3
Kaꞌan ndoso ra Juan tuꞌun Ndioxi nuu yuvi
1 Ra xa xaꞌun kuiya ke ndikaa ra rey Tiberio, ra chee nuu ndiꞌi ndia gobernador, xaꞌndia ra chiñu nuu iin takundiꞌi ñuu ña ndikun ndiaa ñuu Roma. Ra suvi kuiya kan ke xaꞌndia chiñu tu ra gobernador Poncio Pilato nuu takundiꞌi ñuu ña ndikun ndiaa Judea va; ra xaꞌndia chiñu tu ra gobernador Herodes nuu takundiꞌi ñuu ña ndikun ndiaa chi Galilea va, ra ra Felipe, ñani ra Herodes ku ra ndixiyo gobernador ra xaꞌndia chiñu nuu takundiꞌi ñuu ña ndikun ndiaa chi Iturea, xiꞌin ña ndikun ndiaa chi Traconite; ra ra xinani Lisanias ku ra ndixiyo gobernador ra xaꞌndia chiñu nuu na ndikun ndiaa chi Abilinia.
2 Ra suvi mii kuiya kan ke xikuu ra Anás xiꞌin ra Caifás, sutu ndia kunaꞌnu nuu takundiꞌi ndia sutu ndia ñuu Israel, ra saa ke ndikaꞌan Ndioxi xiꞌin ra Juan, seꞌe ra Zacarías, iin iku yuu.
3 Ra ke̱e ra kuaꞌan ra chi nuu ndikaa itia Jordán. Ra xaꞌa ra kaꞌan ndoso ra tuꞌun Ndioxi nuu yuvi na ke̱e iin takundiꞌi ñuu, ña na ndandiko ini na xaꞌa kuachi na, ra ndakuchi na, ra sakaꞌnu ini Ndioxi xaꞌa na.
4 Ra yoꞌo ke ndixinu nuu ña tiaa ra Isaías, ra ndikaꞌan tuꞌun yuꞌu Ndioxi xinaꞌa xaꞌa ra Juan. Ra suꞌva ke kachi ña tiaa ra:
Tiꞌvi Ndioxi iin tiaa, ra kuꞌun ra iku yuu,
ra ndiee ni kaꞌan ra, kachi ra saa:
“Ndasavii ndo ichi ndo nuu Tata yo Ndioxi.
Ndandiko ini ndo xaꞌa kuachi ndo,
ra ndakundee vii ndo nuu ra.
5 Takundiꞌi ichi nuu iyoo yavi ra ndakutu va ña,
Ra takundiꞌi ichi nuu iyoo koꞌndo xiꞌin xiki sukun,
ra ndakuꞌnu ña ra ndundaa va ña.
Ra ichi ndiakua, ra ndundaku va ña.
Ra ichi nuu iyoo ni yuu,
ra ndandaꞌa va ña.
6 Ra kuni takundiꞌi va yuvi ra xaa sakaku na yuuvi yoꞌo”,
^kachi ña tiaa ra Isaías.
7 Ra kuaꞌa ka vi yuvi ndixaa nuu ra Juan ña kuni na, ña na sakuchi ra na. Ra ndikaꞌan ra xiꞌin na, kachi ra saa:
―¡Na ndivaꞌa kuvi ndoꞌo! ¿A kaku ndo xaꞌa kuachi ndo sa Ndioxi tuvi ndo tu na nandïko ini ndo?
8 Ña xiniñuꞌu sa ndo ke xiꞌna ka na nandiko ini va ndo xaꞌa kuachi ndo, ra sa ndo ña vaꞌa. Ra saa ke kixi ndo kuchi ndo. Ra tu ndakani ini ndo ña: “Koo kaꞌnu va ini Ndioxi xaꞌa kuachi yo, saa chi seꞌe xikua ra Abraham va kuvi yo”, kaꞌan ndo, ra na kundaa ini ndo, chi köo yaꞌvi ndiaa vi ña nuu Ndioxi. Chi ndia yuu ndee ñaa ra kuvi ndasama Ndioxi ña ra nduu ña yuvi va, ra nduu na seꞌe xikua ra Abraham.
9 Ra na kundaa ini ndo chi xa iyoo nduvi va Ndioxi xiꞌin yacha ña kaꞌndia ra ndia tioꞌo takundiꞌi itun kuiꞌi ra koko nu chi köo kuiꞌi ña vaꞌa kuun ndaꞌa nu. Ra saa ke sa tu Ndioxi xiꞌin ndoꞌo va tu na nandïko ini ndo xaꞌa kuachi ndo ―kachi ra Juan xiꞌin na.
10 Ra saa ndindakatuꞌun na ra kachi na saa:
―¿Ra ni ke xiniñuꞌu sa ndi, tu saa? ―kachi na xiꞌin ra.
