48
Gumazamiziba ziar ekiam Godra danɨng
Ia Jekopɨn anabamɨn adarasi, ia gumazamizir Israelɨn ziam itiba, ia Judan ovavir boriba, ia oragh!
Ia gavgavim uan akam danɨngasa,
Ikiavɨra Itir Godɨn ziam dɨbora akaba akɨri.
Egha ia ghaze, ia Israelian Godɨn ziam fe.
Egha ia ifara guizbangɨra an apengan ikiava,
guizɨn akaba ko arazir aghuibar gɨn zuir puvatɨ.
Egha ia uarira uan ziaba fa ghaze,
ia God baghavɨra itir nguibar ekiar kamɨn gumazamiziba.
Egha ia Israelian Godɨn akurvazim iniasa a mɨzua iti.
An ziam, Ikiavɨra Itir Godɨn Gavgaviba Bar Itim.
+A kamaghɨn ia mɨgei,
“Bar fomɨra, kɨ gɨn otivamin bizibar akam akuni.
Egha kɨ zuamɨra dagh amizɨ, da otifi.
Kɨ kamaghɨn bar fo, ian dapaniba mati dagɨaba ko ain,
ezɨ ia nan akabar gɨntɨzir puvatɨ.
Kamaghɨn amizɨ, kɨ fomɨra bizir gɨn otivamibar akar kam akuni,
egha kɨ zuamɨra dagh amizɨ, da otifi.
Kɨ kamaghɨn aghua, ia ti mɨkɨm suam, ian marvir guar ia temeba ko ainbar ingarizir nedazir kaba,
me bizir kabagh amizɨ, da otifi.
Kɨ bar aghua,
kamaghɨn amizɨ, kɨ fomɨra bizir gɨn otivamibar gun ia mɨkemegha gɨfa.
 
“Bizir kɨ fomɨram otivasa mɨkemeziba,
da otivigha gɨvazɨ ia dar gani.
Ezɨ ia datɨrɨghɨn kamaghɨn mɨkɨm suam,
‘Ekiam, a guizbangɨra mɨgei.’
Egh kɨ datɨrɨghɨn bizir igiar otivamibar gun ia mɨkɨmam,
kar bizir mueghav itir kɨ fomɨra ia mɨkemezir puvatɨziba,
ia tɨghar da baragham.
 
“Bizir kaba, kɨ datɨrɨghɨn dar ingari,
kɨ fomɨra dar ingarizir puvatɨ.
Ia faragha zuir dughiamɨn,
ia da baragha dagh fozir puvatɨ.
Kɨ datɨrɨghɨn mɨkɨmtɨ, bizir bar igiaba otivam, bizir fomɨram otivizir puvatɨziba.
Eghtɨ ia kamaghɨn mɨkɨman kogham, ‘E bizir kabagh fogha gɨfa.’
Guizbangɨra, ia fomɨra bizir kaba bar dagh fozir puvatɨ.
Kɨ kamaghɨn fo, kɨ ian ingara ia gamizɨ,
ia gumazamizir ikɨzir vamɨran otozir dughiamɨn ikegha, iza datɨrɨghɨn,
ia akaba munasa da barazir puvatɨzir adarasi.
Egha kɨ fo, ia ifavarir gumazamiziba.
Kamaghɨn amizɨ, kɨ bizir kabar gun ia mɨkemezir puvatɨzɨ,
ia dagh fozir puvatɨ.
 
“Kɨ bar ia basemegha bar ia agɨvasava ami.
Egha kɨ zurara uan ziar ekiam gɨnɨghnɨgha,
ia bagha uan anɨngagharim dɨkabɨri.
Kamaghɨn amizɨ, kɨ ia gasɨghasɨghan kogham.
Eghtɨ gumazamizir igharaziba nan ziam fam.
10 Kɨ ia damightɨ ia zueghasa nɨghnɨsi,
egha kɨ avimɨn ia tuezir puvatɨ,
mati gumazim silvan mɨneziba adangasa avimɨn da tue.
Ia uan arazir kuraba ataghɨraghasa,
kɨ osɨmtɨzir guar avɨriba ataghizɨ, da ia batifi.*
Kɨ tuavir kamɨn ian nɨghnɨziba ko araziba tuisɨsi.
11 Kɨ uan ziar ekiam gɨnɨghnɨgha arazir kamɨn ia gami.
Gumazamiziba nan ziam gasɨghasɨgh a dɨkabɨn, ziar ekiam igharaz darazir anɨngan kɨ aghua.
Bar guizbangɨra, me ziar ekiam narara danɨngam.”
Ikiavɨra Itir Godra, Sairus amɨsevegha a gamima, a Babilonia dɨkabɨra
12  +Ezɨ Ikiavɨra Itir God kamaghɨn mɨgei,
“Ia Israelia, ia gumazamizir kɨ diaziba,
ia Jekopɨn anabamɨn adarasi, ia nan akam baragh!
Kɨ uabɨra kɨ God.
Kɨrara, kɨ bar faraghavɨra iti,
egh kɨ ikɨvɨra ikɨ mangɨ bar gɨn dughiar abuananamɨn uaghan ikiam.
13  +Kɨ uan dafarimningɨn nguazim gamigha gavgavim an povim ganɨngizɨ a gavgafi,
egha kɨ overiam isa an danganimɨn anetɨ.
Egha kɨ overiam ko nguazimɨn diazir dughiamɨn,
aning zuamɨra ivegha iza nan damazimɨn tu.
 
