3
Sebare Yarona Kara Rukurukumina
(Mat 12:9-14; Luk 6:6-11)
1 Kao kesana Iesu i riu Jew biyisi asi ku dugu yovena ba namai sebare yarona kara rukurukumina i mamana.
2 Ba pipiya mutusi nai Iesu si bokibukibu kabitamni kata Sabath maranai sebarena iti yawasi wai siti kunumakei.
3 Iesu sebarena i wonei, “Ke botu nikei ku naona, ba pipiya naosi yai kuni msiri.”
4 Ba Iesu pipiya i toirubaisi i wona, “Mekabage ata kairuwana e wonawona, kata Sabath maranai gairena tana wosei kona goyona, ba tani yawasa kona tana kasibunuwa?” Saba kosi kawasi si pota.
5 Iesu i kita nanagisi ba i yagisi, saba yebo i nuwapoyisi, kairavina kosi nuwanuwasi gudugudusi ba sebarena kurina i wona, “Yarom ke bokotoi.” Ba i kotoi wai i yawasa.
6 Kata Pharisee biyisi si kasibau taveyana ba si nae Herod ana pipiya yabata si dagui si ogatara kata mekabage Iesu sita kasibunui.
Koroto Kaikapona Iesu si Kibi
7 Ba Iesu ana nonorayauna yabata si kasibau ku Galilee torena, ba koroto kaikapona si kibisi.
8 Ba maranai Iesu i saibisaibira warana si nonori wai pipiya pesarisi, Galilee yai, Judeai, Jerusalem yai, Idumeai ba kupura Jordan sepinai, ba Tyre ba Sidon ereonowasi si botu.
9 Ba koroto i rakata saki, kona kairavina wai Iesu ana nonorayauna i wonisi, kata waka sita bobunagi kairavina wai kega koroto sita una raturatuisi.
10 Pipiya pesarisi i yawasisi, kona kairavina gubagubagisi pesarisi si biratu kurina kata sita borubai.
11 Ba maranai kanuma goyogoyosi, Iesu si kinani wai naonai si peku ba si rasarasa, “Kom God Natuna!”
12 Saba Iesu sisiya padapadana i berisi, kata kega siti mamatara kata kona kotoi.
Apostle i Bine
(Mat 10:1-4; Luk 6:12-16; Act 1:15)
13 Iesu i gae ku koya tepana ba ana waina pipiyisi i yorisi wai kurina si nae.
14 Ba pipiya asi 12 i bineisi ba i yorisi apostle ba iti poraisi sita kasibau sita rumamara.
15 Ba yebo bibadana maragasina sita yauni ba kanuma goyogoyosi sita rukwabina.
16 Nikosi pipiya asi 12 i bineisi, Simon i yorei Peter,
17 James ba tuwateina John kosi Zebedee natunatuna, kasi waba i yorei Boanerges, kona basuna wai kosi yagisisi waiparara rutainisi.
18 Andrew, Philip, Bartholomew, Matthew, Thomas, James kona Alphaeus natunatuna, Thaddaeus, Simon Zealot biyina,
19 ba Judas Iscariot, kona Iesu i wawanei.
Iesu ba Beelzebub
(Mat 12:22-32; Luk 11:10-23, 12:10)
20 Iesu i nae ku yove i riu ba yebo koroto kaikapona si notuwa mena, kata kona ba ana nonorayauna yabata kega rubana ba sita kam.
21 Ba nikona ana rakaraka si nonori wai si nae sita urabai ku yove, kairavina si wona kona i neganega.
22 Saba kairuwana bibeyebeyena biyisi Jerusalem yai si botu ba si wona, “Kona wai Beelzebub kamonai e mamana, ba kona taupaumina maragata e bereberei wai kanuma goyogoyosi e bikasibaunisi.”
23 Kata Iesu i yorisi si botu kurina ba maibai kurisi i sisiya i wona, “Mekabage Satan yebo Satan iti kasibauni?
24 Kona mekabage basileiya kesana ikesina ina geyara meyei, ba ina geyara meyei wai, ina peku.
25 Kona rakaraka kega sini nuwakesana wai sina geyara meyisi.
26 Kona Satan ana pipiya yabata sina geyarana meyisi wai kega rubana sini msiri saba, sina momosa.
27 Ba kega kotoi sebare maragasina ana ku yove ina riuni ba ana sawara ina pisikara. Saba kainaona ina kai kaupatumi ba kata muri yai ana yove ina rebui ba ina pisikara.
28 Ba a bisuwonimi, pipiya asi piragagoyo ba asi bi gigima ana notataveyisi.
29 Saba kotoi wata Kanuma Kaobaisiyena ini gigimi wai, kona kega meyana ana notataveyei ba kona piragagoyona wai ina madamana.”
30 Nikona i sisiyei kairavina si wonawona kata kona kanuma goyona i riuni.
Iesu Sinana ba Warewaresina
(Mat 12:46-50; Luk 8:19-21)
31 Damanina ba Iesu sinana ba warewaresina si verakasibau ba pipiya kesana si porai kata ita yorei ita kasibau.
32 Saba koroto si ma gwagwari wai kosi si wonei, “Sinam ba warewaresim matarai kom te nuwenuwenim.”
33 Iesu i kaobeyisi i wona, “Sinaku ba warewaresiku wai iyabosi?”
34 Ba pipiya si ma gwagwari wai i kinanisi ba i wona, “Sinaku ba warewaresiku wai nina!
35 Kotoi wata God ana waina e wosewosei wai kona waresiku, nobuku ba sinaku.”