11 Ra saa ndakuiin ra, kachi ra saa xiꞌin na:
―Na iyoo uvi tikoto nuu, ra na taxi na iin ña ndaꞌa na köo ña nuu; ra na iyoo ña xixi, ra na taxi na ña kuxi na köo ña kuxi ―kachi ra Juan xiꞌin na.
12 Ra saa ndixaa tu ndia kaya xuꞌun kuaꞌan ndaꞌa gobierno va, ña kuni ndia kuchi ndia, ra ndindakatuꞌun ndia ra, kachi ndia saa:
―Maestro, ¿ndia ña ke xiniñuꞌu sa tu nduꞌu? ―kachi ndia xiꞌin ra.
13 Saa ndakuiin ra, kachi ra saa:
―Kïꞌin siki ka ndo xuꞌun ndaꞌa taꞌan ndo; chi xa ta kuꞌva ndikaꞌan gobierno xiꞌin ndo ke na sa va ndo ―kachi ra xiꞌin ndia.
14 Ra saa ndixaa tu sava ndia soldado va ra ndindakatuꞌun ndia ra, kachi ndia saa:
―Ra nduꞌu tu, ¿ndia ña ke xiniñuꞌu sa ndi? ―kachi ndia.
Ra saa ndakuiin ra, kachi ra saa:
―Xa kuïꞌna ka ndo ñaꞌa yuvi, ra täxi ka ndo kuachi siki xaꞌa na. Ra käꞌan kuachi ka ndo xaꞌa yaꞌvi ndo, chi na kindoo ini ndo ta kuꞌva chaꞌvi na ndoꞌo va ―kachi ra xiꞌin ndia.
15 Ra takundiꞌi va yuvi ndiatu ña kama ni kixi ra kuu Cristo, ra ña kan ke tiaa ni kuni na kundaa ini xaꞌa ra Juan, saa chi ndakani ini na a ra kan kuvi ra kuu Cristo kaꞌan na.
16 Ra saa ndikaꞌan ra Juan xiꞌin na, kachi ra saa:
―Süvi yuꞌu kuvi ra. Ra vaꞌa ni ña ndixa va ke ^sakuchi yu ndoꞌo xiꞌin tiakuii, ndi su vaxi inka ra kaꞌnu ni ka nuu yuꞌu, ra ndia nii chiñu loꞌo ke köo yaꞌvi ndiaa yu sa yu nuu ra. Ra ra kan kuvi ra sakuchi ndoꞌo xiꞌin ñuꞌu xiꞌin ndie̱e̱ Tachi Yii Ndioxi.
17 Ra xa iyoo nduvi va ra xiꞌin ñaꞌa ña ndativi ra trigo ra ndachuvaꞌa ra ña veꞌe nuu koo ña, ra taan ra ña väꞌa nuu xixi ñùꞌù ña tüꞌva ndaꞌva ra koko ña.
18 Ra kuaꞌa ni ka va kuꞌva sañaꞌa ra Juan yuvi, ña na nandiko ini na ra ndakiꞌin na ichi Ndioxi.
19 Ra saa ndukeꞌe tu ra Juan xiꞌin ra gobernador, Herodes, xaꞌa ña ndakiꞌin ra yasiꞌi ra Felipe, ñani ra, ña nduu ña yasiꞌi va ra, ra saa tu xaꞌa takundiꞌi ña väꞌa xa va ra.
20 Ra inka tuku va ña väꞌa xa ra Herodes, saa chi chikaa ra ra Juan veꞌe kàà xaꞌa ña ndukueꞌe ra xiꞌin ra xaꞌa kuachi ra.
Suꞌva kuu ta chichi Jesús
21 Ta yachi ta täan kuꞌun ra Juan veꞌe kàà, ra kuaꞌa ka vi yuvi sakuchi ra, ra sakuchi tu ra Jesús va, ra te ndiꞌi chichi Jesús, ra saa xaꞌa ra kaꞌan ra xiꞌin Ndioxi, ra ndanuña ndivi.
22 Ra ta kaa iin sata loꞌo, saa kaa Tachi Yii Ndioxi nduxinu ña xika ña xini ra. Ra xini soꞌo na ndee kan ña ndikaꞌan Ndioxi xiꞌin Jesús, kachi ra saa:
―Yoꞌo ku seꞌe mii yu ra kuꞌvi ni ini yu xini yu yoꞌo, ra kusii ni ini yu xiꞌin kun ―kachi Ndioxi xiꞌin Jesús.
Suꞌva xinani na xii xikua Jesús
23 Ta ndixinu Jesús oko uxi kuiya ra saa xaꞌa ra sañaꞌa ra yuvi. Ra seꞌe ra José va kuvi ra ndituvi na.
Ra ra José ra seꞌe ra Elí va xikuu ra.
