtɨ dughiar kamɨn, gumazim uan aveghbuamra bagh mangɨ kamaghɨn a mɨkɨm suam,
“E gari, nɨ daghuamin korotiar ruarir mam iti.
Nɨ en gumazir dapanimɨn otoghɨva,
danganir kurar me bizir kuraba makunir kam gativagham.”
Eghtɨ a kamaghɨn men akam ikaragham,
“Kɨ ian akurvaghamin tuaviba puvatɨ.
Kɨ uaghan dagheba ko iniba nan dɨpenimɨn puvatɨ.
Ia na mɨseveghtɨ, kɨ ian gumazir dapanimɨn otivan markɨ.”
 
Jerusalem ko Juda, men mɨgɨrɨgɨaba ko ingangariba,
Ikiavɨra Itir God dɨkabɨrava, an ziar ekiam gasɨghasɨsi.
Egha me arazir kurar kaba an damazimɨn dagh ami.
Kamaghɨn amizɨ, dughiar kuram me batozɨma, me akuiaghirɨgha uaghiri.
Egha me kotiaba barazir dughiabar, me ifongezir gumazamizibaram akurvagha igharaz darazi dɨkabɨri.
Ezɨ men arazir kamra, me isa kotiam garɨsi.
Sodomia fomɨram amizɨ moghɨra,
me gumazamizir igharazibar damazibar arazir kuram damuan aghumsɨzir puvatɨ.
Mevzika!
Me ikuvigham. Me uari arazir kuram gamigha an osɨmtɨzim ateri.
Kamaghɨn amizɨ, me uan arazir kuramɨn ivezim ateram.*
 
10 Gumazir Godɨn damazimɨn deraziba, ia me mɨkemegh,
Me uan ingangaribar ivezir aghuim iniam,
kamaghɨn, me bar akongegh.
11 Ezɨ gumazamizir kuraba, mevzika! Me bar ikuvigham!
Me uan dafaribar amizir arazir kuraba, gumazir igharaziba me ikarvagh
arazir kurar me amizir kabara, me danɨngam.
 
12 O nan gumazamiziba, iavzika!
Ian gumazir dapaniba ia gifara ia gamizɨ, ia men gɨn tuavir kurabar ghue.
Ezɨ borir igiaba ko amiziba ia gativagha, ia dɨkabɨra paza ia gami.
 
13 Ezɨ Ikiavɨra Itir God gumazamiziba bar men kotiaba baragha, me tuisɨghasav ami.
14 Egha Ikiavɨra Itir God uan gumazamizibar gumazir dapaniba ko gumazir aruaba ko kotiam gamua kamaghɨn me mɨgei,
“Nan gumazamiziba mati, nan wainɨn azenim,
ezɨ iarara azenir kam gasɨghasigha, an itir biziba bar da okeme.
Ia gumazamizir biziba otevezibar apangkuvir puvatɨ. Bar puvatɨ.
Men bizir muziariba, ia me da da isava uan dɨpenibar da pozibav kɨri.
15 Tina ia mɨkemezɨma, ia nan gumazamizibagh asɨghasɨsi, a?
Ia gumazir biziba puvatɨziba paza me gami,
mati me gumazim isa, nguazim mɨkɨnigha an dapanim dɨkaragha nguazim gisɨn a rɨghɨrɨsi.
Kɨ Ekiam, kɨ Ikiavɨra Itir Godɨn Gavgaviba Bar Itim,
kɨ guizbangɨra ia mɨgei, ia bar arazir kuram gami.”
Saionɨn itir amizir puv uari feba, me bar ivezir kuram bativam
16 Egha Ikiavɨra Itir God kamaghɨn mɨgei, “Ia Saionɨn itir amizibar gan.
Me ghaze, me bar pɨn mar iti.
Me aruir dughiabar, gumazamiziba men ganasa
me uan suer kurkazibar amutɨ da tɨngaghasa, me pura darorir afangtɨzir kabagh ami.
Me arua uan dapaniba fezɨ, men fɨriba bar ruara,
ezɨ men damaziba pura tintinibar gumazibar gari.”
17 Kamaghɨn amizɨ, Ekiam amizir kaba ivezir kuram me danigham.
Ikiavɨra Itir God Saionɨn amizibar amutɨ, duaba men dapanibagh izɨvagham,
eghtɨ me men dapanibar arɨziba bar dagh iseghtɨ, me bar aghumsɨzir dafam iniam.
 
18-19 Eghtɨ dughiar kamɨn, Ekiam Saionɨn amizibar kurkaziba, bar me da ada adegham. Kar men kurkaziba: suer averiaba ko, segiaba ko, boavtariba ko, kuarir kurkaziba ko, dafarivteba ko, dapaniba aver nir avɨziba ko, 20 dapaniba kurkamin sorɨba ko, men daveriaba ko, mɨteba ko, forivtarir muziarir borer mughuriar aghuim zuim azuiba ko, bizir me suigha akavsiar arazibagh amiba ko, 21 ziaba itir ringɨn aghuiba ko, ngueba ko, 22-23 korotiar bar aghuiba ko, azenan azuir korotiar ruariba ko, saketɨn aghuiba ko, dagɨaba azuir forivtariba ko, guabar garir ganganiba ko, korotiar me nir ghurghurir aghuibar isamiziba ko, dapanir asuaba ko, inir aghuiba. Ekiam bar me dama da adegham.
 
24 Eghtɨ dughiar kamɨn, Saionɨn amiziba, fomɨra deragha kurti moghɨn ua kurukan kogham.
Me borer mughuriar aghuim zuiba puvatɨgham,
eghtɨ men mɨkarziba bar puvɨra mughagham.
Me ua mɨteba uan ivariaba amɨghɨnan kogham,
egh uan ivariaba pura benir kɨnibar uari amɨghɨnan.
Me ua deraghvɨra uan dapanir arɨzibar akɨrigh da asɨngan kogham,
eghtɨ men apaniba izɨ, men dapanir arɨziba bar dagh iseghtɨma, me onariba mɨsegh ikiam.
Me korotiar bar diriba ua da aghuan kogham,
egh me korotiar bɨbɨzir kurabar aghuam.
Eghtɨ men guar bar aghuiba, men apaniba kalabuziabar dɨghoribar mɨn me aghor me tuegham.
Eghtɨ me bar aghumsigham.
25 O Jerusalem, nɨn apaniba, nɨn mɨdorozir gumazir gavgaviba ko nɨn gumazir igharaziba mɨsoghtɨ,
me arɨghiregham.
26 Egh me nɨn biziba bar da inigham.
Nɨ mati amizim, me bar an korotiaba suezɨ, a pura bibiamra nguazim gaperaghav iti moghɨn ikiam.
Eghtɨ nɨn gumazamiziba nɨn gantɨ,
bizir kaba nɨ bativtɨ, men naviba bightɨ me bar puv aziam.
 
* 3:9 Gumazir maba kamaghɨn nɨghnɨsi, akar kam ababanir pumuningɨn tongɨn iti, “Nɨ men guabara ganigh fogh suam, kar gumazir arazir kurabagh amiba.” 3:17 Hibrun akam deragha mɨgɨrɨgɨar kamɨn mɨngarim abɨghizir puvatɨ. 3:22-23 E datɨrɨghɨn deragha fozir puvatɨ, fomɨra ikezir kurkazir kaba, da ti manmaghɨra gari.