14 “Ia bar moghɨra, ia izɨ uari akuvagh, nan akam baragh!
Asetam fomɨra kamaghɨn akatam ia mɨkemezir puvatɨ,
‘Gumazir Ikiavɨra Itir God bar ifongezim, Godɨn ingangarim damusɨ, a izɨ Babilonia ko mɨsogham.
Ikiavɨra Itir Godɨn gavgavimɨn, a Babilon dɨkabɨragham.’
Aseba kamaghɨn mɨkemezir puvatɨ.
15 Gumazir kam izasa, kɨ uabɨ ia mɨkeme.
Kɨ uabɨ izasa an dia.
Ezɨ kɨ uabɨ a inigha iza a gamima,
a deravɨra ingara an ingarimɨn daghem oto.
 
16 “Ia nan boroghɨra izɨ nan akam baragh!
Fomɨra iza datɨrɨghɨn, kɨ mogomer danganitamɨn ikia otivamin bizibar gun mɨgeir puvatɨ.
Bar puvatɨ.
Bizir kaba tɨghar otivamin dughiamɨn,
kɨ faragha ikia dar garima da otifi.”
 
Kamaghɨn amizɨ, Ikiavɨra Itir God, nan Ekiam,
uan Duam na ganɨga na amadazɨma,
kɨ an Duamɨn gavgavim sara izi.
Ikiavɨra Itir God uan gumazamiziba deragh me damuasa iti
17 Ezɨ Ikiavɨra Itir God, ian Akurvazir Gumazim, a Israelian Godɨn Bar Zuezim, a kamaghɨn mɨgei,
“Kɨ Ikiavɨra Itir God, ian God.
Kɨ zurara ian sure gamua,
arazir zuruzir ia gɨntɨgh deravɨra ikiamiba ian akakasi.
18  +Ia ti nan Akar Gavgaviba baraghizɨ, kɨ ian akurazɨ ia datɨrɨghɨn deravɨra ikiai,
ezɨ ia dabirabir aghuimɨn ikiai, mati fanemɨn dɨpaba zurara izɨva gevir puvatɨ.
Egh arazir aghuim ti ian ikia gavgavigha mamaghɨra ikiai,
mati ongarim, ongarir dadarimɨn dɨpɨraghira kamaghɨra iti.
19 Egha ian boriba otiva,
mati ongarir dadarimɨn gigimɨn mɨn bar avɨrasemeghai.
Ezɨ men ziaba nan damazimɨn gɨvaghan koghai.”
 
20  +Ia kantri Babilon ategh,
nguibar kamɨn gumazamizibar arɨmangɨgh.
Egh ia bar akuegh pamtemɨn tiariba akar, egh kamaghɨn akam amadaghtɨma
a nguazir kamɨn ruaghatevibar mangɨ,
“Ikiavɨra Itir God uamategha uan ingangarir gumazim Jekop, uam a ini.”
21  +Fomɨra Ikiavɨra Itir God uan gumazamizibar akua, me inigha danganir dɨpaba puvatɨzimɨn ize,
ezɨ me dɨpam bangɨn ariaghirezir puvatɨ.
A dɨpam gamizɨma, a dagɨamɨn oto.
A dagɨam kuizɨ, dɨpam iri me anepi.
 
22  +Ikiavɨra Itir God kamaghɨn mɨgɨa ghaze,
“Gumazamizir arazir kurabagh amiba,
me dabirabir aghuim batoghan kogham.”
+ 48:3 Aisaia 42:8-9; 46:8-10 * 48:10 Hibrun akam deragha vezɨn kamɨn mɨngarim abigha a mɨkemezir puvatɨ. + 48:12 Aisaia 44:6; Akar Mogomem 1:17; 22:13 + 48:13 Onger Akaba 102:25; Aisaia 40:26 48:16 Ves 48:16ɨn akar faragha itim, Hibrun akam deragha an mɨngarim abigha an gun mɨkemezir puvatɨ. Ezɨ an namba 2ɨn akam, e fozir puvatɨ, tinara ghaze, God anemada. Gumazir maba ghaze, kar Godɨn akam inigha izir gumazimɨn akamra. Ezɨ marazi ghaze, kar Ikiavɨra Itir Godɨn ingangarir gumazimɨn akam. (Nɨ Aisaia 42:1ɨn gan.) Ezɨ marazi ghaze kar Atrivim Sairusɨn akam. + 48:18 Godɨn Araziba 32:29; Onger Akaba 81:13; 119:165 + 48:20 Akar Mogomem 18:4 + 48:21 Ua Me Ini 17:1-6; Dɨboboniba 20:2-11 + 48:22 Aisaia 57:21