54
Ikiavɨra Itir God bar Jerusalem gifonge
1 Ikiavɨra Itir God kamaghɨn mɨgei,
“O Jerusalem, noka! Nɨ mati amizir furabaghatim.
Nɨ boritam batezir puvatɨ.
Nɨ mati amizir borim batasa an mɨzazim inizir puvatɨzim.
Nɨ mati amizir nɨn pam nɨ ataghizim.
Egh nɨ gɨn borir bar avɨriba inightɨ,
nɨn boribar dɨbobonim, amizir uan pam ko itimɨn boribar dɨbobonim gafiragham.
Kamaghɨn amizɨ, nɨ bar akuegh dɨmɨva ighiabar amu.
2 “Egh nɨ uan averpenim asamimɨn danganir mɨtaghniam a gisɨfagh,
egh uan averpenir ekiam asaragh.
Egh nɨ uan averpenim bar an arokegh,
egh an beniba ateghtɨ da tong ruaragh,
egh averpenim gavgavim a danɨngamin afughafuziba isɨ pamtemɨn nguazimɨn dagh afughafughtɨ, da magɨreghtɨ,
nɨ beniba pamtemɨn afughafuzir kabagh ikegh.
3 Guizbangɨra, nɨn nguazim aruegh bar ekevegh,
agharir guvimɨn tugh mangɨ agharir kɨriamɨn tugham.
Eghtɨ nɨn ovavir boriba Kantrin Igharazibar Gumazamiziba dɨkabɨnam.
Egh nguibar apaniba asɨghasɨghizir pura itiba, me ua da inigh, dar apiagh ikiam.
4 “O Jerusalem, nɨ uam aghumsɨghan kogham.
Nɨ osɨmɨva atiatingan markɨ.
Gumazamiziba ua dɨbovir akabar nɨ mɨkɨman kogham.
Nɨ fomɨra aghumsɨzim ikezir dughiaba gɨnamadagham.
Nɨ fomɨra uabɨra ikia,
mati amizimɨn pam ovengezɨ, a uabɨra ikia, bar aghumsɨgha oseme.
Kamaghɨn amizɨ, nɨ dughiar faragha ghuzir kam uam a gɨnɨghnɨghan kogham.
5 “Gumazir nɨn ingarizim, a nɨn pamɨn mɨn iti.
An ziam kara, Ikiavɨra Itir Godɨn Gavgaviba Bar Itim,
a Israelian Godɨn Bar Zuezim,
a nɨn Akurvazir Gumazim,
a nguaziba bar dagh ativagha dar garir God.
6 “Guizbangɨra Ikiavɨra Itir God ghaze, kɨ nɨn diaghtɨ nɨ uam na bagh izam.
Nɨ mati amizir igiam uan pamɨn ikezɨ, an pam gɨn anetaghizɨ, an navim bigha bar oseme.
Kamaghɨn amizɨ, kɨ ghaze, nɨ ua izɨ.
7-8 “Kɨ Ikiavɨra Itir God, nɨn Akurvazir Gumazim, kɨ ghaze,
kɨ dughiar bar otevimɨn nɨ ategha, datɨrɨghɨn kɨ apangkuvir ekiam nɨn iti.
Kamaghɨn amizɨ, kɨ ua nɨ inigh izam.
Kɨ dughiar otevimɨn bar puvɨra nɨn atara, uan guam modo.
Kɨ datɨrɨghɨn nɨn apangkuv nɨ gifuegh,
zurara deraghvɨra nɨ damuam.
9 “Kɨ fomɨra Noa ko akam akɨra ghaze,
kɨ nguazim gasɨghasɨghsɨ uam aperiam damightɨ, an otivan kogham.
Kamaghɨra, kɨ guizbangɨra nɨ mɨgɨa ghaze,
kɨ fomɨra Noa ko akam akɨrizɨ moghɨn, kɨ uam nɨ ko akam akɨra ghaze, kɨ nɨn anɨngaghegh, nɨ batueghan kogham.
10 Kɨ Ikiavɨra Itir Godɨn bar ia gifongezim, kɨ ghaze, mɨghsɨaba ko akɨriba ti sɨvaghsɨvagh mangɨ bar gɨvagham,
eghtɨ nan apangkuvir arazir ian itim, a gavgavigh ikɨ mamaghɨra ikiam.
Kɨ fomɨra ia ko Akar Dɨkɨrɨzir Gavgavim, e uari inigh deragh ikiasa a gamigha gɨfa.
Eghtɨ kɨ Akar Dɨkɨrɨzir Gavgavir kam abighan kogham.”
11-12 Ikiavɨra Itir God ghaze,
“O Jerusalemɨn nguibam, noki, gumazitam nɨn apangkuvizir puvatɨ,
egha osɨmtɨzir avɨriba nɨ garɨgha nɨ apɨrizɨ nɨ irɨ.
Eghtɨ kɨ dagɨar bar aghuiba inigh ua nɨn ingarightɨ,
nɨ nguibar bar aghuim otogham.
Kɨ dagɨar aghuir ivezim bar pɨn koziba inigh nguazimɨn dar afegh, adagh isɨn nɨ afagham.
Egh dɨvazir gavgavim nɨ gighuigh an ingarigh,
egh kɨ dagɨar igharagha gara taghtazir aghuiba inigh, dɨvazimɨn tiar akabar ingarigh,
uaghan dɨvazimɨn mɨn, dɨpenir bar pɨn itibar ingarigham.
13 Kɨ Ikiavɨra Itir God, kɨ uabɨ nɨn boriba bar men sure damuam,
eghtɨ me dabirabir bar aghuim ikiam.
14 Kɨ uan arazir aghuimɨn gɨn mangɨ nɨ damightɨ, nɨ gavgavigham.
Eghtɨ gumazir nɨ dɨkabɨraghamin tam ua nɨn boroghɨn ikian kogham.
Eghtɨ nɨ bizitam uam an atiatingan kogham.
Atiatir arazim nɨn saghon ikiam.
15 Eghtɨ gumazitaba nɨ ko mɨsoghsɨ izɨtɨ, nɨ kamaghɨn fogh suam, kɨ me amadazir puvatɨ.
Me uan ifongiamɨn izi.
Kamaghɨn amizɨ, tina nɨ mɨsoghasa izi, a uabɨ kuram iniam.
16 “Kɨ uabɨ gumazir ainɨn bizibar ingaribar ingarigha, fofozim me ganɨngi.
Egha me avim atɨgha, a givima a dafogha pamtem isima, a ain isava avim gatɨzɨ, avim an isima a bar puvɨra isi.
Ezɨ me ain inigha a mɨsozima a baravizɨma, me mɨsoghamin bizir guar avɨribar ingari.
Egha kɨrara, kɨ uaghan mɨdorozir gumazibar ingarizɨ,
me bizir kaba isa mɨsogha kantrin igharazibagh asɨghasɨsi.
17 Eghtɨ mɨsoghamin bizir katam nɨ gasɨghasighan kogham.
Eghtɨ nɨ mɨtɨgh gavgavigh gumazir pura mɨgɨrɨgɨaba nɨ gasibar mɨgɨrɨgɨaba ikarvagham,
eghtɨ men mɨgɨrɨgɨaba gavgaviba bar puvatɨgham.
Ezɨ arazir kamra kɨ deravɨra uan ingangarir gumazamizibar garava,
me gamizɨ, me uan apaniba dɨkabɨri.
Nan arazir kam, a ivezir aghuimɨn mɨn, kɨ a isa uan ingangarir gumazamizibagh anɨdi.
Kɨ Ikiavɨra Itir God, kɨ mɨkemegha gɨfa.”