4
Ixtondoso ña timiaꞌa Jesús
1 Ra iyoo ni ndie̱e̱ Tachi Yii Ndioxi xiꞌin Jesús, ra saa ke̱e ra nuu ndikaa itia Jordán, ra ndakiꞌin Tachi Yii Ndioxi ra kuaꞌan ra iin iku yuu.
2 Ra uvi xiko kii ndixiyo ra kan. Ra ndixïxi ra, chi saa ndixiyo va ra soko; ra ta ndixinu uvi xiko kii, ra saa xaꞌa ndikaꞌun ini ra. Ra saa ixtondoso timiaꞌa ra.
3 Ra ndikaꞌan ri xiꞌin ra kachi ri saa:
―Tu ndixa Seꞌe Ndioxi kuvi kun, ra kaꞌan xiꞌin yuu yoꞌo ra na nduu ña ixta kuxi kun ―kachi ri xiꞌin ra.
4 Ra saa ndakuiin Jesús, kachi ra saa xiꞌin ri:
―Suꞌva va kachi tuꞌun Ndioxi: “Süvi xiꞌin indaa ixta ke xiniñuꞌu kutiaku yuvi chi xiniñuꞌu tu kandixa na takundiꞌi tuꞌun Ndioxi va ra saa ke kutiaku na” ―kachi ña, kachi ra xiꞌin ri.
5 Ra saa ndakiꞌin timiaꞌa kan Jesús ndixaa ra xiꞌin ri iin xiki ña sukun vaꞌa, ra ikan ndiñaꞌa ri iin takundiꞌi ñuu ña iyoo nuu ña yuuvi yoꞌo nuu ra iin too loꞌo.
6 Ra ndikaꞌan ri xiꞌin ra, kachi ri saa:
―Ndaꞌa yoꞌo taxi yu takundiꞌi ñuu yoꞌo, ra kaꞌndia kun chiñu nuu ña, ra xiꞌin yoꞌo koo takundiꞌi ña kuika ña kuu mii ñuu yoꞌo. Chi kuenda yuꞌu va ke, ra ndia ndia ka mii na kuni yu taxi yu ña ndaꞌa, ra taxi va yu ña.
7 Ra tu na ndakusiti kun nuu yu, ra ndasakaꞌnu kun yuꞌu, ra kuenda mii kun kuu takundiꞌi va ña ―*kachi ri xiꞌin ra.
8 Ra saa ndakuiin Jesús kachi ra saa xiꞌin ri:
―¡Kuatiaꞌa nuu yu, Timiaꞌa! Saa chi suꞌva va kachi tuꞌun Ndioxi: “Indaa mituꞌun va Tata yu Ndioxi ndasakaꞌnu yu, ra indaa ra kan va xiniñuꞌu kandixa yu” ―kachi ña.
9 Ra saa ndakiꞌin timiaꞌa kan Jesús ndixaa ra xiꞌin ri ñuu Jerusalén. Ra ikan sandaa ri ra xini veꞌe ñuꞌu kaꞌnu, ndia nuu sukun vaꞌa. Ra ndikaꞌan ri xiꞌin ra, kachi ri saa:
―Tu ndixa Seꞌe Ndioxi kuvi kun, ra sandakava mii kun yoꞌo vichin.
10 Saa chi kaꞌan tuꞌun Ndioxi:
Ña tiꞌvi va ra na tatun ra kixi na
kondiaa na yoꞌo ra chindiee taꞌan na xiꞌin kun.
11 Ra nuu ndaꞌa va na ndakava kun.
Ra täxi na takueꞌe kun sa yuu ―kachi ri xiꞌin Jesús.
12 Ra saa ndakuiin Jesús kachi ra saa xiꞌin timiaꞌa kan:
―Suꞌva va kachi tuꞌun Ndioxi: “Küvi kotondoso yu Tata yu Ndioxi”, kachi ña ―kachi ra.
