4
1 Dughiar kamɨn, 7plan amiziba gumazitamɨn suiragh a muigh, kamaghɨn pamtem a gakaghonam,
“E dagheba ko korotiaba uari uarir akurvagh ikiam.
E paba puvatɨgha bar aghumsɨki.
Kamaghɨn amizɨ, e uari, nɨ en pam gavagh.”
Jerusalem ua deragh zuegh ikiam
2 Dughiatam gɨn otoghtɨ, Ikiavɨra Itir God Ter Aguam damightɨ, a ua ghuzir igiam otogham. Eghtɨ a nguazim damutɨ dagher aghuiba otivam. Eghtɨ Israelian ikiavɨra itir varazira, me bizir kabar gantɨ, da bar deraghtɨ, me bar akuegham.
3 Jerusalemɨn ikiavɨra itir gumazamizir kaba, me Saionɨn ikiavɨra itir varazira, God angamɨra ikiasa me amɨsevegha gɨfa, egha uan akɨnafarimɨn men ziaba osiri. Egh a datɨrɨghɨn me dɨpon suam, me an gumazamizibara.
4 Ekiam Jerusalemɨn nguibam damightɨ, a ua deragh zueghasa. A uan gavgavir ekiamɨn, avimɨn mɨn izɨ gumazamizibar araziba tuisɨgh, egh Saionɨn amizibar arazir mɨzɨrɨziba bar da ruva da gɨn amadagham. Egh uaghan Jerusalemɨn gumaziba, gumazir igharaziba mɨsozi men ghuziba irezir araziba ruegham. Dughiar kamɨn Jerusalem zuegh gɨvagham.
5 Gumazamiziba Saionɨn Mɨghsɨamɨn pɨn Godɨn ziam fɨsɨ uari akuvaghtɨ, Ikiavɨra Itir God ghuariatam damightɨ, an otogh Saionɨn Mɨghsɨam avaragham. Aruebar, ghuariam a gisɨn ikiam, egh dɨmagaribar, a mɨgharim ko avir mɨzariar angazangarimɨn mɨn isi ikiam. Ghuariar kam, averpenimɨn mɨn an mɨghsɨam gisɨn guraghɨv ikɨ, an ziar ekiam ko angazangarir ekiamɨn aven itir bizir aghuiba, an a da avaragham.
6 Averpenir kam mati, Godɨn gavgavim ko angazangarimɨn ababanim, a Jerusalem avɨva, aruer bar gavgavim apazagham, egh uaghan amozir ekiabar dughiamɨn, a Jerusalem damutɨ, a deravɨra ikiam.