53
1 Ezɨ gumazamiziba akam ikaragha ghaze,
“Tinara datɨrɨghɨn, e orazir akaba nɨghnɨzir gavgavim adar iti?
Terara, Ikiavɨra Itir God, uan ingangarir gavgaviba isa men akazɨ,
me dar gani?
2 Guizbangɨra, Ekiam uan ingangarir gumazim ataghizɨ,
a mati temer mam nguazir mɨsɨngizimɨn oto.
Ingangarir gumazir kam, an ganganim tong en damazibar derazir puvatɨ,
kamaghɨn amizɨ, a ziaba puvatɨ.
Ezɨ bizir aghuitam an itir puvatɨ, eghtɨ e an ganɨva a gakongam.
3 Ezɨ gumazamiziba akɨrim ragha a gasaragha, pazavɨra a gamua bar a gifongezir puvatɨ.
Ezɨ mɨzaziba ko osɨmtɨzir avɨriba a gizɨfa.
Gumazamiziba an ganan aghuagha, uan guaba monge.
Egha akɨrim ragha bar a gasara.
Ezɨ e an gara ghaze,
a pura gumazir kɨnim.
4 “E nɨghnɨgha ghaze,
God ti ivezir kuram a ganɨga, a mɨsogha osɨmtɨzir kabagh amizɨ, da a batifi.
Ezɨ puvatɨ.
Ingangarir gumazir kam, e bagha en osɨmtɨziba ko mɨzaziba isa da ateri.
5 Ezɨ en akaba batozir arazim bagha, me an ekianim bɨra.
Arazir kurar e amiba bangɨn, me a dɨkabɨragha a gasɨghasɨki.
Egha me puv a mɨsozima an mɨkarzim tintinibar bɨaghire,
mɨzazir a inizir kam e gamizɨ, e ghuamaghegha ua deragha bar deravɨra iti.
6 Guizbangɨra, e bar moghɨra sipsipbar mɨn tintinibar arua,
vaghvagha uan ifongiabar gɨn arui.
Ezɨ Ikiavɨra Itir God, en arazir kuraba ikarvaghsɨ pazavɨram e damuan fɨrɨn,
a kamaghɨn amizir puvatɨ.
A uan ingangarir gumazim gamizɨ,
a en danganim inizɨ, e iniamin mɨzaziba, an ada isa a ganɨngi.”
7 Gumaziba ingangarir gumazir kam pazav a gami,
ezɨ a uabɨ dɨkabɨra mɨzazir kuram ini.
Egha mɨgɨrɨgɨar tam gamizir puvatɨ.
A mati sipsipɨn nguzim uan akam dukuazɨ,
me a mɨsueghtɨ an aremeghasa a inigha zui.
Egha uaghan mati sipsip me an arɨziba aghorasava amima,
a bizitam mɨgeir puvatɨ.
8 Ezɨ me guizɨn arazim oteghavkɨnigha, puram a isa kalabus gatɨgha, a inigha kotɨn ghu,
ezɨ kot a mɨgɨa ghaze, an aremegham.
Ezɨ me a mɨsoghezɨ an areme.
Egha an adarazir tav kamaghɨn nɨghnɨgha fozir puvatɨ,
a men danganim inigha mɨzazir me uari iniamin an a ini,
egha en arazir kuraba gɨn amangasa areme.
9 Ezɨ me an kuam isa gumazir arazir kurabagh amiba ko, dagɨar avɨriba itir gumaziba ko anefa.
Ezɨ e fo, a uabɨ arazir kuratam gamizir puvatɨ,
egha a uaghan ifavarir akatam mɨkemezir puvatɨ.
10 Ezɨ Ikiavɨra Itir God, uabɨ uan ifongiamɨn gɨn ghua
uan ingangarir gumazir kam dɨkabɨragha a gamizɨ, a mɨzazim isi.
A fo, ingangarir gumazim gumazamizibar arazir kuraba gɨn amangɨsɨ,
osɨmtɨziba agɨvamin ofan mɨn uan mɨkarzim anightɨ, an ikɨrɨmɨrim bar ruaraghtɨ, a uan ovavir boribar ganam.
Egh ingangarir an amim, Ikiavɨra Itir God ingarasa ifongezir araziba, a dar amuam.
Egh a bizir kabar amutɨ, da deraghvɨram otivam.
11 Ezɨ osɨmtɨzir ekiar an aterezir kamɨn gɨn, a bizir bar aghuibar gantɨ da otivam,
eghtɨ a bar akuegham.
Ezɨ Ikiavɨra Itir God kamaghɨn mɨgei,
“Nan ingangarir gumazir nan damazimɨn derazir kam, a deraghavɨra na gɨfo.
Egha a gumazamizir avɨribar arazir kuraba ateri,
egh arazir kamɨn a me damutɨ, me nan damazimɨn derazir gumazamizibar otivigham.
12 “Kamaghɨn amizɨ, gumazamiziba an gari, a mati gumazir kuram.
Egha a gumazamizir avɨrimɨn arazir kurabar osɨmtɨziba atera, uabɨ isa me bagha areme.
Egha a gumazamizir arazir kurabagh amibar akurvaghasa God ko mɨgei.
Kamaghɨn amizɨ, kɨ gumazir gavgavir bar ekiaba itibar tongɨn, ziar ekiam a danɨngam.
Egh mati mɨdorozir gumazir gavgaviba, uan apaniba dɨkabɨragha men bizir aghuariba inigha,
da tuisɨgha uan adarazigh anɨngizɨ moghɨn,
kɨ bizir aghuiba isɨ a danɨngam.”