132
Gumazamiziba Godɨn Dɨpenim bagha bar akonge
Godɨn Dɨpenimɨn ghuavanaga an ziam fer ighiam.
1 O Ikiavɨra Itir God, Devit uabɨ ko, a inizir osɨmtɨzir ekiar kaba,
nɨ dagh nɨghnɨghvɨra ikɨ.
2 O Ikiavɨra Itir God,
Nɨ Jekopɨn God, Godɨn Bar Gavgavir Ekiam Itim.
Devit nɨ ko dɨkɨrɨzir akaba
nɨ dagh nɨghnɨghvɨra ikɨ.
3 Devit ghaze,
“Kɨ uan dɨpenimɨn ghuavanaboghan kogh,
uan mɨsiam mɨtoghan kogham.
4 Kɨ dakusɨ uabɨ abɨnan kogham.
Eghtɨ nan damazimning komeghan kogham.
5 Kɨ kamaghɨra deragh dakuan kogh mangɨ,
kɨ Ikiavɨra Itir God bagh Dɨpenimɨn ingarsɨ danganitam batoghvɨra gɨvagham.
A Jekopɨn God, Godɨn Bar Gavgavir Ekiam Itim.”
6 E Betlehemɨn nguibamɨn ikia, Akar Dɨkɨrɨzir Gavgavimɨn Boksiamɨn akam baraki.
Egha ghua Kiriat Jearimɨn nguazimɨn an apigha a inigha ize.
7 E ghaze, e Ikiavɨra Itir Godɨn Dɨpenimɨn mangɨ,
egh an atrivir dabirabimɨn guamɨn teviba apɨrigh an ziam fam.
8 O, Ikiavɨra Itir God, nɨ dɨkavigh izɨ uan avughsir danganimɨn ikɨ.
Nɨ uan Akar Dɨkɨrɨzir Gavgavimɨn Boksiam sara izɨ.
Boksiar kam, a nɨn gavgavir bar ekiam aka.
9 Nɨn ofa gamir gumaziba me zurara arazir aghuibara damuam.
Arazir aghuir kaba men kurkazir aghuimɨn mɨn ikiam.
Eghtɨ nɨn gumazamizir nɨ baghavɨra itiba,
bar akuegh pamten kamagh dɨmɨva arang mɨkɨmam.
10 O, Ikiavɨra Itir God, nɨ faragha uan ingangarir gumazim Devit koma akam akɨrizɨ moghɨn,
nɨ datɨrɨghɨn uan Atrivir nɨ ua bagha inabazim, akɨrim ragh a gasan markɨ.
11 Nɨ Devit ko akam akɨrigha gɨfa, egh uan nɨghnɨzim gɨghan markɨ.
Nɨ kamaghɨn mɨgɨa ghaze,
“Kɨ nɨn gɨn otivamin adarazir aven otaritam damightɨ
an Atrivimɨn otogham,
eghtɨ nɨn gɨn, ana Atrivimɨn ikiam.
12 Nɨn otariba, kɨ men sure gamir akaba baregh
nan Akar Dɨkɨrɨzir Gavgavimɨn gɨn mangɨtɨ,
nɨn ovavibar otariba, uaghan Atrivibar ikɨ
mamaghɨra ikiam.”
13 Ikiavɨra Itir God, Saion Nguibam ua bagh a ginaba.
A nguibar kam bar a gifuegha,
zurarama an ikiasa a ginaba.
14 A ghaze, “Kɨ nguibar kam bar a gifonge.
A nan avughsɨzir danganim,
kɨ an aven ikɨ mamaghɨra ikiam.
15 Kɨ Saion deragh a damu bizir bar avɨriba isɨva a danɨngam.
Eghtɨ an itir gumazamizir onganaraziba,
kɨ dagheba me danɨngam.
16 Kɨ Saionɨn itir ofa gamir gumaziba ingangarim me danightɨ,
me kɨ nguazimɨn gumazamizibar akurvagh ua me iniamin akam, me me mɨkɨmam.
Eghtɨ Saionɨn gumazamiziba bar akuegh tiariba akaram.
17 “Kɨ Devitɨn adarazir aven gumazitam damightɨ
an otogh Atrivir bar gavgavimɨn ikiam.
Kɨ an mɨseveghtɨ,
a mati lamɨn angazangarimɨn mɨn isiragh gavgavigh ikɨ
mangɨvɨra ikiam.
18 An apaniba, kɨ me damightɨ
me aghumsɨzir bar ekiam inigham.
Eghtɨ an ativaghamin gumazamiziba,
men kantri gavgavigh ikɨ
mamaghɨra ikiam.”