16
Iesu i Bomsiri
(Mat 21:1-8; Luk 24:1-12; Jhn 20:1-10)
Ba Sabath marana i kakaba wai Mary Magdalene ba Mary James sinana ba Salome, bane si gimona ba sita nae Iesu tupuwina siti boroi. Kata Sunday maratom didibarinai, kao i gegae wai kosi si nae ku karawaga, ba ketai si toiruba bibirana si wona, “Kotoi akima karawaga matamketanai ini peuru taveyei?” Saba si verakasibau ba si tarakata siti kinana kata, nao akima kaikapona matapa si peuru taveyei.
Ba si riuriu ku karawaga kamona wai, sebare yarakina gara poepoena i kotei ba kasusi ai i makira i mamana. Ba si kinani wai si sikwana neganega. Ba kona i wona, “Kega kona nagara. Komi Iesu Nazareth biyina si tuparatui wai kona ko nuwenuweni? Kona wai kega nina, kona wai i bomsiri! Ko kinani, si terei wai gawarina nina. Saba ko nae, kata ana nonorayauna ba Peter ko wonisi, ‘Kata kona i nao e nenae ku Galilee, mekabage i wonimi wai, namai kona kinani.’ ”*
Damanina bibainesi si nagara ba si bonegenegeisi wai karawaga si kasibau taveyei ba si vera. Ba si nagara saki wai kega kesana kotoi si wonei.*
Sunday didibarai, Iesu i bomsiri wai Mary Magdalene kurina i rerematara kainaona. Kona wasikena wai kanuma goyogoyosi asi 7 kamonai i kwabina kasibauwisi. 10 Ba i nae ana nonorayauna si binuwapoya ba si tutou wai i wonisi, 11 kata Iesu i yawasa ba i kitai saba maranai kosi si nonori wai kega si geruwei.
12 Kona murinai Iesu kana kinana i birai, ba ana nonorayauna asi ruwamo ketai si yewoyewo wai kurisi i rerematara 13 Ba si veramaga wai nonorayauna mutusi si wonisi ba saba kosi yebo kega si geruvisi.
14 Muri yai asi 11 si kamkam ba Iesu i rerematara kurisi ba asi nota kairagaraga ba kega si bigeruwana kairavina i yegaisi. Basuna i bomsiri wai iyabosi wata si kinani ba si bisisiyei wai kega si geruwisi. 15 Ba kurisi i wona, “Ko kasibau kona nae dobu ku ereonowana ba wara gairena ko rumamarei.* 16 Kotoi wata ini geruwana ba ina babataito wai ina yawasa, ba kotoi wata kega ini geruwana wai saroba goyona ina yauni. 17 Ba pipiya bibitumaganisi wai nikosi matakira sina wose. Yauku kau wabai, wose kaimasavisi sina wose, kanuma goyogoyosi sini rukasibuwana ba gamo bubausi yai sini sisiya, 18 kosi mota yarosi yai sina yauna, ba maranai kosi duba sina tomani wai kega wata sina rabobo. Ba yarosi pipiya gubagubagisi ku tepasi sina terei wai sina yawasa.”
19 Ba Bada Iesu kurisi i sisiya i kakaba murinai wai, God i yauni i gae ku sapama ba kasunai i makira.* 20 Damanina ba nonorayauna si kasibau si nae ba dobu ereonowanai si rumamara, ba Bada kamosi yai i saibira ba mekabage i wonisi wai matakira nanakasike si tupuwa.
* 16:7 Matthew 26:32; Mark 14:28 * 16:8 Mark i kirukirimi wai i botu nina parasina i kakaba. Mark bukana katamanisi mutusi niko kewa 9-20 kega e mamana. * 16:15 Acts 1:8 * 16:19 Acts 1:9-11