75
God gumazamizir kuraba abɨnigha, gumazamizir aghuibar akura
Asap onger akar kam osiri.
Gumazir ighiabar faragha zuim a gumazamizibav kɨmtɨ, me tiarir kamɨn gɨn mangɨ ighiar kam bangam, “Gumazitam gasɨghasɨghan markɨ.”
1 O God, e zurara nɨ mɨnaba egha nɨn ziam fe.
E nɨn ziar ekiamɨn gun mɨgɨa,
bizir igharagha garir nɨ amibagh eghari.
2 God kamaghɨn mɨgɨa ghaze,
“Kɨ kotiamɨn dughiar mam amɨsevegha gɨvazɨma a iti.
Nan kotiam guizbangɨra zui.
Egha ifarir puvatɨ.
3 Nguazir kam, mɨkɨmkɨzim a batoghtɨ,
an itir gumazamiziba akongam.
Nguazimɨn mɨngarir apengan itim,
kɨ an suiraghtɨ a ikɨ gavgavigham.
(Ighiam gamua an suiam
atugha avughsegha ua
ighiam gami.)
4 Kɨ gumazamizir akaba batogha pura uan ziaba febav gɨa ghaze,
‘Ia uari fɨva akaba batoghan markɨ.’
Kɨ gumazamizir kurabav gɨa ghaze,
‘Ia uarira uan gavgavibagh nɨghnɨgh uan ziaba fan markɨ.
5 Ia uan gavgavibagh nɨghnɨgh da bagh ifaghatan markɨ.
Egh pamten akabagh itɨ, dɨbovir akabar na mɨkɨman markɨ.’ ”
6 Gumazamizibar araziba tuisɨghamin gumazitam, an
aruem anadi naghɨn ko, aruem uaghiri naghɨn ko, not ko sautɨn amadaghan ikɨva otoghan kogham.
Puvatɨgham.
7 God uabɨra en araziba tuisɨsi.
A gumazamizir maba fa, igharaziba abɨri.
8 Ikiavɨra Itir Godɨn anɨngagharim kamaghɨn iti.
A kavɨn mamɨn suira, ezɨ wainɨn igiar gavgavir ekiam itim a gizɨfa.
An a ingezɨ gumazamizir kuraba anepa bar anegɨfa.
Arazir kamra, gumazamizir kuraba Godɨn kotɨn otivigh, egh bar gevegham.
9 Kɨ uabɨ zurara Jekopɨn God bagh ighiaba bangɨvɨra ikɨ an ziam fam.
Egh an akabar gun mɨkɨmam.
10 Eghtɨ God gumazamizir kurabar gavgaviba bar ada gɨvagham.
Egh an damazimɨn derazir gumazamiziba, a gavgavim ua me danɨngam.