8
Kabaita i Kakaba
1 God Noah ba aba payapaya ereonowasi waka kamonai kega i nota wapeisi sibe i porai ku dobu ba okowa i rutaina.
2 Tano kamonai busibusira ba sapamai kutukutuba matam ketasi si pota, ba kusana i boterei.
3 Ba dobu ai okowa nuwato ai i rautaina yepo kao 150 murinai okowa i mama taveyei.
4 Nawaravi 7, ba kao kana bi 17 kamonai, waka Ararat koyanai i garu geyei.
5 Okowa i rutaina yepo nawaravi kana bi 10 dagudagunai koya tepasi si rupaira.
6 Kao 40 murinai Noah waka kana masare i wosei wai i botaveyei.
7 Ba agaoga i pora kasibauwei saba, kega i veramaga, neubuwa i nenae ba i botubotu yepo, okowa dobu ai i mama taveyei.
8 Muri yai bunebune i porai, okowa ita kitai i mama taveyei, kona kega.
9 Saba bunebune gawara kega kesana memei i panani ba ita toga kairavina okowa dobu i bonuwei, wai dama i robo i veramaga ku waka ba Noah yarona i bokotoi ba bunebune i yauni.
10 Noah i potapota yebo kao 7 ba bunebune i pora meyei.
11 Rabisi pompomai bunebune olive senana wauna kawanai i kuta tawani, ba i veramaga Noah kurina. Ba Noah i kuiri kata okowa i mama taveyei.
12 I potapota kao 7 murinai ba bunebune i pora meyei saba, kega i veramaga mena.
13 Maranai Noah kana bodu i bi 601 nawaravi dagudagunai okowa i kakaba ba Noah waka kana sowo i botaveyei ba i kinana wai i wona, ageee okowa tano ai matapa tano i gasari.
14 Nawaravi bairuwaina kaona kana bi 27 kamonai dobu isu gasara taveyei.
15 Ba God Noah kurina i wona,
16 “Kom kaowam ba natunatum sebasebare ere kaokaowasi yabata, waka ko kasibau taveyei.
17 Ba sawara yawayawasisi ereonowasi yabata ko mamana wai, ke tere kasibauvisi. Manu ba aba payapaya, ba awaika ereonowasi tano ai te botete wai, kata sini tuwa, ba dobu sini bonuwei.”
18 Damanina Noah ba natunatuna sebasebare ba kaowana ba natunatuna kaokaowasi yabata waka si sumarei ba si kasibau ku matara.
19 Dobu aba payapayaya ereonowasi ba tanoai te botete wai, ba manu ereonowasi pesisi nunusi yai waka kamonai si rukasibau.
20 Damanina ba Noah raunabonabo Bada kairavina i bowai, ba aba payapayaya ba manu God matanai gaigairesi mutusi i yauna ba raunabonabo tepanai suwara kapukapunina i puyobunuwa God kurina.
21 Ba Bada puyobunuwa sirina puguna i yaoni wai, i nuwagaire ba nuwasinenai i wona, “Kega meyana pipiya asi wose yai ba dobu ana kaonawai. Bagunai wata si goyo meo kana pata, yogiyogisi yai ba i botu karaku nina, ba asi nota sina goyo ba asi wose sina goyo. Saba kega meyana, yawasa ana kasibigoyona meyei.
22 Dobu e mamana wai
bao ba bokasira,
nuba ba borabora,
bodu ba kwamra,
pom ba kao
kega meyana sina kakaba.”