13 Ndia saa ra ninïꞌi ka timiaꞌa ni ke sa ri ña kotondoso ka ri Jesús. Ra saa ndixikutiaꞌa ri nuu ra iin ndiaꞌvi kii.
Xaꞌa Jesús xiꞌin chiñu ña taxi Ndioxi ndaꞌa ra
14 Ra saa nandiko Jesús kuaꞌan ra chi Galilea, ra iyoo ni ndiee Tachi Yii Ndioxi xiꞌin ra, ra saa ndindutia ndoso tuꞌun xaꞌa ra iin takundiꞌi ñuu.
15 Ra xaꞌa ra sañaꞌa ra tuꞌun Ndioxi yuvi iin takundiꞌi veꞌe ñuꞌu ña iyoo ñuu ña ndikun ndiaa chi Galilea. Ra ndiee ni ^ndasakaꞌnu na ra.
Nandiko Jesús kuanuꞌu ra ñuu Nazaret
16 Ra saa ndixaa Jesús ñuu Nazaret nuu xaꞌnu ra. Ra kii ndakindiee̱ na ndixaꞌan ra veꞌe ñuꞌu kan, chi saa yunaꞌa va ra. Ra ndakundichi ra ña kaꞌvi ra tuꞌun Ndioxi nuu yuvi kan.
17 Ra saa taxi na tutu ña tiaa ra Isaías ra ndikaꞌan tuꞌun yuꞌu Ndioxi xinaꞌa ndaꞌa ra. Ra ndakuiña ra nuu kachi ña suꞌva, ra kaꞌvi ra ña:
18 Ndie̱e̱ Tachi Yii Ndioxi iyoo xiꞌin yu.
Saa chi ra kan va kuvi ra ndikaxin yuꞌu ña ndatuꞌun yu tuꞌun vaꞌa xiꞌin na ndaꞌvi,
ra tiꞌvi ra yuꞌu vaxi yu ña chindiee taꞌan yu xiꞌin na ndoꞌo ni ini,
ra sakaku yu na ñuꞌu veꞌe kàà ra saña ndika na,
ra ndakuiña tu yu nuu na kuaa va,
ra sakaku tu yu na ndoꞌo tundoꞌo va.
19 Ra xaa yu ña kaꞌan ndoso yu nuu takundiꞌi yuvi, ña vaꞌa na niꞌi na ña vaꞌa ña taxi Ndioxi.
20 Ra te ndiꞌi kaꞌvi Jesús tutu kan, ra saa ndatuvi ra ña, ra ndataxi ra ña ndaꞌa tiaa ra ndiso chiñu xiꞌin veꞌe ñuꞌu, ra saa ndakunduꞌu va ra. Ra saa iin ixtoꞌni takundiꞌi na ndee veꞌe ñuꞌu kan nuu ra.
21 Ra saa xaꞌa ra ndikaꞌan ra xiꞌin na kachi ra saa:
―Vichin ke ^xini ndo ña ndixinu nuu tuꞌun Ndioxi ña kaꞌvi yu yoꞌo ―*kachi ra xiꞌin na.
22 Ra ndiee ni ndachinuu toꞌo na tuꞌun xaꞌa Jesús. Ra ndakanda ka vi ini na, saa chi nduvi ni ndikaꞌan ra xiꞌin na. Ra saa xaꞌa na kachi na saa:
―¿A su seꞌe ra José va kuvi ra yoꞌo? ―kachi na xaꞌa ra.
23 Saa ndakuiin Jesús kachi ra saa xiꞌin na:
―Xa kundaa va ini yu chi vaxi kii ra kaꞌan ndo iin tuꞌun ndichi xiꞌin yu, kachi ndo saa: “Yoꞌo, ra xa tatan inka yuvi, na sa tatan kun mii kun vichin”, kachi ndo. Ra kaꞌan ka ndo: “A su yoꞌo kuvi ra kuaꞌa ni ña vaꞌa xa ñuu Capernaum; ra saa na sa tu kun yoꞌo va, chi yoꞌo kuvi ñuu kun”, kachi ndo xiꞌin yu ―kachi Jesús xiꞌin na.
