20
Macedonia ba ku Greece
Binuwamotom ba reso i kakaba wai, Paul bigeruwana biyisi i runotuwanisi ba ibo bimaragasisi, ba i kiuruwisi. Ba i nae ku Macedonia kupurina. Kona kupurinai i bowagawaga ba bigeruwana biyisi i kaobimaragasisi yepo i verakasibau ku Greece kupurina, ba namai i mana yepo nawaravi tonu si kakaba. Ba i bobunaga wakai ita nae ku Syria kupurina saba, ibo panani kata Jew biyisi sibi dugu kasibunuina kairavina wai i yewo i veramaga ku Macedonia kupurina, ba namai wata ita nae ku Syria mena. Pipiya mutusi yabata Pyrrhus, Berea biyina, kona wai Sopater natuna, Aristarchus ba Secundus kosi Thessalonica biyisi, Gaius kona Derbe biyina, ba Tychicus ba Trophimus kosi Asia biyisi, ba yebo Timothy yabata. Nikosi sebasebare si nao si nae ku Troas ba namai si potapotai kai. Bread Kega Yeast Yabata Poragina murinai wai, Philippi ai wakai ka geru ba kao 5 murinai Troas yai kai kesanikai ba namai yebo kao 7 ka mana.
Paul ana Bowagawaga Damona
Taparoro dagudagunai, rabisi pompom ai ka notuwa, kambira kairavina ba kona wai Sunday. Paul pipiya kurisi i sisiya yepo i pom basuna, kairavina mara ita tom wai iti sumarisi ita nae. Kai kesanikai kabi dugu ba yove kamona tepanai wai yasegana pesarisi si karakarata. Yaraka kana waba Eutychus batara bitonuinai kaidamonai, damana sibe kana ba riuriu i ma potai ba matana i duduna wai, i kenouwapa ba i peku ku tano. Si gakira wai raborabona si kabari. 10 Paul i gakira i runoma ba i tararausisi ba i wonisi, “Kega nuwanuwami sina kairagaraga, kona wai yawayawasina.” 11 Paul i veramaga i gae ku yove kamona, ba si kambira ba si kam yabata, ba kurisi i bisisiya yepo mara i tom wai i sumarisi. 12 Ba pipiya ere nuwagairesi sebare yarakina yawayawasina si urabai si nae ku yove.
Paul ana Kiuru Dimana Ephesus Waraetesi kurisi
13 Ba wakai kai nao ka nae ku Assos, namai Paul kati uwani. Kairavina ana waina kae tano ai wata ita yewo. 14 Ba Assos yai i pananikai wai, kai uwana ba ka nae ku Mitylene. 15 Mara i tom wai ka kuka ku Kios neyarina ka vera tawani, ba kao kesana murinai kai garubona ku Samos neyarina, ba yebo kao kesana murinai ka verakasibau ku Miletus. 16 Paul ana waina Ephesus ita vera tawani, kairavina kega ana waina kona kupurinai iti metewa. I biyagiyagina ku Jerusalem ita verakasibau, ba muri yai Pentecost marana.
Paul Ephesus Biyisi i Kiuruvisi
17 Ka verakasibau ku Miletus wai Paul wara i porai Ephesus taparoro babadisi sita botu kurina. 18 Si verakasibau wai i wonisi, “Woraworanai a botu ku Asia kupurina, ba mekabage kamonai ta mana i botu karaku nina wai ko kuiri. 19 A tere kirena meyiku ba ere mata okowiku, Bada ana saibira a wosei ba ruruba kaikapona, Jew biyisi karisi yai a yauni. 20 Ko kuiri kata rumamarai ai beyebeyimi, ba kega awaika kesana a botawani. Awaika iti baisim wai debai, ba ami yove yai awonimi. 21 Matapa awonimi kata, Jew ba Greek biyimi God kurina kona tombaubaunimi, ba Iesu koni geruwei.
22 Ba karaku, Kanuma Kaobaisiyena i kaotuneiku a nenae ku Jerusalem, kega a kuiri awaika ina tupuwa kuriku. 23 A kuiri kata meyaga ereonowasi yai Kanuma Kaobaisiyena, i kaobinonoriku kata patuma yovena ba paiwara e potapotaiku. 24 Saba au yawasa kuriku wai kega sawara kaimasawina, saba Bada Iesu ana saibira i tauniku wai ani kakabi, wai kona wata a baibaiyavi. Pipiya kurisi God ana baibaitai, warana gairena ata rumamarei.*
25 Karaku a kuiri kata komi iyabomi God ana basileiya kurimi a rumamarei, wai kega kona kinana meyiku. 26 Kona kairavina karaku a wonewonimi kata kotoi wata ina siwana, wai kega kunumakina ana kabari. 27 God ana waina ereonowana a rumamarei kurimi, kega kesana a botawani. 28 Ko pota meyimi! Komi ba God ana dam Kanuma Kaobaisiyena i berimi wai, God ana ekaleisiya taranai i gimonisi wai ko pota kabitamnisi. 29 Ani sumarimi murinai a kuiri kata, pipiya kukou garagara rutaininisi sina riu ku kamomi, wai kega sini nuwanuwanimi. 30 Pipiya yebo kamomi yai sina bomsiri sini sisiya kwarukwaruma, ba nonorayauna kosi sina kibisi. 31 Kona kairavina niko bibeyebeyena goyonai, ko papara kabitamnimi! Awaika bodu tonu kamonai kao ba pom a paiwara, ba ere mata okowiku ai beyebeyim ba kega a boterimi.
32 Ba karaku God ku yarona ba ana baibaita ba ana gairena, wonana kamonai a teretereimi kata ina bobi maragasimi, ami buderi pipiya kaobaisiyesi kamosi yai. 33 Kega kotoi kesana ana silver kona gold kona kana gara a kita kirorowei. 34 Komi ko kuiri kata nikosi yaroyaroku ai, a pota meyiku ba yebo wagawaga turaturaku a potaisi. 35 Awaika ereonowana a wosei wai ai beyimi kata poyapoyami, yai pipiya kaikayokayosi koni baisisi. Bada wonana kona nosi, kega nuwanuwami sina wapa, ‘Kona berena wai, nuwagairena i rakata saki, kega bage kuna bosekwa.’ ”
36 I sisiya i kakaba, wai si maere sogasoga ba i rupari. 37 Ba ere tutousi si tararausi si boyoyaoni ba si kiuruwei. 38 Si yapoya saburere kairavina i wona, “Kega muri yai kona kinana meyiku.” Ba yabata si nae ku waka.
* 20:24 2 Timothy 4:7