88
Gumazim uabɨn akurvaghasa God ko mɨgei
Kar Koran ovavir boribar ighiam.
Esran ikɨzimɨn gumazir mam Heman, ighiar kam osiri. Gumazir onger akar kamɨn faragha zuim me mɨkemezɨ, me “Mahalat Leanotɨn,” tiarimɨn a bange.
Me onger akar kam kamagh a dɨbori, Maskil.
1 O Ikiavɨra Itir God, nan God, nɨ nan akuragha ua na ini.
Kɨ uabɨn akurvaghasa aruebar nɨn diava,
dɨmagaribar nɨ ko mɨgei.
2 Nɨ kuarim atɨgh nan azangsɨziba baragh.
Egh deragh nan ararem baragh nan akuragh.
3 Osɨmtɨzir avɨriba na bativima,
kɨ Gumazamizir Oveaghuezibar Nguibamɨn boroghɨn mangasava ami.
4 Gumazir maba ariaghiregha ghua mozir konimɨn mangasava amima,
kɨ uaghan men aven ikia, me ko zui.
Kɨ guizbangɨra gavgaviba nan puvatɨ.
5 Kɨ mati, me na ataghizɨ kɨ gumazir oveaghueziba ko men danganimɨn iti.
Kɨ mati, gumazim me a mɨsoghezɨ, an aremegha gumaziba ariaghira itir danganimɨn iti.
Kɨ mati, gumazir nɨ bar gɨn amadagha akurvazi puvatɨzibar mɨn iti.
6 Nɨ na isa mozir bar konir kam mɨkɨnizɨ,
kɨ mozir bar konir kamɨn danganir bar mɨtatangizimɨn iti.
7 Nɨn anɨngagharim bar na avara,
mati ongarir ekiam dɨpɨrigha na abɨrazɨ kɨ aven iraghu.
(Ighiam gamua an suiam
atugha avughsegha ua
ighiam gami.)
8 Nɨ kamaghɨn amizɨ, nan namakaba ganigha nan atiatigha bar nan saghon iti.
Bizir kam na ikiagharɨghizɨ, kɨ azenan izan ibura.
9 Osɨmtɨzir kam nan iti, kɨ anetera ghuavti damaziba nan ikufi.
O Ikiavɨra Itir God, kɨ aruebar vaghvagha zurara nɨ ko mɨgei, nɨ nan akuragh.
10 Gumazir oveaghueziba, nɨ ti me bagha mirakelbagh ami, o?
Me ti ua dɨkavruegh nɨn ziam fam, o?
(Ighiam gamua an suiam
atugha avughsegha ua
ighiam gami.)
11 Gumazir ovegha mozim gireghav itiba, me ti nɨn apangkuvir arazimɨn uariv gei, o?
Me ti danganir bar kurar kamɨn kamaghɨn uariv gɨa ghaze, God mɨkemezɨ moghɨra e bagha deragha bizibagh amua, uan nɨghnɨzim gɨghavkɨrir pu.
Puvatɨ, me kamaghɨn mɨgeir puvatɨ.
12 Gumazamizir Oveaghuezibar Nguibar mɨtater kamɨn itiba,
nɨ amir arazir kabar gari, o?
O me danganir bar mɨtater kurar kamɨn ikia, nɨn akurvazir arazimɨn gari, o?
13 O Ikiavɨra Itir God,
kɨ mɨzarazibar uabɨn akurvaghasa, zurara nɨ ko mɨgei.
14 O Ikiavɨra Itir God, nɨ manmaghsua akɨrim ragha na gasara?
Nɨ manmaghsua uan guam nan modo?
15 Kɨ uan igiamra ikia mɨzazir kamra isa iza datɨrɨghɨn atam areme.
Nɨ mɨzazir ekiam na gasezɨ, nan agharapaniba bar nan amɨra.
16 Nɨn anɨngagharir ekiam bar na avarazɨ,
nɨ na mɨsogha bar na gasɨghasɨki.
17 Nɨ kamaghɨn na gamizɨ, osɨmtɨziba arueba ko dɨmagariba sara bar na ekɨaru.
Mati aperiam otogha ghua nguazir oteviba bar da avara.
18 Nɨ nan roroar aghuiba ko namakabagh amizɨ, me bar na ataki.
Kɨ amɨnirbɨrimra a ko, ga roroamning gami.