27
Godɨn ziam fava a ko mɨgeir mɨgɨrɨgɨaba
Devit onger akar kam osiri.
1 Ikiavɨra Itir God, a nan angazangarim ko nan Akurvazir Gumazim.
Ezɨ kɨ gumazitamɨn atiatingan kogham.
Ikiavɨra Itir God, a dɨpenir gavgavimɨn mɨn na modogha na geghuva nan garima,
kɨ atiatir puvatɨ.
2 Mati afiam asɨzimɨn tuzibar amasava ami moghɨn,
nan apaniba na gasɨghasɨghsɨ izɨva,
bizibagh asaghpor iregham.
3 Mɨdorozir gumazir avɨriba bar na ekɨarughamin dughiamɨn, kɨ atiatingan kogham.
Nan apaniba na ko mɨsoghsɨ izamin dughiamɨn,
kɨ nɨghnɨzir gavgavim Godɨn ikɨ egh tugh gavgavigham.
4 Kɨ bizir vamɨra bagha Ikiavɨra Itir Godɨn azaragha gɨfa.
Bizir kɨ bar ifongezimra kara:
kɨ angamɨra itir dughiamɨn, kɨ an Dɨpenimrama aven ikiam.
Kɨ an ganganir aghuimɨn gan an boroghɨn ikɨ bar akueghasa.
Kɨ an Dɨpenimɨn ikɨ a baghvɨra ikɨva an nɨghnɨzim gɨfofoghsɨ an azangam.
5 Eghtɨ osɨmtɨziba otivamin dughiamɨn
a uan Dɨpenimɨn bar deravɨra na modogham.
A na isɨ uan Purirpenimɨn aven na modogham.
A na isɨ dagɨar gavgavimɨn pɨn mar na afagham.
6 Nan apanir na okarigha itiba, kɨ bar me abɨragham.
Egh bar akongegh dɨmɨva arang an Purirpenimɨn a bagh ofa damuam.
Egh onger akabar amu Ikiavɨra Itir Godɨn ziam fam.
7 O Ikiavɨra Itir God, kɨ nɨn deir dughiamɨn,
nɨ nan kuarkuvigh nan mɨgɨrɨgɨaba baragh na ikarvagh.
8 O Ikiavɨra Itir God, nɨ kamagh na mɨgɨa ghaze,
“Nɨ bar na nan boroghɨra izɨ na baghavɨra ikɨ
na gɨfofoghsɨ nan azangsɨgh.”
Eghtɨ kɨ nɨ ko ikɨsɨ bar nɨn boroghɨra mangam.
9 Nɨ uabɨ nan mongan markɨ.
Kɨ nɨn ingangarir gumazim, nɨ nan God, nan Akurvazir Gumazim.
Nɨ dughiar avɨribar nan akurvasi.
Nɨ nan atar nan aghuagh, egh na ataghɨraghan markɨ.
10 Dughiar mabar nan amebam ko afeziam akɨrim na gasaragha nan aghuaghuasi,
ezɨ nɨ Ikiavɨra Itir God, nɨ na geghuva deragha nan gari.
11 O Ikiavɨra Itir God, kɨ damuasa nɨ ifongezir araziba, nɨ dar nan sure damu.
Kɨ apanir avɨriba iti,
kamaghɨn nɨ tuavir aghuimra nan akaghtɨ kɨ an mangam.
12 Nɨ na ateghtɨ nan apaniba na inigh me ifongezɨ moghɨn na damuan markɨ.
Me akar ifavaribagh amua egha atiatim na ganɨdi.
13 Nɨghnɨzir gavgavir kam nan ikiavɨra itima, kɨ kamaghɨn fo,
kɨ nguazir kamɨn angamɨra ikɨ gantɨ,
God deraghvɨra uan gumazamizibar amuam.
14 Nɨ nɨghnɨzir gavgavim Ikiavɨra Itir Godɨn ikɨ a bagh mɨzuam.
Nɨn navim osɨman markɨ.
Nɨ tugh gavgavigh mamaghɨra ikɨ mangɨtɨ
a izɨ nɨn akuragham.