26
Arazir kuratam itir puvatɨzir gumazim God ko mɨgei
Devit onger akar kam osiri.
1 O Ikiavɨra Itir God, kɨ nɨghnɨzir gavgavim pamtem nɨn iti,
egha nɨn damazimɨn arazir kuratam gamizir puvatɨ.
Kamaghɨn, nɨ nan gun mɨkɨm suam, kɨ gumazir aghuim.
2 O Ikiavɨra Itir God, nɨ bar nan araziba ko, nan nɨghnɨziba ko, nan navim tuisɨgh ingangarim na danigh,
deragh na gɨfogh.
3 Guizbangɨra, nɨn apangkuvim nan faragha ghua tuavim nan akakasi.
Nɨ na mɨkemezɨ moghɨra deragha bizibagh amua zurara nan faragha zui,
ezɨ kɨ zurara nɨn guizɨn arazimɨn gɨn zui.
4 Kɨ ifavaribagh amir gumazamiziba ko arua
me ko apiav itir puvatɨ.
5 Kɨ gumazamizir arazir kurabagh amibar gɨn daruan bar aghuagha
me gitavɨrasi.
6 O Ikiavɨra Itir God, kɨ uan dafariba ruegha kamagh uabɨ akagha ghaze,
kɨ osɨmtɨziba puvatɨ.
Egha kɨ iza nɨn ofa gamir dakozir mɨriamɨn arua
nɨn ziam fe.
7 Kɨ nɨ mɨnabava nɨ bagha onger akar mam banga
nɨn ingangarir bar aghuir nɨ amizibar gun mɨgei.
8 O Ikiavɨra Itir God, Dɨpenir nɨ itim kɨ bar a gifonge.
Danganir kam, nɨn angazangarim ko gavgavir ekiam bar a gizɨvagha iti.
9 Kɨ fo, mati amizim uan dɨpenim bar anevia ghuzɨ moghɨn,
nɨ gɨn gumazamizir arazir kurabagh amiba avigh mangɨ
na sara inigh mangan markɨ.
Egh uaghan gumazir gumazibav sozi me ariaghɨriba,
nɨ me sara na gasɨghasɨghan kɨ aghua.
10 Gumazamizir kaba,
me zurara arazir kurabar amuasavɨra ikia,
egha dagɨaba isa arazir kurabar amuasa gumazir igharazibagh ivesi.
11 Ezɨ kɨ uabɨ, kɨ nɨn damazimɨn arazir kuratam gamizir puvatɨ.
Eghtɨ nɨ nan kuarkuvigh ua na inigh.
12 Kɨ nguazir aghuimra tugha gavgafi.
Bizitam na gasɨghasɨghsɨ damuva avegham.
Kɨ gumazamizir avɨribar tongɨn ikɨ,
egh Ikiavɨra Itir Godɨn ziam fam.