19
Paul i Nae ku Ephesus
1 Maranai Apollos Corinth yai i mamana wai, Paul kamonai wata ketai i yewo i nae ku Ephesus ba namai bigeruwana biyisi mutusi i pananisi, wai i toirubaisi,
2 “Maranai koi geruwana wai Kanuma Kaobaisiyena ko yauni kona?”
Si kaobeyei, “Kega! Kega ka kuiri kata Kanuma Kaobaisiyena e mamana.”
3 Paul i toiruba, “Kata abi babataito ko yauni?”
Si kaobeyei, “John ana babataito.”
4 Ba Paul i wona, “John ana babataito wai kona tombaubauna babataitona. Pipiya i wonisi kata kesana murikuai e botubotu wai siti geruwei, kona wai Iesu.”
5 Nikona si nonori wai Bada Iesu kana wabai si babataito.
6 Ba Paul nimana ku tepasi i terei wai, Kanuma Kaobaisiyena i bonuvisi ba gamo bubausi yai si sisiya, si peroveta wona ba yebo God warana si yoneyonei.
7 Sebasebare ereonowasi asi 12.
8 Nawaravi tonu kamonai, Paul Jew biyisi asi dugu yovenai ere tepatorana, i biogatara ba i binuwatainisi God ana basileiya kairaviana.
9 Saba mutusi nuwanuwasi padapadasi kega si geruwana ba debai Keresiyana asi bitumagana si gigimi. Damanina Paul i sumarisi ba bigeruwana biyisi yabata si nae Tyrannus ana ku bibeyebeyena yovena. Ba namai kao patepatena Wara Gairena si bisisiyei.
10 Nikona bodu ruwamo kamonai si wosei, wai Jew ba Greek biyisi ereonowasi Asia kupurina kamonai, Wara gairena si nonori.
Sceva Natunatuna Sebasebare
11 God maragata Paul i berei wai kiyakiyaya kega si kinakinana wai i wose.
12 Memena bage kareko kabana si botuwei Paul sinina si kasi rubai ba si yauni si nae gubagubagisi kurisi wai si yawasisi ba kanuma goyogoyosi si kasibau taveyisi.
13 Jew biyisi mutusi kupura nunusi yai si yewoyewo neubuwa, ba asi waina Bada Iesu kana wabai kanuma goyogoyosi siti kasibaunisi, wai si wonawona, “Iesu, Paul i raumamarei wai, kona kana wabai ka kaotunetuneyim, ke kasibau!”
14 Jew biyisi asi priest kaikapona kana waba Sceva natunatuna sebasebare asi 7 niko wose si wosewose.
15 Saba kao kesana, kanuma goyona i kaobeyisi, “Iesu wai a kuiri, ba Paul yebo a kuiri, saba komi iyabomi?”
16 Damanina ba sebare kanuma goyona kamonai i mamana wai, i sou ku tepasi ba i gebowabowasi i gudaisi, wai ere taratarasi ba ere nimanimasi yovenai si vera si kasibau.
17 Jew ba Greek biyisi Ephesus kamonai si mamana wai warana si nonori wai si nagara saki, Bada Iesu kana waba si bokuwayei ba si wareyei.
18 Pesarisi iyabosi si geruwana wai si botu ba asi piragagoyosi si tombubaunisi.
19 Kaikairapu mutusi, asi kairapu bukasi si yauna si botu ba debai si kapuna, kairavina ereonowana si Keresiyana. Bukasi maisasi wai 50,000 silver coins.
20 Niko wose yai ba Wara Gairena i maragata ba dobu ereonowanai i kampesipesi.
21 Nikosi wose tupasi si tupuwa murinai, Paul i nuwanotanota kata Macedonia ba Achaia kamosi yai wata ita nae ku Jerusalem. Kona murinai wai i wona, “Ana nae ku Rome.”
22 Ba kana bibaita asi ruwao, Timothy ba Erastus i poraisi ku Macedonia kupurina, ba kona Asia kupurinai i mana mara yogina.