24 Ra seꞌe ra Matat xikuu ra Elí.
Ra seꞌe ra Leví xikuu ra Matat.
Ra seꞌe ra Melqui xikuu ra Leví.
Ra seꞌe ra Jana xikuu ra Melqui.
Ra seꞌe ra José xikuu ra Jana.
25 Ra seꞌe ra Matatías xikuu ra José.
Ra seꞌe ra Amós xikuu ra Matatías.
Ra seꞌe ra Nahum xikuu ra Amós.
Ra seꞌe ra Esli xikuu ra Nahum.
Ra seꞌe ra Nagai xikuu ra Esli.
26 Ra seꞌe ra Maat xikuu ra Nagai.
Ra seꞌe ra Matatías xikuu ra Maat.
Ra seꞌe ra Semei xikuu ra Matatías.
Ra seꞌe ra José xikuu ra Semei.
Ra seꞌe ra Judá xikuu ra José.
27 Ra seꞌe ra Joana xikuu ra Judá.
Ra seꞌe ra Resa xikuu ra Joana.
Ra seꞌe ra Zorobabel xikuu ra Resa.
Ra seꞌe ra Salatiel xikuu ra Zorobabel.
Ra seꞌe ra Neri xikuu ra Salatiel.
28 Ra seꞌe ra Melqui xikuu ra Neri.
Ra seꞌe ra Adi xikuu ra Melqui.
Ra seꞌe ra Cosam xikuu ra Adi.
Ra seꞌe ra Elmodan xikuu ra Cosam.
Ra seꞌe ra Er xikuu ra Elmodan.
29 Ra seꞌe ra Josué xikuu ra Er.
Ra seꞌe ra Eliezer xikuu ra Josué
Ra seꞌe ra Jorim xikuu ra Eliezer.
Ra seꞌe ra Matat xikuu ra Jorim.
30 Ra seꞌe ra Leví xikuu ra Matat.
Ra seꞌe ra Simeón xikuu ra Leví.
Ra seꞌe ra Judá xikuu ra Simeón.
Ra seꞌe ra José xikuu ra Judá.
Ra seꞌe ra Jonán xikuu ra José.
Ra seꞌe ra Eliaquim xikuu ra Jonán.
31 Ra seꞌe ra Melea xikuu ra Eliaquim.
Ra seꞌe ra Mainán xikuu ra Melea.
Ra seꞌe ra Matata xikuu ra Mainán.
Ra seꞌe ra Natán xikuu ra Matata.
32 Ra seꞌe ra David xikuu ra Natán.
Ra seꞌe ra Isaí xikuu ra David.
Ra seꞌe ra Obed xikuu ra Isaí.
Ra seꞌe ra Booz xikuu ra Obed.
Ra seꞌe ra Salmón xikuu ra Booz.
Ra seꞌe ra Naasón xikuu ra Salmón.
33 Ra seꞌe ra Aminadab xikuu ra Naasón.
Ra seꞌe ra Aram xikuu ra Aminadab.
Ra seꞌe Esrom xikuu ra Aram.
Ra seꞌe ra Fares xikuu ra Esrom.
Ra seꞌe ra Judá xikuu ra Fares.
34 Ra seꞌe ra Jacob xikuu ra Judá.
Ra seꞌe ra Isaac xikuu ra Jacob.
Ra seꞌe ra Abraham xikuu ra Isaac.
Ra seꞌe ra Taré xikuu ra Abraham.
Ra seꞌe ra Nacor xikuu ra Taré.
35 Ra seꞌe ra Serug xikuu ra Nacor.
Ra seꞌe ra Ragau xikuu ra Serug.
Ra seꞌe ra Peleg xikuu ra Ragau.
Ra seꞌe ra Heber xikuu ra Peleg.
Ra seꞌe ra Sala xikuu ra Heber.
Ra seꞌe ra Cainán xikuu ra Sala.
36 Ra seꞌe ra Arfaxad xikuu ra Cainán.
Ra seꞌe ra Sem xikuu ra Arfaxad.
Ra seꞌe ra Noé xikuu ra Sem.
Ra seꞌe ra Lamec xikuu ra Noé.
37 Ra seꞌe ra Matusalén xikuu ra Lamec.
Ra seꞌe ra Enoc xikuu ra Matusalén.
Ra seꞌe ra Jared xikuu ra Enoc.
Ra seꞌe ra Mahalaleel xikuu ra Jared.
Ra seꞌe ra Cainán xikuu ra Mahalaleel.
38 Ra seꞌe ra Enós xikuu ra Cainán.
Ra seꞌe ra Set xikuu ra Enós.
Ra seꞌe ra Adán xikuu ra Set.
Ra seꞌe Ndioxi xikuu ra Adán.