25
Gumazim, God an daroriba deragh dar ganɨva a ko ikiasa, a God ko mɨgei
Devit onger akar kam osiri.
1 O Ikiavɨra Itir God,
kɨ datɨrɨghɨn uan navir averiamɨn aven nɨn ziam fava nɨn azai.
2 Nɨ nan God, ezɨ kɨ nɨghnɨzir gavgavim nɨrara iti.
O God, nan nɨghnɨzir gavgavir kam pura mangɨghtɨ kɨ aghumsɨghan aghua.
Nɨ nan akuraghtɨ,
nan apaniba na abɨragh na dɨpovan kogham.
3 Gumazamizir nɨghnɨzir gavgavim nɨn itiba,
apaniba me abɨn aghumsɨzim me danɨngan kogham.
Gumazamizir pura nɨn akaba batoziba,
merara aghumsɨzim iniam.
4 O Ikiavɨra Itir God, nɨ uan arazir aghuiba nan akakagh.
Egh tuavir kɨ mangamiba, nɨ dar nan sure damu.
5 Nɨ nan God, nɨ nan akuragha ua na ini.
Kamaghɨn, nɨ uan guizɨn akamɨn gɨn mangamin arazibar nan sure damutɨ,
kɨ dughiabar zurara nɨghnɨzir gavgavim nɨn ikiam.
6 O Ikiavɨra Itir God, nɨn arazir aghuim ko apangkuvir arazir nɨ e gamiba,
da fomɨra ikia iza datɨrɨghɨn iti.
Nɨ datɨrɨghɨn ua dagh nɨghnɨghɨva dar amu mangɨvɨra ikɨ.
7 Kɨ uan igiamra ikiava amizir arazir kuraba, ko nan arazir akaba batoziba,
nɨ dagh nɨghnɨghan markɨ.
O Ikiavɨra Itir God, nɨ deragha na gamua bar nan apangkufi,
kamaghɨn amizɨ nɨ na gɨnɨghnɨgh.
8 Ikiavɨra Itir God bar dera, ezɨ an araziba bar guizbangɨra.
Kamaghɨn amizɨ, a gumazamizir arazir kurabagh amiba,
a uan arazibar gɨn mangasa men sure gami.
9 Gumazamizir uari abɨra an apengan itiba,
a men faragha ghua tuavim men akakazima, me arazir aghuibaram ami.
Egha arazir a ifongezibar men sure gami.
10 Gumazim Ikiavɨra Itir Godɨn Akar Dɨkɨrɨzir Gavgavim ko an Akar Gavgavibar gɨn zuima,
an an apangkuvighavɨra iti.
Egha a mɨkemezɨ moghɨra deragha bizibagh amua,
uan nɨghnɨzim gɨghavkɨrir puvatɨ.
11 O Ikiavɨra Itir God, nan arazir kuraba bar avɨraseme.
Kamaghɨn, nɨ uan ziam bagh uan akar dɨkɨrɨzimɨn gɨn mangɨ,
nan arazir kuraba gɨn amadagh.
12 Gumazir Ikiavɨra Itir Godɨn atiatia an apengan itim,
Godra, a bagha atɨzir tuavir aghuim an akaghtɨ,
an an mangam.
13 Gumazir kam zurara dabirabir aghuim inivɨra ikiam.
Eghtɨ an ovavir boriba nguazir aghuir kam inightɨ,
a men nguazim gavagh ikɨ kamaghɨra ikiam.
14 Gumazamizir Ikiavɨra Itir Godɨn atiatia an apengan itiba,
a men namakam gami.
Egha uan Akar Dɨkɨrɨzir Gavgavim azenara anekazɨ
me a gɨfo.
15 Kɨ zurara uabɨn akurvaghasa Ikiavɨra Itir Godɨn gara a mɨzuai,
ezɨ a bizir na gasɨghasɨghasava amibar aven ua na isi.
16 O God, kɨ uabɨra ikia osɨmtɨzim aterima nan gavgaviba bar gɨfa.
Kamaghɨn amizɨ nɨ nan kuarkuvigh na bagh izɨ.
17 Osɨmtɨziba nan navimɨn aven ikia ekɨva ghuavɨra iti.
Nɨ nan akuraghtɨ osɨmtɨzir kaba na abɨnan markɨ.
18 Nɨ nan osɨmtɨziba ko mɨzazibar gan,
egh nan arazir kuraba gɨn amadagh.
19 Nɨ ge, nan apaniba bar avɨrasemegha,
bar nan aghuagha guizbangɨra nan apanim gami.
20 Nɨ nan akuragh deragh nan gantɨ,
me na abɨntɨ kɨ aghumsɨghan kogham.
Nɨrara nan akurvasi,
ezɨ kɨ nɨ bagha iza nɨn aven modi.
21 Nɨn araziba dera, egha bar guizbangɨra.
Ezɨ kɨ nɨghnɨzir gavgavim nɨn ikia nɨ mɨzua ghaze,
nɨ zurara na geghuv deragh nan gan.
22 O God, nɨ uan gumazamiziba Israelia ua me inightɨ,
osɨmtɨzir kaba ua me abɨnan kogham.