89
Osɨmtɨzir mam Israelɨn kantrin aven otozɨ me onger akar kam gami
Esran ikɨzimɨn gumazir mam Etan, an onger akar kam osiri.
Me onger akar kam kamagh a dɨbori, Maskil.
+O Ikiavɨra Itir God, kɨ zurara nɨn apangkuvimɨn gun, gumazamizibav kɨmɨva ongam.
Kɨ uan akamɨn, pamten gɨn otivamin boribav kɨm suam,
God mɨkemezɨ moghɨra, a zurara deraghavɨra e gami,
egha dughiatamɨn e ataghɨrazir puvatɨ.
Kɨ fo, nɨn apangkuvim a ikia mamaghɨra iti.
Nɨ zurara deraghavɨra e gamua dughiatamɨn e ataghɨrazir puvatɨzir arazir kam,
a bar ekevegha overiamɨn mɨn gavgavigha ikia mamaghɨra iti.
 
Nɨ kamaghɨn mɨgɨa ghaze,
“Kɨ gumazir mam ginabagha a koma Akar Dɨkɨrɨzir Gavgavim gami.
Kɨ uan ingangarir gumazim Devit ko, Akar Gavgavim gamigha gɨfa.
+Kɨ kamaghɨn a mɨgɨa ghaze, ‘Nɨn adarazira zurara atrivibar otivam.
Nɨn adarazir aven atrivitam otogh,
ikɨ mamaghɨra ikiam.’ ”
(Ighiam gamua an suiam
atugha avughsegha ua
ighiam gami.)
 
Ikiavɨra Itir God, nɨn Nguibamɨn itir enselba nɨ amir mirakelba bagh, ighiaba bangɨ nɨn ziam fam.
Me gara fo, nɨ zurara deraghavɨra e gami, egha dughiatamɨn e ataghɨrazir puvatɨ,
egh me arazir kam gɨnɨghnɨgh uari akuv nɨn ziam fam.
+O Ikiavɨra Itir God, nɨn Nguibamɨn aven, tav nɨn mɨn itir puvatɨ.
Nɨn nguibamɨn enseltam nɨ ko magh ghuzir puvatɨ.
Nɨn Nguibamɨn enselbar gumazir dapaniba, me uari akuva bizibav gɨa nɨn atiatia nɨn apengan iti.
Enselɨn igharazir nɨ okarigha itiba, me uaghan atiatia nɨrarama apengan iti.
O Ikiavɨra Itir Godɨn Gavgaviba Bar Itim.
Gumazitam bar gavgavigha nɨn mɨn itir puvatɨ.
O Ikiavɨra Itir God, nɨ zurara deraghavɨra e gami,
egha dughiatamɨn e ataghɨrazir puvatɨ.
 
Nɨ ongarir ekiar gavgavim gativagha an gari.
A pamten dɨkavima, nɨ a gami a pura amɨragha irɨghav iti.
10 Nɨ Isip, asɨzir atiar ekiamɨn mɨn, an gavgavim abɨragha bar a gasɨghasɨki.
Nɨ uan gavgavir ekiar kamɨn, uan apaniba bar me abɨnizɨ me tintinibar are.
11  +Overiam ko nguazim, aning nɨna.
Nɨ nguazimɨn ingarizɨma biziba bar an iti.
12 Nɨ nguazim bar, an notɨn amadaghan ikegha ghua sautɨn amadaghan biziba vɨrara dar ingari.
Gumazamiziba nɨn ziam fe moghɨn,
Tabor ko Hermonɨn Mɨghsɨamning, nɨ bagha bar akuegha ighiam banga nɨn ziam fe.
13 Nɨ gavgavir bar ekiam iti.
Ezɨ nɨn gavgavir kam a bar ekefe.
 