Ephesus yai si Reso
23 Kona maranai Iesu bitumaganina Keresiyana ketana kairavina wai, bai yowa kaikaponai tupuwa.
24 Sebare kana waba Demetrius sawara silver ai e wosewose wai kona, silver ai Greek asi god wasike kana waba Artemis tara bibisakina i wosewose, wai mane kaikapona kona ba ana saibisaibirisi si yuyauni.
25 Ana sabisabirisi ba pipiya mutusi asi bagibagi kesanina yabata i yorisi ba i wonisi, “Au dam, ko kuiri kata ata mariya niko sabirai e botubotu.
26 Ba niko sebare, Paul ko kinakinani ba ko nonori kata, pipiya pesarisi e binuwatainisi ba e wonawona kata, pipiya nimasi yai god te taratara bibisaka wai kega god damana. Ba kega nina Ephesus kamonai wata e wosewosei ba Asia kupurina ereonowanai.
27 Tana kinana kabitamni kata kota ata mariya ketana kega ina gudui, ba ata saibira wabana ini goyoni. Ba yebo tana kinana kabitamni, kata ata god wasike Artemis ana yove taparoro kega ini goyoni. Pipiya ereonowasi Asia kupurinai ba dobu ereonowana kamonai kona Artemis te bopepetei, ba tana kinana kabitamni kata ana bibadana kega ina siwana!”
28 Kona si nonori wai si yagisi, ba si dagui si paraparara, “Ephesus asi god wasike Artemis maragata sakina, Ephesus kamonai!”
29 Kega rabarabana meyaga tupana kamonai bubuwa i rakata saki. Macedonia biyisi Gaius ba Aristarchus, Paul turaturana si taina kwarokwaroisi, ba yabata si vera si riu ku aba gayogayo gawarina.
30 Paul ana waina ita riu ku koroto kamona saba bigeruwana biyisi kega si kaotaveyei.
31 Kupura babadisi, Paul turaturana mutusi, yebo wara si porai kurina si wone sakiyei kata kega ku meyaga aba gayogayo gawarina ita riu.
32 Kamonai pipiya ereonowana si bubuwa wai, si paraparara kwatakwatama, mutusi sisiya kesana ba mutusi sisiya bauna. Ereonowasi si bubuwa kairavina, pesarisi kega si kuiri awaika kairavina si notuwa.
33 Jew biyisi koroto kamonai, Alexander si rubukoini ku naona, ba si wonei kata ita wone kabitamnisi. Yaronai i tapi tawanisi wai si ma guguba, basuna ana waina kairavisi iti sisiya.
34 Ba maranai koroto si bopanai kata kona Jew biyina wai para si dagui, “Ephesus asi god, Artemis maragata sakiyina Ephesus kamonai! Ephesus asi god, Artemis maragata sakina Ephesus kamonai!” Ba si para tupetupena yepo ora ruwamo rubana.
35 Meyaga badana kaikapona i wonisi si ma guguba ba i wona, “Ephesus biyimi, pipiya dobu ereonowanai si kuiri, kata Ephesus kona Artemis ana eteni temple kana aba potapota, ba gubagubana wai sapamai i peku kurita.
36 Nikona kega kotoi ini buruburuwei, kota ma guguba ba kega kona reso kwatakwatama.
37 Nikosi sebasebare ko urabaisi ko botu nikei, wai kega awaika Artemis ana yove taparoro kaikapona kamonai si pisikari kona kega ata god wasikena si gigimi.
38 Abisiri yai Demetrius ana sabisabirisi yabata te bikunumakisi wai, bibuibuiya biyisi te mamana kosi ko kinanisi kata ini bibuibuiya kabitamnisi.
39 Awaika mutusi yebo karavisi ko bikunumakisi wai Rome bibuibuiya biyisi kosi sina bobitotorisi.
40 Rome biyisi niko binuwamotom kairavina sini kunumakita, ba bibuibuiyita kairavina wai mekabage tana wona?”
41 Nikona i wonisi murinai wai si gorita.