76
God mɨdorozim gamua uan apaniba abɨra
Asap onger akar kam osiri.
Onger akar kam kar Godɨn ziam fer onger akam. Onger akar kamɨn faragha zuir gumazim, gumazibav gɨa ghaze, me gitabav sogh.
1 Judan adarazi bar deravɨra God gɨfo.
Israelia an ziar ekiam fe.
2 An Dɨpenim Jerusalemɨn nguibamɨn iti.
Egha Saionɨn Mɨghsɨamɨn ikia kamaghɨra iti.
3 A danganir kamɨn uan apanibar afuziba ko,
oraba, ko mɨdorozir sababa ko,
mɨdorozir bizir igharaziba sara apɨragharɨki.
(Ighiam gamua an suiam
atugha avughsegha ua
ighiam gami.)
4 God, nɨ atrivibar ekiam egha ziar ekiam iti.
Nɨn ziam bar pɨn ikia, egha mɨghsɨar ekiabar ziar ekiabagh afira.
Nɨ mɨghsɨabar uan apanibav sogha me abɨragha uamategha ize.
5 Nɨ men mɨdorozir gumazir gavgavibav sogha men bizir aghuiba bar ada ini.
Ezɨ mɨdorozir gumazir kaba datɨrɨghɨn ariaghirezɨ,
gumazir ikɨ mɨsogh ua men biziba iniamba puvatɨ.
6 O Jekopɨn God, nɨ men atarigha gɨvazɨ,
hoziaba ko gumazir hoziabagh apiaziba ariaghiregha nguazim gireghav iti.
7 O God, nɨ men ataran bighangɨn, tinara nɨn damazimɨn tuivam?
Bar puvatɨ.
Gumazamiziba bar puvɨra nɨn atiati.
8-9 Nɨ uan Nguibamɨn ikia gumazamiziba isa uan kotiam gatɨ.
Nɨ dughiar kamɨn tugha kotiamɨn gun me mɨgei.
Egha nɨ iza gumazamizir igharaz darazi paza me gamiba, nɨ men akurvasi.
Gumazamiziba bar atiatigha mɨkɨman asa.
Me pura uan akabar kumigha iti.
(Ighiam gamua an suiam
atugha avughsegha ua
ighiam gami.)
10 Gumaziba naviba men ikufi,
ezɨ bizir kam gumazir igharazibagh ami me nɨn ziam fe.
Gumazir mɨdorozim gamua deragha ikiavɨra itiba,
me nɨn ziam fam.
11 Ikiavɨra Itir God a nɨn God,
nɨ a ko Akar Gavgavim akɨrigh,
egh guizbangɨra akar dɨkɨrɨzir kamɨn gɨn mangɨ.
Egh ifaran markɨ.
E Ikiavɨra Itir Godɨn atiatingam,
kamaghɨn, gumazamiziba bar a bagh bizir aghuiba inigh mangɨ.
12 An atrivir akaba batoziba abɨri.
Egha nguazimɨn atrivibagh ami
me bar an atiati.