14 Nɨ atrivimɨn ikia uan gumazamizibagh ativagha, men akurvagha deravɨra men gari.
Nɨn kotiar araziba da bar dera.
Nɨ gumazamiziba bar men apangkuvigha, zurara deraghavɨra me gami,
egha dughiatamɨn me ataghɨrazir puvatɨ.
15 O Ikiavɨra Itir God, gumazamizir ighiabagh amua nɨn ziam feba, me bar akongegh.
Nɨn angazangarim me gisirazɨ moghɨn, nɨ bar me gifuegha men boroghɨra iti.
16 Nɨ bar deravɨra me gamima,
me bar akuegha dɨmagariba ko aruebar nɨn ziam fa ighiabagh ami.
17 Nɨrara, nɨ gavgavim e ganɨdi, ezɨ e nɨ bagha bar akonge.
Nɨ bar deragha e gamua en akurvazima, e uan apaniba ko mɨsogha me abɨri.
18 O Ikiavɨra Itir God, nɨ uabɨ e geghuv en ganamin gumazim, oramɨn mɨn e ganɨngi.
Nɨ Israelian Godɨn Bar Zuezim, nɨ arazir aghuimrama amuava, atrivim e ganɨngi.
God Akar Dɨkɨrɨzir Gavgavim Devit koma a gami
19 Nɨ fomɨra irebamɨn mɨn gari bizimɨn aven, uan ingangarir gumazir nɨ ifongezibav gɨa ghaze,
“Kɨ mɨdorozir gumazir bar aghuir mam amɨsevegha gɨfa.
Kɨ gumazamizibar tongɨn anemɨsevegha,
an atrivimɨn ikiasa kɨ atrivir dapanir asuam a garu.
20  +Kɨ uan ingangarir gumazim Devit, an apigha anemɨsevegha uan borem a ginge.
A ian atrivimɨn ikiam.
21 Nan gavgavim zurarama a ko ikɨ, mamaghɨra ikiam.
Nan gavgavim zurara a ko ikɨ gavgavighvɨra ikiam.
22 An apaniba a mɨsogh anebɨraghan kogham.
Gumazir kuraba anebɨraghtɨ, a irɨghan kogham.
23 Kɨ uabɨ an apaniba abɨnigh,
an aghuazibav sueghtɨ, me arɨmɨghiregham.
24 Nan apangkuvim a ko ikɨtɨ, kɨ zurara deraghvɨra a damu, egh dughiatamɨn aneteghan kogham.
Kɨ uan gavgavim a danightɨ a bar gavgavigham.
25 Kɨ Mediterenianɨn Ongarir Ekiamɨn mɨriamɨn itir nguaziba bar a danɨng mangɨ, Yufretisɨn Faner dadarimɨn tugham.
Eghtɨ an adagh ativagh dar ganam.
26 A kamagh na mɨkɨm suam, Nɨ nan God nan afeziam.
Nɨ dagɨamɨn mɨn ikia na moga nan akurvasi.
27  +Kɨ David amɨsevezɨ a nan otarir ivariamɨn iti.
A nguazimɨn atriviba bar dagh afiragh,
men atrivir dapanimɨn ikiam.
28 Kɨ zurara an apangkuv an akurvagh mamaghɨra ikiam.
Kɨ a ko Akar Dɨkɨrɨzir Gavgavim damightɨ,
a gavgavigh ikɨ mamaghɨra ikiam.
29 Dughiabar zurara an ovavir boribar aven, men gumazitam atrivimɨn ikiam.
Atrivir kaba me Israelia gativagh men gan
ikɨ mangɨtɨ, overiar kam gɨvagham.
 
30-32 “An ovavir boriba nan akam batuegh, bizir kɨ damuasa mɨkemezibar gɨn mangan koghɨva,
akɨrim ragh arazir kɨ ifongezibagh asaragh,
nan Akar Gavgavibar gɨn mangan koghtɨ,
kɨ men arazir kurar me amizir kam gɨnɨghnɨgh,
mɨzazir kuram me danɨngam.
33 Kɨ uan ingangarir gumazim Devit bar an apangkuvigh,
egh deraghvɨra uan akar dɨkɨrɨzimɨn gɨn mangɨ zurara deraghvɨra a damu egh dughiatamɨn aneteghan kogham.
34  +Kɨ uan Akar Gavgavir a ko dɨkɨrɨzir kam abɨghan kogh,
uan akatam uamategh a giraghan kogham.
 
