Rute Yoã
Naa ivo vanaro, Israel yorarasĩ Egito mainamãsho atõ veti ivo txipo iti yoãná. Atiã Juizrasĩro pakayatõ kakáya, yora vanã meki akayavo aká. Askái kakáyai shokosho Israel yorarasĩ ato vesosho shokovo. Askánamãsho, Israel yora wetsa, Moabe shavo Rute, aĩ ashõ ãwẽ niánamãshose vopii. Askái ã vene vopimaĩnõ, Rute ãwẽ chinã tekímaki, ãwẽ vavãwã Noemi noikésho, IsraelYové atonĩsho ravii tsaói. Askávai txipo vene wetsa merasho, aa tavá tsaókesho vakeyái, aaro vevo ãwẽ venẽ wetsama. Askásho Rutero, Israel yorarasĩ kakáya Davipa ewatxo.
1
1 Juizrasĩni kakáyai shokosho, Israel yorarasĩ ato vesoatiã, ano maitiói piti makiatõsho pikatsikívo. Aská oĩnã, Judá mai naki Belém shavánamã niaya, yora ãwẽ aĩ, vake ravévakĩ, aatí Moabenamã shokoi voávo.
2 Ãwẽ anero, Elimeleque ãwẽ aĩ Noemi, ãwẽ vake ravévakĩ, Malom wetsaro Quiliom aká. Naa ivo yorarasĩro, Efráta ivovoJudá mai naki Belémnamã shokoa yora, askásho voí Moabe maĩ shokoi voávo.
3 Askávai txipo Elimeleque vopii, askámaĩnõ Noemi ãwẽ vake venevake ravévakĩ aatíse shokokéi.
4 Moabe shavo ninivarãsho ano shokokévo, ãwẽ anero Orfa, wetsaro Rute aká. Askái ano dez vari shavápáchta shokovo.
5 Askávai txipo Malom, Quiliom aká, vake yamase shokosho vopióvo, askámaĩnõ Noemi aríchtase niakéi, vene yama, ãwẽ vakerasĩ yama aká.
6 Askávai txipo Noemĩ wetsamavorasĩ Awetima Yovepa ato take aká, piti merákaĩóai ikí nĩkã iinã, ãwẽ awerasĩ roa avai ãwẽ vakẽ mekẽyavorasĩnĩ arimẽse wenívaĩvo Moabenamãsho.
7 Arimẽse ióvaĩ voávo Judánamã.
8 Askámaĩnõ Noemĩ vaĩsho ãwẽ vakẽ mekẽyavo ato aská akĩ, vesokéna, matõ ewa noikéna, enõ noipakĩ ea vesoi, matõ venemẽ noipakĩ vesoi, mã ava avaina keskáki, Awetima Yovepa mato askásevi akatsai.
9 Vene wetsa mã meramaĩnõ Awetima Yovepa mato teatĩpá, wetsa ãwẽ venenĩ, wetsa ãwẽ venenĩ anosho, akĩ. Aská iinã Noemĩ ravé ashõ ato enevaĩkatsi iinã ato mekí apatõsho
10 wai ikí vanai, noke vesoketĩpá, askáse mivé nõ vonõ, mĩ wetsamavorasĩnamã ikívo.
11 Ãwẽ imaĩnõ Noemĩ ato aská aóki, vona aĩ vakevó, awesá iinã evé mã vokatsikíra, vene wetsayashõ, vene vakerasĩ mato merashoótiravãmará mã aai?
12-13 Vesokéna, txipo vake mato ẽ merashoóa, ãwẽ kania mato manáma nã. Vene yama mato kãtxí kãtxítĩpá, ea ma shavo yomẽmakaĩya, ioketĩpai, veneyaótĩpá ea, evé mã onísi awesai, earo mato mã ikítõ ea ikíma, tavákepátõ, Awetima Yovepa ea maõ akátõsho.
14 Askámaĩnõ wai ionívo. Askávaíki Orfa, ãwẽ vavãwã mekí avai vesokei ãwẽ wetsavamavorasĩ chinãvaĩ kaí. Askámaĩnõ Rutero niakéi.
15 Ãwẽ askámaĩnõ Noemĩ Rute askásevi aóki, avé katã, Orfa nã oĩwẽ, ãwẽ wetsamavorasĩ, atõ arí raviya ivo yovérasĩ aká noivaĩi kai nã.
16-17 Ãwẽ aská akátõsho Rute vana inái, askáma, katã ea aóroa, ea enekatsíroa, mĩ ikíti paí, mivése ẽ nikatsai. Ea mia enetĩpá. Mivése shavái ashõ, mivése ẽ nikatsai. Mĩ wetsavorasĩ mivéshóse atomẽ ẽ wetsamayákatsai. Mĩ raviya yové mivéshóse ẽ raviókatsa, mĩ maĩsho mĩ vopimaĩnõ anosho mivése ẽ vopiókatsa, mia atõ roa amaĩnõ mia taváse ẽ rakákatsa. Mia ẽ pashkámaĩnõrívi Awetima Yovepa tenãkima yosta wetsãse ea ave anõ. Vopishorívi nõ pashkánanãkatsa ikí vanai.
18 Rute askái vanamaĩnõ Noemi vana inaóma, roase, ave kanõ iinã.
19 Askávai voí, Belémnamã atõ nokóvaĩmaĩnõ yoãketanávo. Aská iinã avé aĩvorasĩ arímamẽ vanaketanavo, waaserá Noemi nã?
20 Atõ imaĩnõ Noemĩ ato revíki, Noemi ea atsomároa, mestẽpa ivo Yovépa ẽ chinã notsiyakĩ ea tsaõai iinã Mará ea arína.
21 Nenosho kaí mãyamai ẽ katimẽkĩ, Awetima Yovepa awe yamakĩ ea omai, awesa iinã metsáka ea mã akára?
22 Noemi askái arimẽse iókarãti, ãwẽ vakẽ mekẽya, Moabe shavo Rutenĩ. Askái ano Belémnamã, piti vaná cevada akĩ atõ anea ivo tovai atõ txitavía ivo shavapa nokótivo.