24 Ra saa ndikaꞌan ka Jesús tuꞌun yoꞌo xiꞌin na kachi ra saa:
―Ña ndixa ke kaꞌan yu xiꞌin ndo, chi ndia nii na kaꞌan tuꞌun yuꞌu Ndioxi ra mäni na nuu na ñuu na.
25 Ra ña ndixa ke kaꞌan yu xiꞌin ndo, chi saa ndoꞌo na te xinaꞌa ta ndixika ra Elías, ra ndikaꞌan ndoso tuꞌun yuꞌu Ndioxi: ta ndasi Ndioxi ndivi ra ndiküun ka savi uni kuiya sava. Ra ndiee ni xindikaa tama ra ndikaꞌun ni ini yuvi, ra kuaꞌa ni na siꞌi na ndukuaan xindee ñuu Israel, ra ndoꞌo ni ini na.
26 Ndi su ndia nii na siꞌi kan ndixäꞌan ra Elías chindiee taꞌan ra xiꞌin, chi inka ñuu ña nani Sarepta, ña ndikun ndiaa ñuu kaꞌnu Sidón va, tiꞌvi Ndioxi ra ndixaꞌan ra, ra ikan chindiee taꞌan ra xiꞌin iin ña ndaꞌvi ña ndukuaan ndixiyo ñuu kan.
27 Ra saa ndoꞌo tu na te ndixika ra Eliseo, ra ndikaꞌan ndoso tuꞌun yuꞌu Ndioxi xinaꞌa va, ra kuaꞌa ni na ndoꞌo kue̱ꞌe̱ tiaꞌyu ñuu Israel. Ndi su ndia nii na kan ndikäꞌan Ndioxi xaꞌa nduvaꞌa, chi iin tiaa ra nani Naamán, ra ke̱e inka ñuu xika ña nani Siria va, kuvi ra sandaꞌa Ndioxi ―kachi Jesús xiꞌin na.
28 Ra te xini soꞌo na ndee ini veꞌe ñuꞌu kan, ña ndikaꞌan Jesús ña yoꞌo, saa ra ndisaa ni na xiꞌin ra.
29 Ra saa ndakundita na tiin na Jesús ra tava na ra ndia nuu ñuu na, ra ndixaa na xiꞌin ra siki kava sukun nuu kaku kaꞌa ñuu na, ra ikan kuni na sandakava na ra.
30 Ndi su ndikuchüun na xiꞌin Jesús, ra kuee kuee ndiyaꞌa ra maꞌñu na, ra ndakiꞌin ra kuaꞌan va ra.
Sandaꞌa Jesús iin tiaa ra tiin tachi ndivaꞌa
31 Ra saa ndakiꞌin Jesús kuaꞌan ra ñuu Capernaum ña ndikaa chi Galilea. Ra saa xaꞌa ra sañaꞌa ra yuvi na ndee veꞌe ñuꞌu kan kii yii ña ndakindiee na.
32 Ra ^ndakanda ka vi ini na ña xini soꞌo na tuꞌun ña kaꞌan ra. Chi kaꞌan ra xiꞌin iin takundiꞌi ndiayu ña kuu mii ra, ra kuëe ndixa ra ta kuꞌva xa iin na xïni tuꞌun kaꞌan.
33 Ra ini veꞌe ñuꞌu kan nduꞌu iin tiaa ra kuu mii tachi ndivaꞌa, ra saa ndiee ka vi ndindaꞌyu tachi ndivaꞌa ña ndikaa ini ra,
34 kachi ña saa xiꞌin Jesús:
―Koo yaa kun xiꞌin ndi. ¿Nichuun sandiꞌi kun nduꞌu, Jesús, ra ñuu Nazaret? ¿A vaxi kun sandiꞌi kun xaꞌa ndi? Chi yuꞌu ra xini va yu yoꞌo, ña kuu kun Ra Yii, ra ke̱e nuu Ndioxi ―kachi ña ndivaꞌa kan suꞌva xiꞌin Jesús.