35 “Kɨ Godɨn bar zuegha arazir aghuibara amim.
Kɨ uan ziamɨn akam akɨra ghaze,
Kɨ Devit gifaran kogham.
36 An ovavir boriba ikɨ mamaghɨra ikiam.
An adarazi gumazamizibagh ativagh men ganam,
mati aruem isiragha mamaghɨra iti.
37 Me iakɨnimɨn mɨn isiragh mamaghɨra ikɨ,
kamagh gumazamizibar akagham, nan akam a bar guizbangɨra.”
(Ighiam gamua an suiam
atugha avughsegha ua
ighiam gami.)
Etan orazi apaniba atrivim mɨsogha anebɨrazɨ, an a bagha azi
38 Nɨ datɨrɨghɨn uan atrivir nɨ ua baghavɨra inabazim,
nɨ an atara anetegha akɨrim ragha a gasara.
39 Nɨ a ko dɨkɨrɨzir akar gavgavir kam abigha gɨfa.
Nɨ an atrivir dapanir asuam isa nguazimɨn anekunizɨ a mɨze.
40 Nɨ an nguibar ekiamɨn dɨvaziba akaragharɨki,
ezɨ dɨpenir ekiaba bar ikufi.
41 Ezɨ gumazamizir anebɨgha aruiba an biziba okei.
An boroghɨn itir gumaziba dɨbovir akabar a mɨgei.
42 Nɨ an apanibagh amizɨ me anebɨragha,
bar akonge.
43 Nɨ an mɨdorozir gumazibagh amizɨ, me mɨsoghamin gavgaviba puvatɨ.
Ezɨ me a mɨsogha anebɨra.
44 Nɨ anebɨrazɨ a uam atrivimɨn itir puvatɨgha,
ua gumazamizibagh ativagha men garir puvatɨ.
45 Nɨ a gamizɨ a zuamɨra ghuri.
Egha aghumsɨzir dafam a ganɨngi.
(Ighiam gamua an suiam
atugha avughsegha ua
ighiam gami.)
Me uarir akurvaghasa God ko mɨgei
46 O Ikiavɨra Itir God, nɨ dughiar ruarimɨn en modogh ikɨ kamaghɨra ikiam, o?
Nɨn anɨngagharim ti avimɨn mɨn isi kamaghɨra ikiam, o?
47 O Ikiavɨra Itir God, nɨ e ginɨrɨgh en ikɨrɨmɨrim otefegh.
Nɨ en ingarizɨ e iti, e ua bar moghɨrama ovegh pura gevegham.
48 Tinara angamɨra ikɨ kamaghɨra ikɨ, ovengan kogham?
Tinara uabɨn gavgavighvɨra ikɨ,
Gumazamizir Oveaghuezibar Nguibamɨn mangan kogham?
(Ighiam gamua an suiam
atugha avughsegha ua
ighiam gami.)
49 O Ekiam, nɨ en apangkuvighavɨra iti o?
Nɨ Devit ko dɨkɨrɨzir akar kam, manmaghɨram a damuam?
50 O Ekiam, nɨ na ginɨrɨgh, kɨ nɨn ingangarir gumazimɨn iti, gumaziba dɨbovir akabar na mɨgei.
Gumaziba bar moghɨra na dɨpova akar kurabar na mɨgei.
51 O Ikiavɨra Itir God, nɨ atrivimɨn ikiasa na ginabazɨ,
nan apaniba nan ingarava aka akar kurabar na mɨgei.
 
52 E zurara Ikiavɨra Itir Godɨn ziam fɨ kamaghɨra ikiam.
Bar guizbangɨra.
+ 89:1 1 Atriviba 4:31; Onger Akaba 101:1 + 89:4 2 Samuel 7:12-16; 1 Eghaghaniba 17:11-14; Onger Akaba 132:11; Aposel 2:30 + 89:6 Onger Akaba 40:5; 86:8; 113:5 + 89:11 1 Eghaghaniba 29:11; Onger Akaba 24:1-2; 50:12 + 89:20 1 Samuel 13:14; 16:12; Aposel 13:22 + 89:27 Akar Mogomem 1:5 + 89:34 Dɨboboniba 23:19; Godɨn Araziba 7:9; Jeremaia 33:20-21