6
Pipiya asi 7 si Bineisi
Kona maranai bigeruwana biyisi si pesapesara wai Greek Jew biyisi, kosi wata kamosi yai si gwinigwini Hebrew Jew biyisi kurisi, kairavina asi sobesobere kasi kam kao patepatena kega si gutaguta kabitamni. Damanina apostle asi 12, bigeruwana biyisi si gaenisi ba, si wona, “Kega i gaire kata God warana rumamarina tana boterei ba kam tani kodei. Saba sebasebare asi 7 kamomi yai bobo kuwayisi ba Kanuma Kaobaisiyena, nuwanuwasi i bonuvisi wai ko bineisi. Ba kosi niko saibira kurisi kani garubonei. Ba yakai ama saibira kona kana rupari, ba Bada wonana kana raumamarei.”
Damanina ba niko nota gairena si nonori wai ereonowasi si nuwagaire. Kata Stephen si binei, kona sebarena wai bitumagana biyina ba yebo Kanuma Kaobaisiyena i bonuwei, ba yebo mutusi wai Philip, ba Procorus, ba Nicanor, ba Timon, ba Parmenas, ba Nicolas Antioch biyina, ana yawasa i berena i Keresiyana. Nikosi sebasebare si botuvisi apostle kurisi kata yarosi ku tepasi si taura ba si ruparisi.
Damanina ba God wonana kupura i nunu roboi. Kata pipiya pesarisi Jerusalem kamonai Iesu si geruwei ba yebo priest God ana yove kamonai si puyopuyo bunuwa wai korotosi asi bitumagana Bada kurina si terei.
Stephen si Patumi
Ba Stephen, kona God ana maragata ba baibaita i bonuwei, wai kiyakiyaya ba matakira kaikaposi pipiya kamosi yai i wosewose. Saba Jew biyisi mutusi kega si damanina, ba kosi wai Jew biyisi asi dugu yovena meyaginai si kasibau kosi Alexandria meyaginai te mamana, ba yebo Cilicia ba Asia kupurisi yai si botu. Ba nikosi sebasebare Stephen yabata bikawapata si dagui. 10 Saba God ana Kanuma nota ba kuira i berei wai i sisiya, kata kega rubarubana sita kaobeyei.
11 Damanina ba bibune yai pipiya mutusi si kwairisi kata sita nae sita kwaruma, kata Stephen si nonori, ba Moses ba God i kaobigoyonisi. 12 Damanina ba pipiya ba warawaretesi, ba bibeyebeyena biyisi, pipiya nuwanuwasi si piroi, wai Stephen si taina seseri si botu babada kurisi. 13 Ba sisiya kwarukwarumisi si wose, si wona, “Niko sebare mamanina God ana yove kaobaisiyena ba Moses ana kairuwana e kaobigoyoni. 14 Basuna ka nonora ba i wona kata, Iesu Nazareth biyina, niko gawara ina kasibigoyoni, ba ata dudura Moses i berita wai ina birai.”
15 Ba iyabosi wata badana yabata kamonai si makira si mamana wai ereonowasi Stephen si kita garegarei, basuna kona naona wai i ruyasegana kinana bage aneya.