9
God ana Bidamanina Maragasina Noah yabata
1 Damanina ba God Noah natunatuna yabata i gairenisi ba i wonisi, “Kona uwa ba koni tuwa pesara ba dobu koni bonuwei.
2 Aba payapayaya ba manu, ba sawara tano ai te botete wai, ba siyauwa enagai ereonowasi ku yaromi a terisi ba sina nagarimi. Ba komi koni badisi.
3 Awaika ereonowana yawayawasisi ba bokwayo kwayosi wai kami kam, kesanina yebo keyama ba sinamona matamatagisi. Karaku sawara tupana a bereberimi.
4 Saba siyauwa ere tarana kega kona kani, yawasa wai tara kamonai e mamana.
5 Kotoi wata pipiya ina kasibunui wai sarobina ina yauni ba mekosi aba payapayaya pipiya sina kasibunui wai, kosi yebo sina rabobo. Kotoi wata maturana ina kasibunuwa matagi wai yebo kona ina rabobo.
6 Kotoi wata pipiya ina kasibunui wai kona yabata sina kasibunui kairavina pipiya wai God i wosei kona rutainina.
7 Ba komi wai, koi tuwa pesara ba dobu koni bonuwei.”
8 God Noah natunatuna yabata i wonisi,
9 “Karaku nina, au bidamanina maragasina a tereterei, komi ba ami rakaraka muri yai te botubotu wai kurisi.
10 Ba yebo sawara yawayawasisi dobuai, manu ba aba payapaya manamisi ba garagara aba payapayayisi ereonowasi wakai ko kasibau wai yabata.
11 Au bidamanina maragasina mama damanina kurimi a tereterei. Kata kega kutukutuba yawasa ereonowana ina kasibigoyoni meyei, ba yebo kega kutukutuba dobu ina kasibigoyoni meyei.”
12 Ba God i wona, “Niko au bidamanina maragasina ana matakira mama damanina a tereterei, komi, ba pipiya ereonowasi muri yai te botubotu wai kurisi ba yebo aba payapayaya yawayawasisi ereonowasi yabata kurisi.
13 Yauku au diridiri gubai a terei. Kona wai au bidamanina maragasina matakirina, komi ba dobu ereonowana kurisi.
14 Maranai guba dobu ina sowoi wai diridiri ina rukasibau,
15 wai au bidamanina maragasina ana nosi, komi kurimi, ba pipiya ba aba payapayaya ereonowasi kurisi kata kega meyana kutukutuba ina kasibigoyonimi.
16 Maranai diridiri guba kamonai ina rukasibau ana kinani wai God ana bidamanina maragasina mama damanina ana nosi, pipiya ba aba payapayaya ereonowasi dobu ai kurisi.”
17 Nikona wai, God bidamanina maragasina matakirina dobu ai yawasa ereonowasi kurisi.
Noah ba Natunatuna Sebasebare
18 Noah natunatuna sebasebare wakai si kasibau wai kasi waba Shem, Ham ba Japheth (Ham natuna wai Canaan).
19 Ba Noah natunatuna nikosi sebasebare yai, ba pipiya i kasimosarisi dobu tupana si yauni.
20 Noah bao i dagui ba sawara kana waba grape baona i terei.
21 Ba okowa padapadana kana waba wine, grape yai si wosei ba Noah i toma neganega ba ere nimanimana ana yove kara kamonai i dudauwa.
22 Canaan tamana Ham, tamana Noah ere nimanimana i kinani wai i kasibau tuwatuwana i wonisi.
23 Saba Shem, ba Japheth gara si yauni ba ku kabarasi si terei, ba si muri titaina si riu ku yove kara kamonai tamasi ere nimanimana i dudauwa wai si sowoi ba kega si kinani.
24 Noah i sikwana ba i kuiri kata natuna murimurina mekabage kurina i saivira.
25 Wai damanina i wona,
“Canaan a kaonawaim,
kuni moyaka damana ba kom,
tuwatuwam asi saibisaibirina.
26 Shem ana Bada God tana bokabakabari saba,
Canaan wai Shem ana saibisaibirina.
27 Yebo God Japheth ana kupura ina tubotaini ina rakata;
ba yebo Shem ana yove kara kamonai ina mana,
ba Canaan wai, Japheth ana saibisaibirina.”
28 Kutukutuba murinai Noah dobu ai i mana bodu 350 rubana.
29 Noah kana bodu 950 ba i rabobo.