35 Saa ndukueꞌe Jesús xiꞌin tachi ndivaꞌa kan, ra kachi ra saa:
―¡Koo yaa yuꞌu kun! Ra saña tiaa ñaa ―kachi ra.
Ra saa kùùn ña ndivaꞌa kan tiaa kan ndia nuu ñuꞌu, ra ke̱e ña kuaꞌan ña, ndi su kuëe nindoꞌo vaꞌa vi ra.
36 Ra ndakanda ni ini yuvi na ndee kan, ra xaꞌa na kaꞌan na xiꞌin taꞌan na kachi na saa:
―¿Ndia tuꞌun ke yoꞌo? Chi xiꞌin ndiayu ra, ra xiꞌin ndie̱e̱ ra xaꞌndia ra chiñu nuu tachi ndivaꞌa ra kandixa ña ra, ra kee ña kuaꞌan va ña ―*kachi na xiꞌin taꞌan na.
37 Ra saa nindutia ndoso tuꞌun xaꞌa Jesús iinii kuvi ñuu.
Sandaꞌa Jesús ña siso ra Simón Pedro
38 Ra te kita Jesús veꞌe ñuꞌu kan, ra saa ndakiꞌin ra kuaꞌan ra veꞌe ra Simón ra itaꞌan xiꞌin ra. Ra saa ndiee ni ndoꞌo ña siso ra Simón kanduꞌu ña xiꞌin kueꞌe kaꞌni, ra saa xakundaꞌvi ka vi na nuu Jesús ña na sandaꞌa ra ña.
39 Ra saa kuyachin Jesús nuu ña, ra xaꞌndia ra chiñu nuu kueꞌe kan, ña na kee ña; saa ra ndikun nduvaꞌa va ña; ra ndakoo ña xavii ña xixi va na.
Sandaꞌa Jesús kuaꞌa ni na xiꞌi
40 Ra ta kuaa ndikita ñuꞌu, ra kuaꞌa ni yuvi ra ndiaka na na xiꞌi, iin ta nuu kueꞌe, ndixaa na nuu Jesús; ra saa chinduꞌu ra ndaꞌa ra sata ta iin, ta iin na, ña sandaꞌa ra na.
41 Ra kuaꞌa ni tu na kuu mii tachi ndivaꞌa, va nduvaꞌa xa Jesús, ra iin ndaꞌyu koꞌo ña ndivaꞌa kan ta kee ña, ra kachi ña saa:
―¡Yoꞌo, kuvi Seꞌe Ndioxi! ―kachi ña xiꞌin ra.
Ra nditäxi ra kaꞌan ña xiꞌin ra, saa chi xa kundaa va ini ña, ña kuu ra Cristo.
Kaꞌan ndoso Jesús iinii kuvi ñuu ña ndoꞌni chi Galilea
42 Ta ndituvi, ra saa ndakiꞌin Jesús kuaꞌan ra iin iku yuu nuu köo yuvi. Ra ndikun yuvi sata ra kuaꞌan na ndanduku na ra. Ra ta ndaniꞌi na ra ra nditäxi na kuꞌun ra inka xiyo.
43 Ra saa ndikaꞌan Jesús xiꞌin na, kachi ra saa:
―Xiniñuꞌu kuꞌun yu inka ñuu ña ndatuꞌun yu xiꞌin yuvi ña na kuiin na kaꞌndia Ndioxi chiñu nuu na, ra sa ra ña vaꞌa xiꞌin na chi xaꞌa ña yoꞌo ke tiꞌvi Ndioxi yuꞌu vaxi va yu ―kachi ra xiꞌin na.
44 Ra saa ndixika Jesús ndikaꞌan ndoso ra tuꞌun Ndioxi takundiꞌi veꞌe ñuꞌu ña iyoo chi Galilea.